ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଅଷ୍ଟମସ୍ସର୍ଗଃ ।
ତସ୍ୟ ତ୍ଵେଵଂ ପ୍ରଭାଵସ୍ୟ ଧର୍ମଜ୍ଞସ୍ୟ ମହାତ୍ମନଃ ।
ସୁତାର୍ଥଂ ତପ୍ୟମାନସ୍ୟ ନାସୀଦ୍ଵଂଶକରସ୍ସୁତଃ ॥ 1 ॥
ଚିଂତୟାନସ୍ୟ ତସ୍ୟୈଵଂ ବୁଦ୍ଧିରାସୀନ୍ମହାତ୍ମନଃ ।
ସୁତାର୍ଥଂ ହୟମେଧେନ କିମର୍ଥଂ ନ ୟଜାମ୍ୟହମ୍ ॥ 2 ॥
ସ ନିଶ୍ଚିତାଂ ମତିଂ କୃତ୍ଵା ୟଷ୍ଟଵ୍ୟମିତି ବୁଦ୍ଧିମାନ୍ ।
ମଂତ୍ରିଭିସ୍ସହ ଧର୍ମାତ୍ମା ସର୍ଵୈରେଵ କୃତାତ୍ମଭିଃ ॥ 3 ॥
ତତୋଽବ୍ରଵୀଦିଦଂ ରାଜା ସୁମଂତ୍ରଂ ମଂତ୍ରିସତ୍ତମମ୍ ।
ଶୀଘ୍ରମାନୟ ମେ ସର୍ଵାନ୍ଗୁରୂଂସ୍ତାନ୍ ସପୁରୋହିତାନ୍ ॥ 4 ॥
ତତସ୍ସୁମଂତ୍ରସ୍ତ୍ଵରିତଂ ଗତ୍ଵା ତ୍ଵରିତଵିକ୍ରମଃ ।
ସମାନୟତ୍ସ ତାନ୍ ସର୍ଵାନ୍ ସମସ୍ତାନ୍ଵେଦପାରଗାନ୍ ॥ 5 ॥
ସୁୟଜ୍ଞଂ ଵାମଦେଵଂ ଚ ଜାବାଲିମଥ କାଶ୍ୟପମ୍ ।
ପରୋହିତଂ ଵସିଷ୍ଠଂ ଚ ୟେ ଚାନ୍ୟେ ଵ୍ଦିଜସତ୍ତମାଃ ॥ 6 ॥
ତାନ୍ପୂଜୟିତ୍ଵା ଧର୍ମାତ୍ମା ରାଜା ଦଶରଥସ୍ତଦା ।
ଇଦଂ ଧର୍ମାର୍ଥସହିତଂ ଶ୍ଲକ୍ଷ୍ଣଂଵଚନମବ୍ରଵୀତ୍ ॥ 7 ॥
ମମ ଲାଲପ୍ୟମାନସ୍ୟ ପୁତ୍ରାର୍ଥନ୍ନାସ୍ତି ଵୈ ସୁଖମ୍ ।
ତଦର୍ଥଂ ହୟମେଧେନ ୟକ୍ଷ୍ୟାମୀତି ମତିର୍ମମ ॥ 8 ॥
ତଦହଂ ୟଷ୍ଟୁମିଚ୍ଛାମି ଶାସ୍ତ୍ରଦୃଷ୍ଟେନ କର୍ମଣା ।
କଥଂ ପ୍ରାପ୍ସ୍ୟାମ୍ୟହଂ କାମଂ ବୁଦ୍ଧିରତ୍ରଵିଚାର୍ୟତାମ୍ ॥ 9 ॥
ତତସ୍ସାଧ୍ଵିତି ତଦ୍ଵାକ୍ୟଂ ବ୍ରାହ୍ମଣାଃ ପ୍ରତ୍ୟପୂଜୟନ୍ ।
ଵସିଷ୍ଠପ୍ରମୁଖାସ୍ସର୍ଵେ ପାର୍ଥିଵସ୍ୟ ମୁଖାଚ୍ଚ୍ୟୁତମ୍ ॥ 10 ॥
ଊଚୁଶ୍ଚ ପରମପ୍ରୀତାସ୍ସର୍ଵେ ଦଶରଥଂ ଵଚଃ ।
ସଂଭାରାସ୍ସଂଭ୍ରିୟଂତାଂ ତେ ତୁରଗଶ୍ଚ ଵିମୁଚ୍ୟତାମ୍ ॥ 11 ॥
ସର୍ଵଥା ପ୍ରାପ୍ସ୍ୟସେ ପୁତ୍ରାନଭିପ୍ରେତାଂଶ୍ଚ ପାର୍ଥିଵ ।
ୟସ୍ୟ ତେ ଧାର୍ମିକୀ ବୁଦ୍ଧିରିୟଂ ପୁତ୍ରାର୍ଥମାଗତା ॥ 12 ॥
