śrīmadvālmīkīya rāmāyaṇē bālakāṇḍam ।
atha triṣaṣṭitamassargaḥ ।
pūrṇē varṣasahasrē tu vratasnātaṃ mahāmunim ।
abhyāgachChan surāssarvē tapaḥ phalachikīrṣavaḥ ॥ 1 ॥
abravītsumahātējā brahmā suruchiraṃ vachaḥ ।
ṛṣistvamasi bhadraṃ tē svārjitaiḥ karmabhiśśubhaiḥ ॥ 2 ॥
tamēvamuktvā dēvēśastridivaṃ punarabhyagāt ।
viśvāmitrō mahātējā bhūyastēpē mahattapaḥ ॥ 3 ॥
tataḥ kālēna mahatā mēnakā paramā'psarāḥ ।
puṣkarēṣu naraśrēṣṭha snātuṃ samupachakramē ॥ 4 ॥
tāṃ dadarśa mahātējā mēnakāṃ kuśikātmajaḥ ।
rūpēṇāpratimāṃ tatra vidyutaṃ jaladē yathā ॥ 5 ॥
dṛṣṭvā kandarpavaśagō munistāmidamabravīt ।
apsarassvāgataṃ tē'stu vasa chēha mamāśramē ॥ 6 ॥
anugṛhṇīṣva bhadraṃ tē madanēna sumōhitam ।
ityuktā sā varārōhā tatra vāsamathākarōt ॥ 7 ॥
tasyāṃ vasantyāṃ varṣāṇi pañcha pañcha cha rāghava ।
viśvāmitrāśramē rāma sukhēna vyatichakramuḥ ॥ 8 ॥
atha kālē gatē tasminviśvāmitrō mahāmuniḥ ।
savrīḍa iva samvṛttaśchintāśōkaparāyaṇaḥ ॥ 9 ॥
buddhirmunēssamutpannā sāmarṣā raghunandana ।
sarvaṃ surāṇāṃ karmaitattapōpaharaṇaṃ mahat ॥ 10 ॥
ahōrātrāpadēśēna gatāssaṃvatsarā daśa ।
kāmamōhābhibhūtasya vighnō'yaṃ samupasthitaḥ ॥ 11 ॥
viniśśvasanmunivaraḥ paśchāttāpēna duḥkhitaḥ ।
bhītāmapsarasaṃ dṛṣṭvā vēpantīṃ prāñjaliṃ sthitām ॥ 12 ॥
mēnakāṃ madhurairvākyairvisṛjya kuśikātmajaḥ ।
uttaraṃ parvataṃ rāma viśvāmitrō jagāma ha ॥ 13 ॥
sa kṛtvā naiṣṭhikīṃ buddhiṃ jētukāmō mahāyaśāḥ ।
kauśikītīramāsādya tapastēpē sudāruṇam ॥ 14 ॥
tasya varṣasahasraṃ tu ghōraṃ tapa upāsataḥ ।
uttarē parvatē rāma dēvatānāmabhūdbhayam ॥ 15 ॥
āmantrayan samāgamya sarvē sarṣigaṇā ssurāḥ ।
maharṣiśabdaṃ labhatāṃ sādhvayaṃ kuśikātmajaḥ ॥ 16 ॥
dēvatānāṃ vacha śśṛtvā sarvalōkapitāmahaḥ ।
abravīnmadhuraṃ vākyaṃ viśvāmitraṃ tapōdhanam ॥ 17 ॥
maharṣē svāgataṃ vatsa tapasōgrēṇa tōṣitaḥ ।
mahattvamṛṣimukhyatvaṃ dadāmi tava kauśika ॥ 18 ॥
brahmaṇassa vachaśśrutvā sarvalōkēśvarasya ha ।
na viṣaṇṇō na santuṣṭō viśvāmitrastapōdhanaḥ ॥ 19 ॥
prāñjaliḥ praṇatō bhūtvā sarvalōkapitāmaham ।
pratyuvācha tatō vāchaṃ viśvāmitrō mahāmuniḥ ॥ 20 ॥
maharṣiśabdamatulaṃ svārjitaiḥ karmabhiśśubhaiḥ ।
yadi mē bhagavānāha tatō'haṃ vijitēndriyaḥ ॥ 21 ॥
tamuvācha tatō brahmā na tāvat ttvaṃ jitēndriyaḥ ।
yatasva muniśārdūla ityuktvā tridivaṃ gataḥ ॥ 22 ॥
viprasthitēṣu dēvēṣu viśvāmitrō mahāmuniḥ ।
ūrdhvabāhurnirālambō vāyubhakṣastapaścharan ॥ 23 ॥
gharmē pañchatapā bhūtvā varṣāsvākāśasaṃśrayaḥ ।
śiśirē salilasthāyī rātryahāni tapōdhanaḥ ॥ 24 ॥
ēvaṃ varṣasahasraṃ hi tapō ghōramupāgamat ।
tasmin santapyamānē tu viśvāmitrē mahāmunau ॥ 25 ॥
sambhramassumahānāsītsurāṇāṃ vāsavasya cha ।
rambhāmapsarasaṃ śakra ssaha sarvairmarudgaṇaiḥ ।
uvāchātmahitaṃ vākyamahitaṃ kauśikasya cha ॥ 26 ॥
ityārṣē śrīmadrāmāyaṇē vālmīkīya ādikāvyē bālakāṇḍē triṣaṣṭitamassargaḥ ॥
