ശ്രീമദ്വാല്മീകീയ രാമായണേ ബാലകാംഡമ് ।
അഥ ഷട്സപ്തതിതമസ്സര്ഗഃ ।
ശ്രുത്വാ തജ്ജാമദഗ്ന്യസ്യ വാക്യം ദാശരഥിസ്തദാ ।
ഗൌരവാദ്യംംത്രിതകഥഃ പിതൂ രാമമഥാബ്രവീത് ॥ 1 ॥
ശ്രുതവാനസ്മി യത്കര്മ കൃതവാനസി ഭാര്ഗവ ।
അനുരുംധ്യാമഹേ ബ്രഹ്മന് പിതുരാനൃണ്യമാസ്ഥിതമ് ॥ 2 ॥
വീര്യഹീനമിവാശക്തം ക്ഷത്രധര്മേണ ഭാര്ഗവ ।
അവജാനാസി മേ തേജഃ പശ്യ മേഽദ്യ പരാക്രമമ് ॥ 3 ॥
ഇത്യുക്ത്വാ രാഘവഃ ക്രുദ്ധോ ഭാര്ഗവസ്യ ശരാസനമ് ।
ശരം ച പ്രതിജഗ്രാഹ ഹസ്താല്ലഘുപരാക്രമഃ ॥ 4 ॥
ആരോപ്യ സ ധനൂ രാമ ശ്ശരം സജ്യം ചകാര ഹ ।
ജാമദഗ്ന്യം തതോ രാമം രാമഃ ക്രുദ്ധോഽബ്രവീദ്വചഃ ॥ 5 ॥
ബ്രാഹ്മണോഽസീതി പൂജ്യോ മേ വിശ്വാമിത്രകൃതേന ച ।
തസ്മാച്ഛക്തോ ന തേ രാമ മോക്തും പ്രാണഹരം ശരമ് ॥ 6 ॥
ഇമാം പാദഗതിം രാമ തപോബലസമാര്ജിതാമ് ।
ലോകാനപ്രതിമാന്വാ തേ ഹനിഷ്യാമി യദിച്ഛസി ॥ 7 ॥
ന ഹ്യയം വൈഷ്ണവോ ദിവ്യ ശ്ശരഃ പരപുരംജയഃ ।
മോഘഃ പതതി വീര്യേണ ബലദര്പവിനാശനഃ ॥ 8 ॥
വരായുധധരം രാമം ദ്രഷ്ടും സര്ഷിഗണാ സ്സുരാഃ ।
പിതാമഹം പുരസ്കൃത്യ സമേതാസ്തത്ര സംഘശഃ ॥ 9 ॥
ഗംധർവാപ്സരസശ്ചൈവ സിദ്ധചാരണകിന്നരാഃ ।
യക്ഷരാക്ഷസനാഗാശ്ച തദ്ദ്രഷ്ടും മഹദദ്ഭുതമ് ॥ 10 ॥
ജഡീകൃതേ തദാഽലോകേ രാമേ വരധനുര്ധരേ ।
നിർവീര്യോ ജാമദഗ്ന്യോഽസൌ രാമോ രാമമുദൈക്ഷത ॥ 11 ॥
തേജോഭിഹതവീര്യത്വാജ്ജാമദഗ്ന്യോ ജഡീകൃതഃ ।
രാമം കമലപത്രാക്ഷം മംദം മംദമുവാച ഹ ॥ 12 ॥
കാശ്യപായ മയാ ദത്താ യദാ പൂർവം വസുംധരാ ।
വിഷയേ മേ ന വസ്തവ്യമിതി മാം കാശ്യപോഽബ്രവീത് ॥ 13 ॥
സോഽഹം ഗുരുവചഃ കുർവന് പൃഥിവ്യാം ന വസേ നിശാമ് ।
കൃതാ പ്രതിജ്ഞാ കാകുത്സ്ഥ കൃതാ ഭൂഃ കാശ്യപസ്യ ഹി ॥ 14 ॥
തദിമാം ത്വം ഗതിം വീര ഹംതും നാര്ഹസി രാഘവ ।
മനോജവം ഗമിഷ്യാമി മഹേംദ്രം പർവതോത്തമമ് ॥ 15 ॥
ലോകാസ്ത്വപ്രതിമാ രാമ നിര്ജിതാസ്തപസാ മയാ ।
ജഹി താന് ശരമുഖ്യേന മാ ഭൂത്കാലസ്യ പര്യയഃ ॥ 16 ॥
അക്ഷയ്യം മധുഹംതാരം ജാനാമി ത്വാം സുരേശ്വരമ് ।
ധനുഷോഽസ്യ പരാമര്ശാത് സ്വസ്തി തേഽസ്തു പരംതപ ॥ 17 ॥
ഏതേ സുരഗണാസ്സർവേ നിരീക്ഷംതേ സമാഗതാഃ ।
ത്വാമപ്രതിമകര്മാണമപ്രതിദ്വംദ്വമാഹവേ ॥ 18 ॥
ന ചേയം മമ കാകുത്സ്ഥ വ്രീഡാ ഭവിതുമര്ഹതി ।
ത്വയാ ത്രൈലോക്യനാഥേന യദഹം വിമുഖീകൃതഃ ॥ 19 ॥
ശരമപ്രതിമം രാമ മോക്തുമര്ഹസി സുവ്രത ।
ശരമോക്ഷേ ഗമിഷ്യാമി മഹേംദ്രം പർവതോത്തമമ് ॥ 20 ॥
തഥാ ബ്രുവതി രാമേ തു ജാമദഗ്നയേ പ്രതാപവാന് ।
രാമോ ദാശരഥി ശ്ശ്രീമാന് ചിക്ഷേപ ശരമുത്തമമ് ॥ 21 ॥
സ ഹതാന് ദൃശ്യ രാമേണ സ്വാംല്ലോകാംസ്തപസാര്ജിതാന് ।
ജാമദഗ്ന്യോ ജഗാമാശു മഹേംദ്രം പർവതോത്തമമ് ॥ 22 ॥
തതോ വിതിമിരാസ്സർവാ ദിശശ്ചോപദിശസ്തഥാ ।
സുരാ സ്സര്ഷിഗണാ രാമം പ്രശശംസുരുദായുധമ് ॥ 23 ॥
രാമം ദാശരഥിം രാമോ ജാമദഗ്ന്യഃ പ്രശസ്യ ച ।
തതഃ പ്രദക്ഷിണീ കൃത്യ ജഗാമാത്മഗതിം പ്രഭുഃ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷട്സപ്തതിതമസ്സര്ഗഃ ॥
