శ్రీమద్వాల్మీకీయ రామాయణే బాలకాండమ్ ।
అథ షట్సప్తతితమస్సర్గః ।
శ్రుత్వా తజ్జామదగ్న్యస్య వాక్యం దాశరథిస్తదా ।
గౌరవాద్యంంత్రితకథః పితూ రామమథాబ్రవీత్ ॥ 1 ॥
శ్రుతవానస్మి యత్కర్మ కృతవానసి భార్గవ ।
అనురుంధ్యామహే బ్రహ్మన్ పితురానృణ్యమాస్థితమ్ ॥ 2 ॥
వీర్యహీనమివాశక్తం క్షత్రధర్మేణ భార్గవ ।
అవజానాసి మే తేజః పశ్య మేఽద్య పరాక్రమమ్ ॥ 3 ॥
ఇత్యుక్త్వా రాఘవః క్రుద్ధో భార్గవస్య శరాసనమ్ ।
శరం చ ప్రతిజగ్రాహ హస్తాల్లఘుపరాక్రమః ॥ 4 ॥
ఆరోప్య స ధనూ రామ శ్శరం సజ్యం చకార హ ।
జామదగ్న్యం తతో రామం రామః క్రుద్ధోఽబ్రవీద్వచః ॥ 5 ॥
బ్రాహ్మణోఽసీతి పూజ్యో మే విశ్వామిత్రకృతేన చ ।
తస్మాచ్ఛక్తో న తే రామ మోక్తుం ప్రాణహరం శరమ్ ॥ 6 ॥
ఇమాం పాదగతిం రామ తపోబలసమార్జితామ్ ।
లోకానప్రతిమాన్వా తే హనిష్యామి యదిచ్ఛసి ॥ 7 ॥
న హ్యయం వైష్ణవో దివ్య శ్శరః పరపురంజయః ।
మోఘః పతతి వీర్యేణ బలదర్పవినాశనః ॥ 8 ॥
వరాయుధధరం రామం ద్రష్టుం సర్షిగణా స్సురాః ।
పితామహం పురస్కృత్య సమేతాస్తత్ర సంఘశః ॥ 9 ॥
గంధర్వాప్సరసశ్చైవ సిద్ధచారణకిన్నరాః ।
యక్షరాక్షసనాగాశ్చ తద్ద్రష్టుం మహదద్భుతమ్ ॥ 10 ॥
జడీకృతే తదాఽలోకే రామే వరధనుర్ధరే ।
నిర్వీర్యో జామదగ్న్యోఽసౌ రామో రామముదైక్షత ॥ 11 ॥
తేజోభిహతవీర్యత్వాజ్జామదగ్న్యో జడీకృతః ।
రామం కమలపత్రాక్షం మందం మందమువాచ హ ॥ 12 ॥
కాశ్యపాయ మయా దత్తా యదా పూర్వం వసుంధరా ।
విషయే మే న వస్తవ్యమితి మాం కాశ్యపోఽబ్రవీత్ ॥ 13 ॥
సోఽహం గురువచః కుర్వన్ పృథివ్యాం న వసే నిశామ్ ।
కృతా ప్రతిజ్ఞా కాకుత్స్థ కృతా భూః కాశ్యపస్య హి ॥ 14 ॥
తదిమాం త్వం గతిం వీర హంతుం నార్హసి రాఘవ ।
మనోజవం గమిష్యామి మహేంద్రం పర్వతోత్తమమ్ ॥ 15 ॥
లోకాస్త్వప్రతిమా రామ నిర్జితాస్తపసా మయా ।
జహి తాన్ శరముఖ్యేన మా భూత్కాలస్య పర్యయః ॥ 16 ॥
అక్షయ్యం మధుహంతారం జానామి త్వాం సురేశ్వరమ్ ।
ధనుషోఽస్య పరామర్శాత్ స్వస్తి తేఽస్తు పరంతప ॥ 17 ॥
ఏతే సురగణాస్సర్వే నిరీక్షంతే సమాగతాః ।
త్వామప్రతిమకర్మాణమప్రతిద్వంద్వమాహవే ॥ 18 ॥
న చేయం మమ కాకుత్స్థ వ్రీడా భవితుమర్హతి ।
త్వయా త్రైలోక్యనాథేన యదహం విముఖీకృతః ॥ 19 ॥
శరమప్రతిమం రామ మోక్తుమర్హసి సువ్రత ।
శరమోక్షే గమిష్యామి మహేంద్రం పర్వతోత్తమమ్ ॥ 20 ॥
తథా బ్రువతి రామే తు జామదగ్నయే ప్రతాపవాన్ ।
రామో దాశరథి శ్శ్రీమాన్ చిక్షేప శరముత్తమమ్ ॥ 21 ॥
స హతాన్ దృశ్య రామేణ స్వాంల్లోకాంస్తపసార్జితాన్ ।
జామదగ్న్యో జగామాశు మహేంద్రం పర్వతోత్తమమ్ ॥ 22 ॥
తతో వితిమిరాస్సర్వా దిశశ్చోపదిశస్తథా ।
సురా స్సర్షిగణా రామం ప్రశశంసురుదాయుధమ్ ॥ 23 ॥
రామం దాశరథిం రామో జామదగ్న్యః ప్రశస్య చ ।
తతః ప్రదక్షిణీ కృత్య జగామాత్మగతిం ప్రభుః ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే షట్సప్తతితమస్సర్గః ॥
