ශ්රීමද්වාල්මීකීය රාමායණේ බාලකාංඩම් ।
අථ ත්රිසප්තතිතමස්සර්ගඃ ।
යස්මිංස්තු දිවසේ රාජා චක්රේ ගෝදානමුත්තමම් ।
තස්මිං ස්තු දිවසේ ශූරෝ යුධාජිත්සමුපේයිවාන් ॥ 1 ॥
පුත්රඃ කේකයරාජස්ය සාක්ෂාද්භරතමාතුලඃ ।
දෘෂ්ට්වා පෘෂ්ට්වා ච කුශලං රාජානමිදමබ්රවීත් ॥ 2 ॥
කේකයාධිපතී රාජා ස්නේහාත් කුශලමබ්රවීත් ।
යේෂාං කුශලකාමෝऽසි තේෂාං සංප්රත්යනාමයම් ॥ 3 ॥
ස්වස්රීයං මම රාජේංද්ර ද්රෂ්ටුකාමෝ මහීපතිඃ ।
තදර්ථමුපයාතෝऽහමයෝධ්යාං රඝුනංදන ॥ 4 ॥
ශ්රුත්වා ත්වහමයෝධ්යායාං විවාහාර්ථං තවාත්මජාන් ।
මිථිලාමුපයාතාංස්තු ත්වයා සහ මහීපතේ ॥ 5 ॥
ත්වරයාභ්යුපයාතෝऽහං ද්රෂ්ටුකාම ස්ස්වසුස්සුතම් ।
අථ රාජා දශරථඃ ප්රියාතිථිමුපස්ථිතම් ॥ 6 ॥
දෘෂ්ට්වා පරමසත්කාරෛඃ පූජාර්හං සමපූජයත් ।
තතස්තාමුෂිතෝ රාත්රිං සහ පුත්රෛර්මහාත්මභිඃ ॥ 7 ॥
ප්රභාතේ පුනරුත්ථාය කෘත්වා කර්මාණි කර්මවිත් ।
ඍෂීංස්තදා පුරස්කෘත්ය යජ්ඤවාටමුපාගමත් ॥ 8 ॥
යුක්තේ මුහූර්තේ විජයේ සර්වාභරණභූෂිතෛඃ ।
භ්රාතෘභිස්සහිතෝ රාමඃ කෘතකෞතුකමංගලඃ ॥ 9 ॥
වසිෂ්ඨං පුරතඃ කෘත්වා මහර්ෂීනපරානපි ।
පිතු ස්සමීපමාශ්රිත්ය තස්ථෞ භ්රාතෘභිරාවෘතඃ ॥ 10 ॥
වසිෂ්ඨෝ භගවානේත්ය වෛදේහමිදමබ්රවීත් ।
රාජා දශරථෝ රාජන් කෘතකෞතුකමංගලෛඃ ॥ 11 ॥
පුත්රෛර්නරවර ශ්රේෂ්ඨ දාතාරමභිකාංක්ෂතේ ।
දාතෘප්රතිග්රහීතෘභ්යාං සර්වාර්ථාඃ ප්රභවංති හි ॥ 12 ॥
ස්වධර්මං ප්රතිපද්යස්ව කෘත්වා වෛවාහ්යමුත්තමම් ।
ඉත්යුක්තඃ පරමෝදාරෝ වසිෂ්ඨේන මහාත්මනා ॥ 13 ॥
ප්රත්යුවාච මහාතේජා වාක්යං පරමධර්මවිත් ।
කස්ස්ථිතඃ ප්රතිහාරෝ මේ කස්යාජ්ඤා සංප්රතීක්ෂ්යතේ ॥ 14 ॥
ස්වගෘහේ කෝ විචාරෝऽස්ති යථා රාජ්යමිදං තව ।
කෘතකෞතුකසර්වස්වා වේදිමූලමුපාගතාඃ ॥ 15 ॥
මම කන්යා මුනිශ්රේෂ්ඨ දීප්තා වහ්නේරිවාර්චිෂඃ ।
සජ්ජෝऽහං ත්වත්ප්රතීක්ෂෝऽස්මි වේද්යාමස්යාං ප්රතිෂ්ඨිතඃ ॥ 16 ॥
අවිඝ්නං කුරුතාං රාජා කිමර්ථමවලංබතේ ।
තද්වාක්යං ජනකේනෝක්තං ශ්රුත්වා දශරථස්තදා ।
ප්රවේශයාමාස සුතාන් සර්වානෘෂිගණානපි ॥ 17 ॥
තතෝ රාජා විදේහානාං වසිෂ්ඨමිදමබ්රවීත් ॥ 18 ॥
කාරයස්ව ඍෂේ සර්වමෘෂිභිඃ සහ ධාර්මික ।
රාමස්ය ලෝකරාමස්ය ක්රියාං වෛවාහිකීං විභෝ ॥ 19 ॥
තථේත්යුක්ත්වා තු ජනකං වසිෂ්ඨෝ භගවානෘෂිඃ ।
විශ්වාමිත්රං පුරස්කෘත්ය ශතානංදං ච ධාර්මිකම් ॥ 20 ॥
ප්රපාමධ්යේ තු විධිවත්වේදිං කෘත්වා මහාතපාඃ ।
අලංචකාර තාං වේදිං ගංධපුෂ්පෛ ස්සමංතතඃ ॥ 21 ॥
