ശ്രീമദ്വാല്മീകീയ രാമായണേ ബാലകാംഡമ് ।
അഥ അഷ്ടമസ്സര്ഗഃ ।
തസ്യ ത്വേവം പ്രഭാവസ്യ ധര്മജ്ഞസ്യ മഹാത്മനഃ ।
സുതാര്ഥം തപ്യമാനസ്യ നാസീദ്വംശകരസ്സുതഃ ॥ 1 ॥
ചിംതയാനസ്യ തസ്യൈവം ബുദ്ധിരാസീന്മഹാത്മനഃ ।
സുതാര്ഥം ഹയമേധേന കിമര്ഥം ന യജാമ്യഹമ് ॥ 2 ॥
സ നിശ്ചിതാം മതിം കൃത്വാ യഷ്ടവ്യമിതി ബുദ്ധിമാന് ।
മംത്രിഭിസ്സഹ ധര്മാത്മാ സർവൈരേവ കൃതാത്മഭിഃ ॥ 3 ॥
തതോഽബ്രവീദിദം രാജാ സുമംത്രം മംത്രിസത്തമമ് ।
ശീഘ്രമാനയ മേ സർവാന്ഗുരൂംസ്താന് സപുരോഹിതാന് ॥ 4 ॥
തതസ്സുമംത്രസ്ത്വരിതം ഗത്വാ ത്വരിതവിക്രമഃ ।
സമാനയത്സ താന് സർവാന് സമസ്താന്വേദപാരഗാന് ॥ 5 ॥
സുയജ്ഞം വാമദേവം ച ജാബാലിമഥ കാശ്യപമ് ।
പരോഹിതം വസിഷ്ഠം ച യേ ചാന്യേ വ്ദിജസത്തമാഃ ॥ 6 ॥
താന്പൂജയിത്വാ ധര്മാത്മാ രാജാ ദശരഥസ്തദാ ।
ഇദം ധര്മാര്ഥസഹിതം ശ്ലക്ഷ്ണംവചനമബ്രവീത് ॥ 7 ॥
മമ ലാലപ്യമാനസ്യ പുത്രാര്ഥന്നാസ്തി വൈ സുഖമ് ।
തദര്ഥം ഹയമേധേന യക്ഷ്യാമീതി മതിര്മമ ॥ 8 ॥
തദഹം യഷ്ടുമിച്ഛാമി ശാസ്ത്രദൃഷ്ടേന കര്മണാ ।
കഥം പ്രാപ്സ്യാമ്യഹം കാമം ബുദ്ധിരത്രവിചാര്യതാമ് ॥ 9 ॥
തതസ്സാധ്വിതി തദ്വാക്യം ബ്രാഹ്മണാഃ പ്രത്യപൂജയന് ।
വസിഷ്ഠപ്രമുഖാസ്സർവേ പാര്ഥിവസ്യ മുഖാച്ച്യുതമ് ॥ 10 ॥
ഊചുശ്ച പരമപ്രീതാസ്സർവേ ദശരഥം വചഃ ।
സംഭാരാസ്സംഭ്രിയംതാം തേ തുരഗശ്ച വിമുച്യതാമ് ॥ 11 ॥
സർവഥാ പ്രാപ്സ്യസേ പുത്രാനഭിപ്രേതാംശ്ച പാര്ഥിവ ।
യസ്യ തേ ധാര്മികീ ബുദ്ധിരിയം പുത്രാര്ഥമാഗതാ ॥ 12 ॥
തതഃ പ്രീതോഽഭവദ്രാജാ ശ്രുത്വാ തദ്വിജഭാഷിതമ് ।
അമാത്യാംശ്ചാബ്രവീദ്രാജാ ഹര്ഷപര്യാകുലേക്ഷണഃ ॥ 13 ॥
സംഭാരാസ്സംഭ്രിയംതാം മേ ഗുരൂണാം വചനാദിഹ ।
സമര്ഥാധിഷ്ഠിതശ്ചാശ്വസ്സോപാധ്യായോ വിമുച്യതാമ് ॥ 14 ॥
സരയ്വാശ്ചോത്തരേ തീരേ യജ്ഞഭൂമിർവിധീയതാമ് ।
ശാംതയശ്ചാഭിവര്ധംതാം യഥാകല്പം യഥാവിധി ॥ 15 ॥
ശക്യഃ പ്രാപ്തുമയം യജ്ഞസ്സർവേണാപി മഹീക്ഷിതാ ।
നാപരാധോ ഭവേത്കഷ്ടോ യദ്യസ്മിന്ക്രതുസത്തമേ ॥ 16 ॥
ഛിദ്രം ഹി മൃഗയംതേഽത്ര വിദ്വാംസോ ബ്രഹ്മരാക്ഷസാഃ ।
നിഹതസ്യ ച യജ്ഞസ്യ സദ്യഃ കര്താ വിനശ്യതി ॥ 17 ॥
തദ്യഥാ വിധിപൂർവം മേ ക്രതുരേഷ സമാപ്യതേ ।
തഥാ വിധാനം ക്രിയതാം സമര്ഥാഃ കരണേഷ്വിഹ ॥ 18 ॥
തഥേതി ചാബ്രുവന്സർവേ മംത്രിണഃപ്രത്യപൂജയന് ।
പാര്ഥിവേംദ്രസ്യ തദ്വാക്യം യഥാജ്ഞപ്തം നിശമ്യ തേ ॥ 19 ॥
തഥാ ദ്വിജാസ്തേ ധര്മജ്ഞാ വര്ധയംതോ നൃപോത്തമമ് ।
അനുജ്ഞാതാസ്തതസ്സർവേ പുനര്ജഗ്മുര്യഥാഗതമ് ॥ 20 ॥
വിസര്ജയിത്വാ താന്വിപ്രാന്സചിവാനിദമബ്രവീത് ।
ഋത്വിഗ്ഭിരുപദിഷ്ടോഽയം യഥാവത്ക്രതുരാപ്യതാമ് ॥ 21 ॥
ഇത്യുക്ത്വാ നൃപശാര്ദൂലസ്സചിവാന്സമുപസ്ഥിതാന് ।
വിസര്ജയിത്വാ സ്വം വേശ്മ പ്രവിവേശ മഹാദ്യുതിഃ ॥ 22 ॥
തതസ്സ ഗത്വാ താഃപത്നീര്നരേംദ്രോ ഹൃദയപ്രിയാഃ ।
ഉവാച ദീക്ഷാം വിശത യക്ഷ്യേഽഹം സുതകാരണാത് ॥ 23 ॥
താസാം തേനാതികാംതേന വചനേന സുവര്ചസാമ് ।
മുഖപദ്മാന്യശോഭംത പദ്മാനീവ ഹിമാത്യയേ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ അഷ്ടമസ്സര്ഗഃ ॥
