ശ്രീമദ്വാല്മീകീയ രാമായണേ ബാലകാംഡമ് ।
അഥ ത്രിസപ്തതിതമസ്സര്ഗഃ ।
യസ്മിംസ്തു ദിവസേ രാജാ ചക്രേ ഗോദാനമുത്തമമ് ।
തസ്മിം സ്തു ദിവസേ ശൂരോ യുധാജിത്സമുപേയിവാന് ॥ 1 ॥
പുത്രഃ കേകയരാജസ്യ സാക്ഷാദ്ഭരതമാതുലഃ ।
ദൃഷ്ട്വാ പൃഷ്ട്വാ ച കുശലം രാജാനമിദമബ്രവീത് ॥ 2 ॥
കേകയാധിപതീ രാജാ സ്നേഹാത് കുശലമബ്രവീത് ।
യേഷാം കുശലകാമോഽസി തേഷാം സംപ്രത്യനാമയമ് ॥ 3 ॥
സ്വസ്രീയം മമ രാജേംദ്ര ദ്രഷ്ടുകാമോ മഹീപതിഃ ।
തദര്ഥമുപയാതോഽഹമയോധ്യാം രഘുനംദന ॥ 4 ॥
ശ്രുത്വാ ത്വഹമയോധ്യായാം വിവാഹാര്ഥം തവാത്മജാന് ।
മിഥിലാമുപയാതാംസ്തു ത്വയാ സഹ മഹീപതേ ॥ 5 ॥
ത്വരയാഭ്യുപയാതോഽഹം ദ്രഷ്ടുകാമ സ്സ്വസുസ്സുതമ് ।
അഥ രാജാ ദശരഥഃ പ്രിയാതിഥിമുപസ്ഥിതമ് ॥ 6 ॥
ദൃഷ്ട്വാ പരമസത്കാരൈഃ പൂജാര്ഹം സമപൂജയത് ।
തതസ്താമുഷിതോ രാത്രിം സഹ പുത്രൈര്മഹാത്മഭിഃ ॥ 7 ॥
പ്രഭാതേ പുനരുത്ഥായ കൃത്വാ കര്മാണി കര്മവിത് ।
ഋഷീംസ്തദാ പുരസ്കൃത്യ യജ്ഞവാടമുപാഗമത് ॥ 8 ॥
യുക്തേ മുഹൂര്തേ വിജയേ സർവാഭരണഭൂഷിതൈഃ ।
ഭ്രാതൃഭിസ്സഹിതോ രാമഃ കൃതകൌതുകമംഗലഃ ॥ 9 ॥
വസിഷ്ഠം പുരതഃ കൃത്വാ മഹര്ഷീനപരാനപി ।
പിതു സ്സമീപമാശ്രിത്യ തസ്ഥൌ ഭ്രാതൃഭിരാവൃതഃ ॥ 10 ॥
വസിഷ്ഠോ ഭഗവാനേത്യ വൈദേഹമിദമബ്രവീത് ।
രാജാ ദശരഥോ രാജന് കൃതകൌതുകമംഗലൈഃ ॥ 11 ॥
പുത്രൈര്നരവര ശ്രേഷ്ഠ ദാതാരമഭികാംക്ഷതേ ।
ദാതൃപ്രതിഗ്രഹീതൃഭ്യാം സർവാര്ഥാഃ പ്രഭവംതി ഹി ॥ 12 ॥
സ്വധര്മം പ്രതിപദ്യസ്വ കൃത്വാ വൈവാഹ്യമുത്തമമ് ।
ഇത്യുക്തഃ പരമോദാരോ വസിഷ്ഠേന മഹാത്മനാ ॥ 13 ॥
പ്രത്യുവാച മഹാതേജാ വാക്യം പരമധര്മവിത് ।
കസ്സ്ഥിതഃ പ്രതിഹാരോ മേ കസ്യാജ്ഞാ സംപ്രതീക്ഷ്യതേ ॥ 14 ॥
സ്വഗൃഹേ കോ വിചാരോഽസ്തി യഥാ രാജ്യമിദം തവ ।
കൃതകൌതുകസർവസ്വാ വേദിമൂലമുപാഗതാഃ ॥ 15 ॥
മമ കന്യാ മുനിശ്രേഷ്ഠ ദീപ്താ വഹ്നേരിവാര്ചിഷഃ ।
സജ്ജോഽഹം ത്വത്പ്രതീക്ഷോഽസ്മി വേദ്യാമസ്യാം പ്രതിഷ്ഠിതഃ ॥ 16 ॥
അവിഘ്നം കുരുതാം രാജാ കിമര്ഥമവലംബതേ ।
തദ്വാക്യം ജനകേനോക്തം ശ്രുത്വാ ദശരഥസ്തദാ ।
പ്രവേശയാമാസ സുതാന് സർവാനൃഷിഗണാനപി ॥ 17 ॥
തതോ രാജാ വിദേഹാനാം വസിഷ്ഠമിദമബ്രവീത് ॥ 18 ॥
കാരയസ്വ ഋഷേ സർവമൃഷിഭിഃ സഹ ധാര്മിക ।
രാമസ്യ ലോകരാമസ്യ ക്രിയാം വൈവാഹികീം വിഭോ ॥ 19 ॥
തഥേത്യുക്ത്വാ തു ജനകം വസിഷ്ഠോ ഭഗവാനൃഷിഃ ।
വിശ്വാമിത്രം പുരസ്കൃത്യ ശതാനംദം ച ധാര്മികമ് ॥ 20 ॥
പ്രപാമധ്യേ തു വിധിവത്വേദിം കൃത്വാ മഹാതപാഃ ।
അലംചകാര താം വേദിം ഗംധപുഷ്പൈ സ്സമംതതഃ ॥ 21 ॥