සුවර්ණපාලිකාභිශ්ච ඡිද්රකුංභෛශ්ච සාංකුරෛඃ ।
අංකුරාඪ්යෛශ්ශරාවෛශ්ච ධූපපාත්රෛ ස්සධූපකෛඃ ॥ 22 ॥
ශංඛපාත්රෛ ස්ස්රුවෛ ස්ස්රුග්භිඃ පාත්රෛරර්ඝ්යාභිපූරිතෛඃ ।
ලාජපූර්ණෛශ්ච පාත්රීභිරක්ෂතෛරභිසංස්කෘතෛඃ ॥ 23 ॥
දර්භෛස්සමෛස්සමාස්තීර්ය විධිවන්මංත්රපූර්වකම් ।
අග්නිමාදාය වේද්යාං තු විධිමංත්රපුරස්කෘතම් ॥ 24 ॥
ජුහාවාග්නෞ මහාතේජා වසිෂ්ඨෝ භගවානෘෂිඃ ।
තතස්සීතාං සමානීය සර්වාභරණභූෂිතාම් ॥ 25 ॥
සමක්ෂමග්නේ ස්සංස්ථාප්ය රාඝවාභිමුඛේ තදා ।
අබ්රවීජ්ජනකෝ රාජා කෞසල්යානංදවර්ධනම් ॥ 26 ॥
ඉයං සීතා මම සුතා සහධර්මචරී තව ।
ප්රතීච්ඡ චෛනාං භද්රං තේ පාණිං ගෘහ්ණීෂ්ව පාණිනා ॥ 27 ॥
පතිව්රතා මහාභාගා ඡායේවානුගතා සදා ।
ඉත්යුක්ත්වා ප්රාක්ෂිපද්රාජා මංත්රපූතං ජලං තදා ॥ 28 ॥
සාධු සාධ්විති දේවානා මෘෂීණාං වදතාං තදා ।
දේවදුංදුභිර්නිර්ඝෝෂඃ පුෂ්පවර්ෂෝ මහානභූත් ॥ 29 ॥
ඒවං දත්ත්වා තදා සීතාං මංත්රෝදකපුරස්කෘතාම් ।
අබ්රවීජ්ජනකෝ රාජා හර්ෂේණාභිපරිප්ලුතඃ ॥ 30 ॥
ලක්ෂ්මණාගච්ඡ භද්රං තේ ඌර්මිලාමුද්යතාං මයා ।
ප්රතීච්ඡ පාණිං ගෘහ්ණීෂ්ව මාභූත්කාලස්ය පර්යයඃ ॥ 31 ॥
තමේවමුක්ත්වා ජනකෝ භරතං චාභ්යභාෂත ।
ගෘහාණ පාණිං මාංඩව්යාඃ පාණිනා රඝුනංදන ॥ 32 ॥
ශත්රුඝ්නං චාපි ධර්මාත්මා අබ්රවීජ්ජනකේශ්වරඃ ।
ශ්රුතකීර්ත්යා මහාබාහෝ පාණිං ගෘහ්ණීෂ්ව පාණිනා ॥ 33 ॥
සර්වේ භවංතස්සෞම්යාශ්ච සර්වේ සුචරිතව්රතාඃ ।
පත්නීභිස්සංතු කාකුත්ස්ථා මාභූත්කාලස්ය පර්යයඃ ॥ 34 ॥
ජනකස්ය වච ශ්ශෘත්වා පාණීන් පාණිභිරාස්පෘශන් ।
චත්වාරස්තේ චතසෘණාං වසිෂ්ඨස්ය මතේ ස්ථිතාඃ ॥ 35 ॥
අග්නිං ප්රදක්ෂිණීකෘත්ය වේදිං රාජානමේව ච ।
ඍෂීංශ්චෛව මහාත්මානස්සභාර්යා රඝුසත්තමාඃ ॥ 36 ॥
යථෝක්තේන තදා චක්රුර්විවාහං විධිපූර්වකම් ।
කාකුත්ස්ථෛශ්ච ගෘහීතේෂු ලලිතේෂු ච පාණිෂු ॥ 37 ॥
පුෂ්පවෘෂ්ටිර්මහත්යාසීදංතරික්ෂාත්සුභාස්වරා ।
දිව්යදුංදුභිනිර්ඝෝෂෛර්ගීතවාදිත්රනිස්වනෛඃ ॥ 38 ॥
නනෘතුශ්චාප්සරස්සංඝා ගංධර්වාශ්ච ජගුඃ කලම් ।
විවාහේ රඝුමුඛ්යානාං තදද්භුතමදෘශ්යත ॥ 39 ॥
ඊදෘශේ වර්තමානේ තු තූර්යෝද්ඝුෂ්ටනිනාදිතේ ।
ත්රිරග්නිං තේ පරික්රම්ය ඌහුර්භාර්යාං මහෞජසඃ ॥ 40 ॥
අථෝපකාර්යාං ජග්මුස්තේ සභාර්යා රඝුනංදනාඃ ।
රාජාऽප්යනුයයෞ පශ්යංත්සර්ෂිසංඝ ස්සබාංධවඃ ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ත්රිසප්තතිතමස්සර්ගඃ ॥
