શ્રીમદ્વાલ્મીકીય રામાયણે બાલકાંડમ્ ।
અથ ષટ્સપ્તતિતમસ્સર્ગઃ ।
શ્રુત્વા તજ્જામદગ્ન્યસ્ય વાક્યં દાશરથિસ્તદા ।
ગૌરવાદ્યંંત્રિતકથઃ પિતૂ રામમથાબ્રવીત્ ॥ 1 ॥
શ્રુતવાનસ્મિ યત્કર્મ કૃતવાનસિ ભાર્ગવ ।
અનુરુંધ્યામહે બ્રહ્મન્ પિતુરાનૃણ્યમાસ્થિતમ્ ॥ 2 ॥
વીર્યહીનમિવાશક્તં ક્ષત્રધર્મેણ ભાર્ગવ ।
અવજાનાસિ મે તેજઃ પશ્ય મેઽદ્ય પરાક્રમમ્ ॥ 3 ॥
ઇત્યુક્ત્વા રાઘવઃ ક્રુદ્ધો ભાર્ગવસ્ય શરાસનમ્ ।
શરં ચ પ્રતિજગ્રાહ હસ્તાલ્લઘુપરાક્રમઃ ॥ 4 ॥
આરોપ્ય સ ધનૂ રામ શ્શરં સજ્યં ચકાર હ ।
જામદગ્ન્યં તતો રામં રામઃ ક્રુદ્ધોઽબ્રવીદ્વચઃ ॥ 5 ॥
બ્રાહ્મણોઽસીતિ પૂજ્યો મે વિશ્વામિત્રકૃતેન ચ ।
તસ્માચ્છક્તો ન તે રામ મોક્તું પ્રાણહરં શરમ્ ॥ 6 ॥
ઇમાં પાદગતિં રામ તપોબલસમાર્જિતામ્ ।
લોકાનપ્રતિમાન્વા તે હનિષ્યામિ યદિચ્છસિ ॥ 7 ॥
ન હ્યયં વૈષ્ણવો દિવ્ય શ્શરઃ પરપુરંજયઃ ।
મોઘઃ પતતિ વીર્યેણ બલદર્પવિનાશનઃ ॥ 8 ॥
વરાયુધધરં રામં દ્રષ્ટું સર્ષિગણા સ્સુરાઃ ।
પિતામહં પુરસ્કૃત્ય સમેતાસ્તત્ર સંઘશઃ ॥ 9 ॥
ગંધર્વાપ્સરસશ્ચૈવ સિદ્ધચારણકિન્નરાઃ ।
યક્ષરાક્ષસનાગાશ્ચ તદ્દ્રષ્ટું મહદદ્ભુતમ્ ॥ 10 ॥
જડીકૃતે તદાઽલોકે રામે વરધનુર્ધરે ।
નિર્વીર્યો જામદગ્ન્યોઽસૌ રામો રામમુદૈક્ષત ॥ 11 ॥
તેજોભિહતવીર્યત્વાજ્જામદગ્ન્યો જડીકૃતઃ ।
રામં કમલપત્રાક્ષં મંદં મંદમુવાચ હ ॥ 12 ॥
કાશ્યપાય મયા દત્તા યદા પૂર્વં વસુંધરા ।
વિષયે મે ન વસ્તવ્યમિતિ માં કાશ્યપોઽબ્રવીત્ ॥ 13 ॥
સોઽહં ગુરુવચઃ કુર્વન્ પૃથિવ્યાં ન વસે નિશામ્ ।
કૃતા પ્રતિજ્ઞા કાકુત્સ્થ કૃતા ભૂઃ કાશ્યપસ્ય હિ ॥ 14 ॥
તદિમાં ત્વં ગતિં વીર હંતું નાર્હસિ રાઘવ ।
મનોજવં ગમિષ્યામિ મહેંદ્રં પર્વતોત્તમમ્ ॥ 15 ॥
લોકાસ્ત્વપ્રતિમા રામ નિર્જિતાસ્તપસા મયા ।
જહિ તાન્ શરમુખ્યેન મા ભૂત્કાલસ્ય પર્યયઃ ॥ 16 ॥
અક્ષય્યં મધુહંતારં જાનામિ ત્વાં સુરેશ્વરમ્ ।
ધનુષોઽસ્ય પરામર્શાત્ સ્વસ્તિ તેઽસ્તુ પરંતપ ॥ 17 ॥
એતે સુરગણાસ્સર્વે નિરીક્ષંતે સમાગતાઃ ।
ત્વામપ્રતિમકર્માણમપ્રતિદ્વંદ્વમાહવે ॥ 18 ॥
ન ચેયં મમ કાકુત્સ્થ વ્રીડા ભવિતુમર્હતિ ।
ત્વયા ત્રૈલોક્યનાથેન યદહં વિમુખીકૃતઃ ॥ 19 ॥
શરમપ્રતિમં રામ મોક્તુમર્હસિ સુવ્રત ।
શરમોક્ષે ગમિષ્યામિ મહેંદ્રં પર્વતોત્તમમ્ ॥ 20 ॥
તથા બ્રુવતિ રામે તુ જામદગ્નયે પ્રતાપવાન્ ।
રામો દાશરથિ શ્શ્રીમાન્ ચિક્ષેપ શરમુત્તમમ્ ॥ 21 ॥
સ હતાન્ દૃશ્ય રામેણ સ્વાંલ્લોકાંસ્તપસાર્જિતાન્ ।
જામદગ્ન્યો જગામાશુ મહેંદ્રં પર્વતોત્તમમ્ ॥ 22 ॥
તતો વિતિમિરાસ્સર્વા દિશશ્ચોપદિશસ્તથા ।
સુરા સ્સર્ષિગણા રામં પ્રશશંસુરુદાયુધમ્ ॥ 23 ॥
રામં દાશરથિં રામો જામદગ્ન્યઃ પ્રશસ્ય ચ ।
તતઃ પ્રદક્ષિણી કૃત્ય જગામાત્મગતિં પ્રભુઃ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ષટ્સપ્તતિતમસ્સર્ગઃ ॥