ତତଃ ପ୍ରୀତୋଽଭଵଦ୍ରାଜା ଶ୍ରୁତ୍ଵା ତଦ୍ଵିଜଭାଷିତମ୍ ।
ଅମାତ୍ୟାଂଶ୍ଚାବ୍ରଵୀଦ୍ରାଜା ହର୍ଷପର୍ୟାକୁଲେକ୍ଷଣଃ ॥ 13 ॥
ସଂଭାରାସ୍ସଂଭ୍ରିୟଂତାଂ ମେ ଗୁରୂଣାଂ ଵଚନାଦିହ ।
ସମର୍ଥାଧିଷ୍ଠିତଶ୍ଚାଶ୍ଵସ୍ସୋପାଧ୍ୟାୟୋ ଵିମୁଚ୍ୟତାମ୍ ॥ 14 ॥
ସରୟ୍ଵାଶ୍ଚୋତ୍ତରେ ତୀରେ ୟଜ୍ଞଭୂମିର୍ଵିଧୀୟତାମ୍ ।
ଶାଂତୟଶ୍ଚାଭିଵର୍ଧଂତାଂ ୟଥାକଲ୍ପଂ ୟଥାଵିଧି ॥ 15 ॥
ଶକ୍ୟଃ ପ୍ରାପ୍ତୁମୟଂ ୟଜ୍ଞସ୍ସର୍ଵେଣାପି ମହୀକ୍ଷିତା ।
ନାପରାଧୋ ଭଵେତ୍କଷ୍ଟୋ ୟଦ୍ୟସ୍ମିନ୍କ୍ରତୁସତ୍ତମେ ॥ 16 ॥
ଛିଦ୍ରଂ ହି ମୃଗୟଂତେଽତ୍ର ଵିଦ୍ଵାଂସୋ ବ୍ରହ୍ମରାକ୍ଷସାଃ ।
ନିହତସ୍ୟ ଚ ୟଜ୍ଞସ୍ୟ ସଦ୍ୟଃ କର୍ତା ଵିନଶ୍ୟତି ॥ 17 ॥
ତଦ୍ୟଥା ଵିଧିପୂର୍ଵଂ ମେ କ୍ରତୁରେଷ ସମାପ୍ୟତେ ।
ତଥା ଵିଧାନଂ କ୍ରିୟତାଂ ସମର୍ଥାଃ କରଣେଷ୍ଵିହ ॥ 18 ॥
ତଥେତି ଚାବ୍ରୁଵନ୍ସର୍ଵେ ମଂତ୍ରିଣଃପ୍ରତ୍ୟପୂଜୟନ୍ ।
ପାର୍ଥିଵେଂଦ୍ରସ୍ୟ ତଦ୍ଵାକ୍ୟଂ ୟଥାଜ୍ଞପ୍ତଂ ନିଶମ୍ୟ ତେ ॥ 19 ॥
ତଥା ଦ୍ଵିଜାସ୍ତେ ଧର୍ମଜ୍ଞା ଵର୍ଧୟଂତୋ ନୃପୋତ୍ତମମ୍ ।
ଅନୁଜ୍ଞାତାସ୍ତତସ୍ସର୍ଵେ ପୁନର୍ଜଗ୍ମୁର୍ୟଥାଗତମ୍ ॥ 20 ॥
ଵିସର୍ଜୟିତ୍ଵା ତାନ୍ଵିପ୍ରାନ୍ସଚିଵାନିଦମବ୍ରଵୀତ୍ ।
ଋତ୍ଵିଗ୍ଭିରୁପଦିଷ୍ଟୋଽୟଂ ୟଥାଵତ୍କ୍ରତୁରାପ୍ୟତାମ୍ ॥ 21 ॥
ଇତ୍ୟୁକ୍ତ୍ଵା ନୃପଶାର୍ଦୂଲସ୍ସଚିଵାନ୍ସମୁପସ୍ଥିତାନ୍ ।
ଵିସର୍ଜୟିତ୍ଵା ସ୍ଵଂ ଵେଶ୍ମ ପ୍ରଵିଵେଶ ମହାଦ୍ୟୁତିଃ ॥ 22 ॥
ତତସ୍ସ ଗତ୍ଵା ତାଃପତ୍ନୀର୍ନରେଂଦ୍ରୋ ହୃଦୟପ୍ରିୟାଃ ।
ଉଵାଚ ଦୀକ୍ଷାଂ ଵିଶତ ୟକ୍ଷ୍ୟେଽହଂ ସୁତକାରଣାତ୍ ॥ 23 ॥
ତାସାଂ ତେନାତିକାଂତେନ ଵଚନେନ ସୁଵର୍ଚସାମ୍ ।
ମୁଖପଦ୍ମାନ୍ୟଶୋଭଂତ ପଦ୍ମାନୀଵ ହିମାତ୍ୟୟେ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଅଷ୍ଟମସ୍ସର୍ଗଃ ॥