സുവര്ണപാലികാഭിശ്ച ഛിദ്രകുംഭൈശ്ച സാംകുരൈഃ ।
അംകുരാഢ്യൈശ്ശരാവൈശ്ച ധൂപപാത്രൈ സ്സധൂപകൈഃ ॥ 22 ॥
ശംഖപാത്രൈ സ്സ്രുവൈ സ്സ്രുഗ്ഭിഃ പാത്രൈരര്ഘ്യാഭിപൂരിതൈഃ ।
ലാജപൂര്ണൈശ്ച പാത്രീഭിരക്ഷതൈരഭിസംസ്കൃതൈഃ ॥ 23 ॥
ദര്ഭൈസ്സമൈസ്സമാസ്തീര്യ വിധിവന്മംത്രപൂർവകമ് ।
അഗ്നിമാദായ വേദ്യാം തു വിധിമംത്രപുരസ്കൃതമ് ॥ 24 ॥
ജുഹാവാഗ്നൌ മഹാതേജാ വസിഷ്ഠോ ഭഗവാനൃഷിഃ ।
തതസ്സീതാം സമാനീയ സർവാഭരണഭൂഷിതാമ് ॥ 25 ॥
സമക്ഷമഗ്നേ സ്സംസ്ഥാപ്യ രാഘവാഭിമുഖേ തദാ ।
അബ്രവീജ്ജനകോ രാജാ കൌസല്യാനംദവര്ധനമ് ॥ 26 ॥
ഇയം സീതാ മമ സുതാ സഹധര്മചരീ തവ ।
പ്രതീച്ഛ ചൈനാം ഭദ്രം തേ പാണിം ഗൃഹ്ണീഷ്വ പാണിനാ ॥ 27 ॥
പതിവ്രതാ മഹാഭാഗാ ഛായേവാനുഗതാ സദാ ।
ഇത്യുക്ത്വാ പ്രാക്ഷിപദ്രാജാ മംത്രപൂതം ജലം തദാ ॥ 28 ॥
സാധു സാധ്വിതി ദേവാനാ മൃഷീണാം വദതാം തദാ ।
ദേവദുംദുഭിര്നിര്ഘോഷഃ പുഷ്പവര്ഷോ മഹാനഭൂത് ॥ 29 ॥
ഏവം ദത്ത്വാ തദാ സീതാം മംത്രോദകപുരസ്കൃതാമ് ।
അബ്രവീജ്ജനകോ രാജാ ഹര്ഷേണാഭിപരിപ്ലുതഃ ॥ 30 ॥
ലക്ഷ്മണാഗച്ഛ ഭദ്രം തേ ഊര്മിലാമുദ്യതാം മയാ ।
പ്രതീച്ഛ പാണിം ഗൃഹ്ണീഷ്വ മാഭൂത്കാലസ്യ പര്യയഃ ॥ 31 ॥
തമേവമുക്ത്വാ ജനകോ ഭരതം ചാഭ്യഭാഷത ।
ഗൃഹാണ പാണിം മാംഡവ്യാഃ പാണിനാ രഘുനംദന ॥ 32 ॥
ശത്രുഘ്നം ചാപി ധര്മാത്മാ അബ്രവീജ്ജനകേശ്വരഃ ।
ശ്രുതകീര്ത്യാ മഹാബാഹോ പാണിം ഗൃഹ്ണീഷ്വ പാണിനാ ॥ 33 ॥
സർവേ ഭവംതസ്സൌമ്യാശ്ച സർവേ സുചരിതവ്രതാഃ ।
പത്നീഭിസ്സംതു കാകുത്സ്ഥാ മാഭൂത്കാലസ്യ പര്യയഃ ॥ 34 ॥
ജനകസ്യ വച ശ്ശൃത്വാ പാണീന് പാണിഭിരാസ്പൃശന് ।
ചത്വാരസ്തേ ചതസൃണാം വസിഷ്ഠസ്യ മതേ സ്ഥിതാഃ ॥ 35 ॥
അഗ്നിം പ്രദക്ഷിണീകൃത്യ വേദിം രാജാനമേവ ച ।
ഋഷീംശ്ചൈവ മഹാത്മാനസ്സഭാര്യാ രഘുസത്തമാഃ ॥ 36 ॥
യഥോക്തേന തദാ ചക്രുർവിവാഹം വിധിപൂർവകമ് ।
കാകുത്സ്ഥൈശ്ച ഗൃഹീതേഷു ലലിതേഷു ച പാണിഷു ॥ 37 ॥
പുഷ്പവൃഷ്ടിര്മഹത്യാസീദംതരിക്ഷാത്സുഭാസ്വരാ ।
ദിവ്യദുംദുഭിനിര്ഘോഷൈര്ഗീതവാദിത്രനിസ്വനൈഃ ॥ 38 ॥
നനൃതുശ്ചാപ്സരസ്സംഘാ ഗംധർവാശ്ച ജഗുഃ കലമ് ।
വിവാഹേ രഘുമുഖ്യാനാം തദദ്ഭുതമദൃശ്യത ॥ 39 ॥
ഈദൃശേ വര്തമാനേ തു തൂര്യോദ്ഘുഷ്ടനിനാദിതേ ।
ത്രിരഗ്നിം തേ പരിക്രമ്യ ഊഹുര്ഭാര്യാം മഹൌജസഃ ॥ 40 ॥
അഥോപകാര്യാം ജഗ്മുസ്തേ സഭാര്യാ രഘുനംദനാഃ ।
രാജാഽപ്യനുയയൌ പശ്യംത്സര്ഷിസംഘ സ്സബാംധവഃ ॥ 41 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ത്രിസപ്തതിതമസ്സര്ഗഃ ॥
