ശ്രീമദ്വാല്മീകീയ രാമായണേ ബാലകാംഡമ് ।
അഥ ത്രിഷഷ്ടിതമസ്സര്ഗഃ ।
പൂര്ണേ വര്ഷസഹസ്രേ തു വ്രതസ്നാതം മഹാമുനിമ് ।
അഭ്യാഗച്ഛന് സുരാസ്സർവേ തപഃ ഫലചികീര്ഷവഃ ॥ 1 ॥
അബ്രവീത്സുമഹാതേജാ ബ്രഹ്മാ സുരുചിരം വചഃ ।
ഋഷിസ്ത്വമസി ഭദ്രം തേ സ്വാര്ജിതൈഃ കര്മഭിശ്ശുഭൈഃ ॥ 2 ॥
തമേവമുക്ത്വാ ദേവേശസ്ത്രിദിവം പുനരഭ്യഗാത് ।
വിശ്വാമിത്രോ മഹാതേജാ ഭൂയസ്തേപേ മഹത്തപഃ ॥ 3 ॥
തതഃ കാലേന മഹതാ മേനകാ പരമാഽപ്സരാഃ ।
പുഷ്കരേഷു നരശ്രേഷ്ഠ സ്നാതും സമുപചക്രമേ ॥ 4 ॥
താം ദദര്ശ മഹാതേജാ മേനകാം കുശികാത്മജഃ ।
രൂപേണാപ്രതിമാം തത്ര വിദ്യുതം ജലദേ യഥാ ॥ 5 ॥
ദൃഷ്ട്വാ കംദര്പവശഗോ മുനിസ്താമിദമബ്രവീത് ।
അപ്സരസ്സ്വാഗതം തേഽസ്തു വസ ചേഹ മമാശ്രമേ ॥ 6 ॥
അനുഗൃഹ്ണീഷ്വ ഭദ്രം തേ മദനേന സുമോഹിതമ് ।
ഇത്യുക്താ സാ വരാരോഹാ തത്ര വാസമഥാകരോത് ॥ 7 ॥
തസ്യാം വസംത്യാം വര്ഷാണി പംച പംച ച രാഘവ ।
വിശ്വാമിത്രാശ്രമേ രാമ സുഖേന വ്യതിചക്രമുഃ ॥ 8 ॥
അഥ കാലേ ഗതേ തസ്മിന്വിശ്വാമിത്രോ മഹാമുനിഃ ।
സവ്രീഡ ഇവ സമ്വൃത്തശ്ചിംതാശോകപരായണഃ ॥ 9 ॥
ബുദ്ധിര്മുനേസ്സമുത്പന്നാ സാമര്ഷാ രഘുനംദന ।
സർവം സുരാണാം കര്മൈതത്തപോപഹരണം മഹത് ॥ 10 ॥
അഹോരാത്രാപദേശേന ഗതാസ്സംവത്സരാ ദശ ।
കാമമോഹാഭിഭൂതസ്യ വിഘ്നോഽയം സമുപസ്ഥിതഃ ॥ 11 ॥
വിനിശ്ശ്വസന്മുനിവരഃ പശ്ചാത്താപേന ദുഃഖിതഃ ।
ഭീതാമപ്സരസം ദൃഷ്ട്വാ വേപംതീം പ്രാംജലിം സ്ഥിതാമ് ॥ 12 ॥
മേനകാം മധുരൈർവാക്യൈർവിസൃജ്യ കുശികാത്മജഃ ।
ഉത്തരം പർവതം രാമ വിശ്വാമിത്രോ ജഗാമ ഹ ॥ 13 ॥
സ കൃത്വാ നൈഷ്ഠികീം ബുദ്ധിം ജേതുകാമോ മഹായശാഃ ।
കൌശികീതീരമാസാദ്യ തപസ്തേപേ സുദാരുണമ് ॥ 14 ॥
തസ്യ വര്ഷസഹസ്രം തു ഘോരം തപ ഉപാസതഃ ।
ഉത്തരേ പർവതേ രാമ ദേവതാനാമഭൂദ്ഭയമ് ॥ 15 ॥
ആമംത്രയന് സമാഗമ്യ സർവേ സര്ഷിഗണാ സ്സുരാഃ ।
മഹര്ഷിശബ്ദം ലഭതാം സാധ്വയം കുശികാത്മജഃ ॥ 16 ॥
ദേവതാനാം വച ശ്ശൃത്വാ സർവലോകപിതാമഹഃ ।
അബ്രവീന്മധുരം വാക്യം വിശ്വാമിത്രം തപോധനമ് ॥ 17 ॥
മഹര്ഷേ സ്വാഗതം വത്സ തപസോഗ്രേണ തോഷിതഃ ।
മഹത്ത്വമൃഷിമുഖ്യത്വം ദദാമി തവ കൌശിക ॥ 18 ॥
ബ്രഹ്മണസ്സ വചശ്ശ്രുത്വാ സർവലോകേശ്വരസ്യ ഹ ।
ന വിഷണ്ണോ ന സംതുഷ്ടോ വിശ്വാമിത്രസ്തപോധനഃ ॥ 19 ॥
പ്രാംജലിഃ പ്രണതോ ഭൂത്വാ സർവലോകപിതാമഹമ് ।
പ്രത്യുവാച തതോ വാചം വിശ്വാമിത്രോ മഹാമുനിഃ ॥ 20 ॥
മഹര്ഷിശബ്ദമതുലം സ്വാര്ജിതൈഃ കര്മഭിശ്ശുഭൈഃ ।
യദി മേ ഭഗവാനാഹ തതോഽഹം വിജിതേംദ്രിയഃ ॥ 21 ॥
തമുവാച തതോ ബ്രഹ്മാ ന താവത് ത്ത്വം ജിതേംദ്രിയഃ ।
യതസ്വ മുനിശാര്ദൂല ഇത്യുക്ത്വാ ത്രിദിവം ഗതഃ ॥ 22 ॥
വിപ്രസ്ഥിതേഷു ദേവേഷു വിശ്വാമിത്രോ മഹാമുനിഃ ।
ഊര്ധ്വബാഹുര്നിരാലംബോ വായുഭക്ഷസ്തപശ്ചരന് ॥ 23 ॥
ഘര്മേ പംചതപാ ഭൂത്വാ വര്ഷാസ്വാകാശസംശ്രയഃ ।
ശിശിരേ സലിലസ്ഥായീ രാത്ര്യഹാനി തപോധനഃ ॥ 24 ॥
ഏവം വര്ഷസഹസ്രം ഹി തപോ ഘോരമുപാഗമത് ।
തസ്മിന് സംതപ്യമാനേ തു വിശ്വാമിത്രേ മഹാമുനൌ ॥ 25 ॥
സംഭ്രമസ്സുമഹാനാസീത്സുരാണാം വാസവസ്യ ച ।
രംഭാമപ്സരസം ശക്ര സ്സഹ സർവൈര്മരുദ്ഗണൈഃ ।
ഉവാചാത്മഹിതം വാക്യമഹിതം കൌശികസ്യ ച ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ത്രിഷഷ്ടിതമസ്സര്ഗഃ ॥
