శ్రీమద్వాల్మీకీయ రామాయణే బాలకాండమ్ ।
అథ అష్టమస్సర్గః ।
తస్య త్వేవం ప్రభావస్య ధర్మజ్ఞస్య మహాత్మనః ।
సుతార్థం తప్యమానస్య నాసీద్వంశకరస్సుతః ॥ 1 ॥
చింతయానస్య తస్యైవం బుద్ధిరాసీన్మహాత్మనః ।
సుతార్థం హయమేధేన కిమర్థం న యజామ్యహమ్ ॥ 2 ॥
స నిశ్చితాం మతిం కృత్వా యష్టవ్యమితి బుద్ధిమాన్ ।
మంత్రిభిస్సహ ధర్మాత్మా సర్వైరేవ కృతాత్మభిః ॥ 3 ॥
తతోఽబ్రవీదిదం రాజా సుమంత్రం మంత్రిసత్తమమ్ ।
శీఘ్రమానయ మే సర్వాన్గురూంస్తాన్ సపురోహితాన్ ॥ 4 ॥
తతస్సుమంత్రస్త్వరితం గత్వా త్వరితవిక్రమః ।
సమానయత్స తాన్ సర్వాన్ సమస్తాన్వేదపారగాన్ ॥ 5 ॥
సుయజ్ఞం వామదేవం చ జాబాలిమథ కాశ్యపమ్ ।
పరోహితం వసిష్ఠం చ యే చాన్యే వ్దిజసత్తమాః ॥ 6 ॥
తాన్పూజయిత్వా ధర్మాత్మా రాజా దశరథస్తదా ।
ఇదం ధర్మార్థసహితం శ్లక్ష్ణంవచనమబ్రవీత్ ॥ 7 ॥
మమ లాలప్యమానస్య పుత్రార్థన్నాస్తి వై సుఖమ్ ।
తదర్థం హయమేధేన యక్ష్యామీతి మతిర్మమ ॥ 8 ॥
తదహం యష్టుమిచ్ఛామి శాస్త్రదృష్టేన కర్మణా ।
కథం ప్రాప్స్యామ్యహం కామం బుద్ధిరత్రవిచార్యతామ్ ॥ 9 ॥
తతస్సాధ్వితి తద్వాక్యం బ్రాహ్మణాః ప్రత్యపూజయన్ ।
వసిష్ఠప్రముఖాస్సర్వే పార్థివస్య ముఖాచ్చ్యుతమ్ ॥ 10 ॥
ఊచుశ్చ పరమప్రీతాస్సర్వే దశరథం వచః ।
సంభారాస్సంభ్రియంతాం తే తురగశ్చ విముచ్యతామ్ ॥ 11 ॥
సర్వథా ప్రాప్స్యసే పుత్రానభిప్రేతాంశ్చ పార్థివ ।
యస్య తే ధార్మికీ బుద్ధిరియం పుత్రార్థమాగతా ॥ 12 ॥
తతః ప్రీతోఽభవద్రాజా శ్రుత్వా తద్విజభాషితమ్ ।
అమాత్యాంశ్చాబ్రవీద్రాజా హర్షపర్యాకులేక్షణః ॥ 13 ॥
సంభారాస్సంభ్రియంతాం మే గురూణాం వచనాదిహ ।
సమర్థాధిష్ఠితశ్చాశ్వస్సోపాధ్యాయో విముచ్యతామ్ ॥ 14 ॥
సరయ్వాశ్చోత్తరే తీరే యజ్ఞభూమిర్విధీయతామ్ ।
శాంతయశ్చాభివర్ధంతాం యథాకల్పం యథావిధి ॥ 15 ॥
శక్యః ప్రాప్తుమయం యజ్ఞస్సర్వేణాపి మహీక్షితా ।
నాపరాధో భవేత్కష్టో యద్యస్మిన్క్రతుసత్తమే ॥ 16 ॥
ఛిద్రం హి మృగయంతేఽత్ర విద్వాంసో బ్రహ్మరాక్షసాః ।
నిహతస్య చ యజ్ఞస్య సద్యః కర్తా వినశ్యతి ॥ 17 ॥
తద్యథా విధిపూర్వం మే క్రతురేష సమాప్యతే ।
తథా విధానం క్రియతాం సమర్థాః కరణేష్విహ ॥ 18 ॥
తథేతి చాబ్రువన్సర్వే మంత్రిణఃప్రత్యపూజయన్ ।
పార్థివేంద్రస్య తద్వాక్యం యథాజ్ఞప్తం నిశమ్య తే ॥ 19 ॥
తథా ద్విజాస్తే ధర్మజ్ఞా వర్ధయంతో నృపోత్తమమ్ ।
అనుజ్ఞాతాస్తతస్సర్వే పునర్జగ్ముర్యథాగతమ్ ॥ 20 ॥
విసర్జయిత్వా తాన్విప్రాన్సచివానిదమబ్రవీత్ ।
ఋత్విగ్భిరుపదిష్టోఽయం యథావత్క్రతురాప్యతామ్ ॥ 21 ॥
ఇత్యుక్త్వా నృపశార్దూలస్సచివాన్సముపస్థితాన్ ।
విసర్జయిత్వా స్వం వేశ్మ ప్రవివేశ మహాద్యుతిః ॥ 22 ॥
తతస్స గత్వా తాఃపత్నీర్నరేంద్రో హృదయప్రియాః ।
ఉవాచ దీక్షాం విశత యక్ష్యేఽహం సుతకారణాత్ ॥ 23 ॥
తాసాం తేనాతికాంతేన వచనేన సువర్చసామ్ ।
ముఖపద్మాన్యశోభంత పద్మానీవ హిమాత్యయే ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే అష్టమస్సర్గః ॥
