śrīmadvālmīkīya rāmāyaṇē bālakāṇḍam ।
atha trisaptatitamassargaḥ ।
yasmiṃstu divasē rājā chakrē gōdānamuttamam ।
tasmiṃ stu divasē śūrō yudhājitsamupēyivān ॥ 1 ॥
putraḥ kēkayarājasya sākṣādbharatamātulaḥ ।
dṛṣṭvā pṛṣṭvā cha kuśalaṃ rājānamidamabravīt ॥ 2 ॥
kēkayādhipatī rājā snēhāt kuśalamabravīt ।
yēṣāṃ kuśalakāmō'si tēṣāṃ sampratyanāmayam ॥ 3 ॥
svasrīyaṃ mama rājēndra draṣṭukāmō mahīpatiḥ ।
tadarthamupayātō'hamayōdhyāṃ raghunandana ॥ 4 ॥
śrutvā tvahamayōdhyāyāṃ vivāhārthaṃ tavātmajān ।
mithilāmupayātāṃstu tvayā saha mahīpatē ॥ 5 ॥
tvarayābhyupayātō'haṃ draṣṭukāma ssvasussutam ।
atha rājā daśarathaḥ priyātithimupasthitam ॥ 6 ॥
dṛṣṭvā paramasatkāraiḥ pūjārhaṃ samapūjayat ।
tatastāmuṣitō rātriṃ saha putrairmahātmabhiḥ ॥ 7 ॥
prabhātē punarutthāya kṛtvā karmāṇi karmavit ।
ṛṣīṃstadā puraskṛtya yajñavāṭamupāgamat ॥ 8 ॥
yuktē muhūrtē vijayē sarvābharaṇabhūṣitaiḥ ।
bhrātṛbhissahitō rāmaḥ kṛtakautukamaṅgalaḥ ॥ 9 ॥
vasiṣṭhaṃ purataḥ kṛtvā maharṣīnaparānapi ।
pitu ssamīpamāśritya tasthau bhrātṛbhirāvṛtaḥ ॥ 10 ॥
vasiṣṭhō bhagavānētya vaidēhamidamabravīt ।
rājā daśarathō rājan kṛtakautukamaṅgalaiḥ ॥ 11 ॥
putrairnaravara śrēṣṭha dātāramabhikāṅkṣatē ।
dātṛpratigrahītṛbhyāṃ sarvārthāḥ prabhavanti hi ॥ 12 ॥
svadharmaṃ pratipadyasva kṛtvā vaivāhyamuttamam ।
ityuktaḥ paramōdārō vasiṣṭhēna mahātmanā ॥ 13 ॥
pratyuvācha mahātējā vākyaṃ paramadharmavit ।
kassthitaḥ pratihārō mē kasyājñā sampratīkṣyatē ॥ 14 ॥
svagṛhē kō vichārō'sti yathā rājyamidaṃ tava ।
kṛtakautukasarvasvā vēdimūlamupāgatāḥ ॥ 15 ॥
mama kanyā muniśrēṣṭha dīptā vahnērivārchiṣaḥ ।
sajjō'haṃ tvatpratīkṣō'smi vēdyāmasyāṃ pratiṣṭhitaḥ ॥ 16 ॥
avighnaṃ kurutāṃ rājā kimarthamavalambatē ।
tadvākyaṃ janakēnōktaṃ śrutvā daśarathastadā ।
pravēśayāmāsa sutān sarvānṛṣigaṇānapi ॥ 17 ॥
tatō rājā vidēhānāṃ vasiṣṭhamidamabravīt ॥ 18 ॥
kārayasva ṛṣē sarvamṛṣibhiḥ saha dhārmika ।
rāmasya lōkarāmasya kriyāṃ vaivāhikīṃ vibhō ॥ 19 ॥
tathētyuktvā tu janakaṃ vasiṣṭhō bhagavānṛṣiḥ ।
viśvāmitraṃ puraskṛtya śatānandaṃ cha dhārmikam ॥ 20 ॥
prapāmadhyē tu vidhivatvēdiṃ kṛtvā mahātapāḥ ।
alañchakāra tāṃ vēdiṃ gandhapuṣpai ssamantataḥ ॥ 21 ॥
