śrīmadvālmīkīya rāmāyaṇē bālakāṇḍam ।
atha aṣṭamassargaḥ ।
tasya tvēvaṃ prabhāvasya dharmajñasya mahātmanaḥ ।
sutārthaṃ tapyamānasya nāsīdvaṃśakarassutaḥ ॥ 1 ॥
chintayānasya tasyaivaṃ buddhirāsīnmahātmanaḥ ।
sutārthaṃ hayamēdhēna kimarthaṃ na yajāmyaham ॥ 2 ॥
sa niśchitāṃ matiṃ kṛtvā yaṣṭavyamiti buddhimān ।
mantribhissaha dharmātmā sarvairēva kṛtātmabhiḥ ॥ 3 ॥
tatō'bravīdidaṃ rājā sumantraṃ mantrisattamam ।
śīghramānaya mē sarvāngurūṃstān sapurōhitān ॥ 4 ॥
tatassumantrastvaritaṃ gatvā tvaritavikramaḥ ।
samānayatsa tān sarvān samastānvēdapāragān ॥ 5 ॥
suyajñaṃ vāmadēvaṃ cha jābālimatha kāśyapam ।
parōhitaṃ vasiṣṭhaṃ cha yē chānyē vdijasattamāḥ ॥ 6 ॥
tānpūjayitvā dharmātmā rājā daśarathastadā ।
idaṃ dharmārthasahitaṃ ślakṣṇaṃvachanamabravīt ॥ 7 ॥
mama lālapyamānasya putrārthannāsti vai sukham ।
tadarthaṃ hayamēdhēna yakṣyāmīti matirmama ॥ 8 ॥
tadahaṃ yaṣṭumichChāmi śāstradṛṣṭēna karmaṇā ।
kathaṃ prāpsyāmyahaṃ kāmaṃ buddhiratravichāryatām ॥ 9 ॥
tatassādhviti tadvākyaṃ brāhmaṇāḥ pratyapūjayan ।
vasiṣṭhapramukhāssarvē pārthivasya mukhāchchyutam ॥ 10 ॥
ūchuścha paramaprītāssarvē daśarathaṃ vachaḥ ।
sambhārāssambhriyantāṃ tē turagaścha vimuchyatām ॥ 11 ॥
sarvathā prāpsyasē putrānabhiprētāṃścha pārthiva ।
yasya tē dhārmikī buddhiriyaṃ putrārthamāgatā ॥ 12 ॥
tataḥ prītō'bhavadrājā śrutvā tadvijabhāṣitam ।
amātyāṃśchābravīdrājā harṣaparyākulēkṣaṇaḥ ॥ 13 ॥
sambhārāssambhriyantāṃ mē gurūṇāṃ vachanādiha ।
samarthādhiṣṭhitaśchāśvassōpādhyāyō vimuchyatām ॥ 14 ॥
sarayvāśchōttarē tīrē yajñabhūmirvidhīyatām ।
śāntayaśchābhivardhantāṃ yathākalpaṃ yathāvidhi ॥ 15 ॥
śakyaḥ prāptumayaṃ yajñassarvēṇāpi mahīkṣitā ।
nāparādhō bhavētkaṣṭō yadyasminkratusattamē ॥ 16 ॥
Chidraṃ hi mṛgayantē'tra vidvāṃsō brahmarākṣasāḥ ।
nihatasya cha yajñasya sadyaḥ kartā vinaśyati ॥ 17 ॥
tadyathā vidhipūrvaṃ mē kraturēṣa samāpyatē ।
tathā vidhānaṃ kriyatāṃ samarthāḥ karaṇēṣviha ॥ 18 ॥
tathēti chābruvansarvē mantriṇaḥpratyapūjayan ।
pārthivēndrasya tadvākyaṃ yathājñaptaṃ niśamya tē ॥ 19 ॥
tathā dvijāstē dharmajñā vardhayantō nṛpōttamam ।
anujñātāstatassarvē punarjagmuryathāgatam ॥ 20 ॥
visarjayitvā tānviprānsachivānidamabravīt ।
ṛtvigbhirupadiṣṭō'yaṃ yathāvatkraturāpyatām ॥ 21 ॥
ityuktvā nṛpaśārdūlassachivānsamupasthitān ।
visarjayitvā svaṃ vēśma pravivēśa mahādyutiḥ ॥ 22 ॥
tatassa gatvā tāḥpatnīrnarēndrō hṛdayapriyāḥ ।
uvācha dīkṣāṃ viśata yakṣyē'haṃ sutakāraṇāt ॥ 23 ॥
tāsāṃ tēnātikāntēna vachanēna suvarchasām ।
mukhapadmānyaśōbhanta padmānīva himātyayē ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē aṣṭamassargaḥ ॥
