શ્રીમદ્વાલ્મીકીય રામાયણે બાલકાંડમ્ ।
અથ અષ્ટમસ્સર્ગઃ ।
તસ્ય ત્વેવં પ્રભાવસ્ય ધર્મજ્ઞસ્ય મહાત્મનઃ ।
સુતાર્થં તપ્યમાનસ્ય નાસીદ્વંશકરસ્સુતઃ ॥ 1 ॥
ચિંતયાનસ્ય તસ્યૈવં બુદ્ધિરાસીન્મહાત્મનઃ ।
સુતાર્થં હયમેધેન કિમર્થં ન યજામ્યહમ્ ॥ 2 ॥
સ નિશ્ચિતાં મતિં કૃત્વા યષ્ટવ્યમિતિ બુદ્ધિમાન્ ।
મંત્રિભિસ્સહ ધર્માત્મા સર્વૈરેવ કૃતાત્મભિઃ ॥ 3 ॥
તતોઽબ્રવીદિદં રાજા સુમંત્રં મંત્રિસત્તમમ્ ।
શીઘ્રમાનય મે સર્વાન્ગુરૂંસ્તાન્ સપુરોહિતાન્ ॥ 4 ॥
તતસ્સુમંત્રસ્ત્વરિતં ગત્વા ત્વરિતવિક્રમઃ ।
સમાનયત્સ તાન્ સર્વાન્ સમસ્તાન્વેદપારગાન્ ॥ 5 ॥
સુયજ્ઞં વામદેવં ચ જાબાલિમથ કાશ્યપમ્ ।
પરોહિતં વસિષ્ઠં ચ યે ચાન્યે વ્દિજસત્તમાઃ ॥ 6 ॥
તાન્પૂજયિત્વા ધર્માત્મા રાજા દશરથસ્તદા ।
ઇદં ધર્માર્થસહિતં શ્લક્ષ્ણંવચનમબ્રવીત્ ॥ 7 ॥
મમ લાલપ્યમાનસ્ય પુત્રાર્થન્નાસ્તિ વૈ સુખમ્ ।
તદર્થં હયમેધેન યક્ષ્યામીતિ મતિર્મમ ॥ 8 ॥
તદહં યષ્ટુમિચ્છામિ શાસ્ત્રદૃષ્ટેન કર્મણા ।
કથં પ્રાપ્સ્યામ્યહં કામં બુદ્ધિરત્રવિચાર્યતામ્ ॥ 9 ॥
તતસ્સાધ્વિતિ તદ્વાક્યં બ્રાહ્મણાઃ પ્રત્યપૂજયન્ ।
વસિષ્ઠપ્રમુખાસ્સર્વે પાર્થિવસ્ય મુખાચ્ચ્યુતમ્ ॥ 10 ॥
ઊચુશ્ચ પરમપ્રીતાસ્સર્વે દશરથં વચઃ ।
સંભારાસ્સંભ્રિયંતાં તે તુરગશ્ચ વિમુચ્યતામ્ ॥ 11 ॥
સર્વથા પ્રાપ્સ્યસે પુત્રાનભિપ્રેતાંશ્ચ પાર્થિવ ।
યસ્ય તે ધાર્મિકી બુદ્ધિરિયં પુત્રાર્થમાગતા ॥ 12 ॥
તતઃ પ્રીતોઽભવદ્રાજા શ્રુત્વા તદ્વિજભાષિતમ્ ।
અમાત્યાંશ્ચાબ્રવીદ્રાજા હર્ષપર્યાકુલેક્ષણઃ ॥ 13 ॥
સંભારાસ્સંભ્રિયંતાં મે ગુરૂણાં વચનાદિહ ।
સમર્થાધિષ્ઠિતશ્ચાશ્વસ્સોપાધ્યાયો વિમુચ્યતામ્ ॥ 14 ॥
સરય્વાશ્ચોત્તરે તીરે યજ્ઞભૂમિર્વિધીયતામ્ ।
શાંતયશ્ચાભિવર્ધંતાં યથાકલ્પં યથાવિધિ ॥ 15 ॥
શક્યઃ પ્રાપ્તુમયં યજ્ઞસ્સર્વેણાપિ મહીક્ષિતા ।
નાપરાધો ભવેત્કષ્ટો યદ્યસ્મિન્ક્રતુસત્તમે ॥ 16 ॥
છિદ્રં હિ મૃગયંતેઽત્ર વિદ્વાંસો બ્રહ્મરાક્ષસાઃ ।
નિહતસ્ય ચ યજ્ઞસ્ય સદ્યઃ કર્તા વિનશ્યતિ ॥ 17 ॥
તદ્યથા વિધિપૂર્વં મે ક્રતુરેષ સમાપ્યતે ।
તથા વિધાનં ક્રિયતાં સમર્થાઃ કરણેષ્વિહ ॥ 18 ॥
તથેતિ ચાબ્રુવન્સર્વે મંત્રિણઃપ્રત્યપૂજયન્ ।
પાર્થિવેંદ્રસ્ય તદ્વાક્યં યથાજ્ઞપ્તં નિશમ્ય તે ॥ 19 ॥
તથા દ્વિજાસ્તે ધર્મજ્ઞા વર્ધયંતો નૃપોત્તમમ્ ।
અનુજ્ઞાતાસ્તતસ્સર્વે પુનર્જગ્મુર્યથાગતમ્ ॥ 20 ॥
વિસર્જયિત્વા તાન્વિપ્રાન્સચિવાનિદમબ્રવીત્ ।
ઋત્વિગ્ભિરુપદિષ્ટોઽયં યથાવત્ક્રતુરાપ્યતામ્ ॥ 21 ॥
ઇત્યુક્ત્વા નૃપશાર્દૂલસ્સચિવાન્સમુપસ્થિતાન્ ।
વિસર્જયિત્વા સ્વં વેશ્મ પ્રવિવેશ મહાદ્યુતિઃ ॥ 22 ॥
તતસ્સ ગત્વા તાઃપત્નીર્નરેંદ્રો હૃદયપ્રિયાઃ ।
ઉવાચ દીક્ષાં વિશત યક્ષ્યેઽહં સુતકારણાત્ ॥ 23 ॥
તાસાં તેનાતિકાંતેન વચનેન સુવર્ચસામ્ ।
મુખપદ્માન્યશોભંત પદ્માનીવ હિમાત્યયે ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે અષ્ટમસ્સર્ગઃ ॥