suvarṇapālikābhiścha Chidrakumbhaiścha sāṅkuraiḥ ।
aṅkurāḍhyaiśśarāvaiścha dhūpapātrai ssadhūpakaiḥ ॥ 22 ॥
śaṅkhapātrai ssruvai ssrugbhiḥ pātrairarghyābhipūritaiḥ ।
lājapūrṇaiścha pātrībhirakṣatairabhisaṃskṛtaiḥ ॥ 23 ॥
darbhaissamaissamāstīrya vidhivanmantrapūrvakam ।
agnimādāya vēdyāṃ tu vidhimantrapuraskṛtam ॥ 24 ॥
juhāvāgnau mahātējā vasiṣṭhō bhagavānṛṣiḥ ।
tatassītāṃ samānīya sarvābharaṇabhūṣitām ॥ 25 ॥
samakṣamagnē ssaṃsthāpya rāghavābhimukhē tadā ।
abravījjanakō rājā kausalyānandavardhanam ॥ 26 ॥
iyaṃ sītā mama sutā sahadharmacharī tava ।
pratīchCha chaināṃ bhadraṃ tē pāṇiṃ gṛhṇīṣva pāṇinā ॥ 27 ॥
pativratā mahābhāgā Chāyēvānugatā sadā ।
ityuktvā prākṣipadrājā mantrapūtaṃ jalaṃ tadā ॥ 28 ॥
sādhu sādhviti dēvānā mṛṣīṇāṃ vadatāṃ tadā ।
dēvadundubhirnirghōṣaḥ puṣpavarṣō mahānabhūt ॥ 29 ॥
ēvaṃ dattvā tadā sītāṃ mantrōdakapuraskṛtām ।
abravījjanakō rājā harṣēṇābhipariplutaḥ ॥ 30 ॥
lakṣmaṇāgachCha bhadraṃ tē ūrmilāmudyatāṃ mayā ।
pratīchCha pāṇiṃ gṛhṇīṣva mābhūtkālasya paryayaḥ ॥ 31 ॥
tamēvamuktvā janakō bharataṃ chābhyabhāṣata ।
gṛhāṇa pāṇiṃ māṇḍavyāḥ pāṇinā raghunandana ॥ 32 ॥
śatrughnaṃ chāpi dharmātmā abravījjanakēśvaraḥ ।
śrutakīrtyā mahābāhō pāṇiṃ gṛhṇīṣva pāṇinā ॥ 33 ॥
sarvē bhavantassaumyāścha sarvē sucharitavratāḥ ।
patnībhissantu kākutsthā mābhūtkālasya paryayaḥ ॥ 34 ॥
janakasya vacha śśṛtvā pāṇīn pāṇibhirāspṛśan ।
chatvārastē chatasṛṇāṃ vasiṣṭhasya matē sthitāḥ ॥ 35 ॥
agniṃ pradakṣiṇīkṛtya vēdiṃ rājānamēva cha ।
ṛṣīṃśchaiva mahātmānassabhāryā raghusattamāḥ ॥ 36 ॥
yathōktēna tadā chakrurvivāhaṃ vidhipūrvakam ।
kākutsthaiścha gṛhītēṣu lalitēṣu cha pāṇiṣu ॥ 37 ॥
puṣpavṛṣṭirmahatyāsīdantarikṣātsubhāsvarā ।
divyadundubhinirghōṣairgītavāditranisvanaiḥ ॥ 38 ॥
nanṛtuśchāpsarassaṅghā gandharvāścha jaguḥ kalam ।
vivāhē raghumukhyānāṃ tadadbhutamadṛśyata ॥ 39 ॥
īdṛśē vartamānē tu tūryōdghuṣṭanināditē ।
triragniṃ tē parikramya ūhurbhāryāṃ mahaujasaḥ ॥ 40 ॥
athōpakāryāṃ jagmustē sabhāryā raghunandanāḥ ।
rājā'pyanuyayau paśyantsarṣisaṅgha ssabāndhavaḥ ॥ 41 ॥
ityārṣē śrīmadrāmāyaṇē vālmīkīya ādikāvyē bālakāṇḍē trisaptatitamassargaḥ ॥
