ශ්රීමද්වාල්මීකීය රාමායණේ බාලකාංඩම් ।
අථ ත්රිෂෂ්ටිතමස්සර්ගඃ ।
පූර්ණේ වර්ෂසහස්රේ තු ව්රතස්නාතං මහාමුනිම් ।
අභ්යාගච්ඡන් සුරාස්සර්වේ තපඃ ඵලචිකීර්ෂවඃ ॥ 1 ॥
අබ්රවීත්සුමහාතේජා බ්රහ්මා සුරුචිරං වචඃ ।
ඍෂිස්ත්වමසි භද්රං තේ ස්වාර්ජිතෛඃ කර්මභිශ්ශුභෛඃ ॥ 2 ॥
තමේවමුක්ත්වා දේවේශස්ත්රිදිවං පුනරභ්යගාත් ।
විශ්වාමිත්රෝ මහාතේජා භූයස්තේපේ මහත්තපඃ ॥ 3 ॥
තතඃ කාලේන මහතා මේනකා පරමාऽප්සරාඃ ।
පුෂ්කරේෂු නරශ්රේෂ්ඨ ස්නාතුං සමුපචක්රමේ ॥ 4 ॥
තාං දදර්ශ මහාතේජා මේනකාං කුශිකාත්මජඃ ।
රූපේණාප්රතිමාං තත්ර විද්යුතං ජලදේ යථා ॥ 5 ॥
දෘෂ්ට්වා කංදර්පවශගෝ මුනිස්තාමිදමබ්රවීත් ।
අප්සරස්ස්වාගතං තේऽස්තු වස චේහ මමාශ්රමේ ॥ 6 ॥
අනුගෘහ්ණීෂ්ව භද්රං තේ මදනේන සුමෝහිතම් ।
ඉත්යුක්තා සා වරාරෝහා තත්ර වාසමථාකරෝත් ॥ 7 ॥
තස්යාං වසංත්යාං වර්ෂාණි පංච පංච ච රාඝව ।
විශ්වාමිත්රාශ්රමේ රාම සුඛේන ව්යතිචක්රමුඃ ॥ 8 ॥
අථ කාලේ ගතේ තස්මින්විශ්වාමිත්රෝ මහාමුනිඃ ।
සව්රීඩ ඉව සම්වෘත්තශ්චිංතාශෝකපරායණඃ ॥ 9 ॥
බුද්ධිර්මුනේස්සමුත්පන්නා සාමර්ෂා රඝුනංදන ।
සර්වං සුරාණාං කර්මෛතත්තපෝපහරණං මහත් ॥ 10 ॥
අහෝරාත්රාපදේශේන ගතාස්සංවත්සරා දශ ।
කාමමෝහාභිභූතස්ය විඝ්නෝऽයං සමුපස්ථිතඃ ॥ 11 ॥
විනිශ්ශ්වසන්මුනිවරඃ පශ්චාත්තාපේන දුඃඛිතඃ ।
භීතාමප්සරසං දෘෂ්ට්වා වේපංතීං ප්රාංජලිං ස්ථිතාම් ॥ 12 ॥
මේනකාං මධුරෛර්වාක්යෛර්විසෘජ්ය කුශිකාත්මජඃ ।
උත්තරං පර්වතං රාම විශ්වාමිත්රෝ ජගාම හ ॥ 13 ॥
ස කෘත්වා නෛෂ්ඨිකීං බුද්ධිං ජේතුකාමෝ මහායශාඃ ।
කෞශිකීතීරමාසාද්ය තපස්තේපේ සුදාරුණම් ॥ 14 ॥
තස්ය වර්ෂසහස්රං තු ඝෝරං තප උපාසතඃ ।
උත්තරේ පර්වතේ රාම දේවතානාමභූද්භයම් ॥ 15 ॥
ආමංත්රයන් සමාගම්ය සර්වේ සර්ෂිගණා ස්සුරාඃ ।
මහර්ෂිශබ්දං ලභතාං සාධ්වයං කුශිකාත්මජඃ ॥ 16 ॥
දේවතානාං වච ශ්ශෘත්වා සර්වලෝකපිතාමහඃ ।
අබ්රවීන්මධුරං වාක්යං විශ්වාමිත්රං තපෝධනම් ॥ 17 ॥
මහර්ෂේ ස්වාගතං වත්ස තපසෝග්රේණ තෝෂිතඃ ।
මහත්ත්වමෘෂිමුඛ්යත්වං දදාමි තව කෞශික ॥ 18 ॥
බ්රහ්මණස්ස වචශ්ශ්රුත්වා සර්වලෝකේශ්වරස්ය හ ।
න විෂණ්ණෝ න සංතුෂ්ටෝ විශ්වාමිත්රස්තපෝධනඃ ॥ 19 ॥
ප්රාංජලිඃ ප්රණතෝ භූත්වා සර්වලෝකපිතාමහම් ।
ප්රත්යුවාච තතෝ වාචං විශ්වාමිත්රෝ මහාමුනිඃ ॥ 20 ॥
මහර්ෂිශබ්දමතුලං ස්වාර්ජිතෛඃ කර්මභිශ්ශුභෛඃ ।
යදි මේ භගවානාහ තතෝऽහං විජිතේංද්රියඃ ॥ 21 ॥
තමුවාච තතෝ බ්රහ්මා න තාවත් ත්ත්වං ජිතේංද්රියඃ ।
යතස්ව මුනිශාර්දූල ඉත්යුක්ත්වා ත්රිදිවං ගතඃ ॥ 22 ॥
විප්රස්ථිතේෂු දේවේෂු විශ්වාමිත්රෝ මහාමුනිඃ ।
ඌර්ධ්වබාහුර්නිරාලංබෝ වායුභක්ෂස්තපශ්චරන් ॥ 23 ॥
ඝර්මේ පංචතපා භූත්වා වර්ෂාස්වාකාශසංශ්රයඃ ।
ශිශිරේ සලිලස්ථායී රාත්ර්යහානි තපෝධනඃ ॥ 24 ॥
ඒවං වර්ෂසහස්රං හි තපෝ ඝෝරමුපාගමත් ।
තස්මින් සංතප්යමානේ තු විශ්වාමිත්රේ මහාමුනෞ ॥ 25 ॥
සංභ්රමස්සුමහානාසීත්සුරාණාං වාසවස්ය ච ।
රංභාමප්සරසං ශක්ර ස්සහ සර්වෛර්මරුද්ගණෛඃ ।
උවාචාත්මහිතං වාක්යමහිතං කෞශිකස්ය ච ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ත්රිෂෂ්ටිතමස්සර්ගඃ ॥
