ශ්රීමද්වාල්මීකීය රාමායණේ බාලකාංඩම් ।
අථ අෂ්ටමස්සර්ගඃ ।
තස්ය ත්වේවං ප්රභාවස්ය ධර්මජ්ඤස්ය මහාත්මනඃ ।
සුතාර්ථං තප්යමානස්ය නාසීද්වංශකරස්සුතඃ ॥ 1 ॥
චිංතයානස්ය තස්යෛවං බුද්ධිරාසීන්මහාත්මනඃ ।
සුතාර්ථං හයමේධේන කිමර්ථං න යජාම්යහම් ॥ 2 ॥
ස නිශ්චිතාං මතිං කෘත්වා යෂ්ටව්යමිති බුද්ධිමාන් ।
මංත්රිභිස්සහ ධර්මාත්මා සර්වෛරේව කෘතාත්මභිඃ ॥ 3 ॥
තතෝऽබ්රවීදිදං රාජා සුමංත්රං මංත්රිසත්තමම් ।
ශීඝ්රමානය මේ සර්වාන්ගුරූංස්තාන් සපුරෝහිතාන් ॥ 4 ॥
තතස්සුමංත්රස්ත්වරිතං ගත්වා ත්වරිතවික්රමඃ ।
සමානයත්ස තාන් සර්වාන් සමස්තාන්වේදපාරගාන් ॥ 5 ॥
සුයජ්ඤං වාමදේවං ච ජාබාලිමථ කාශ්යපම් ।
පරෝහිතං වසිෂ්ඨං ච යේ චාන්යේ ව්දිජසත්තමාඃ ॥ 6 ॥
තාන්පූජයිත්වා ධර්මාත්මා රාජා දශරථස්තදා ।
ඉදං ධර්මාර්ථසහිතං ශ්ලක්ෂ්ණංවචනමබ්රවීත් ॥ 7 ॥
මම ලාලප්යමානස්ය පුත්රාර්ථන්නාස්ති වෛ සුඛම් ।
තදර්ථං හයමේධේන යක්ෂ්යාමීති මතිර්මම ॥ 8 ॥
තදහං යෂ්ටුමිච්ඡාමි ශාස්ත්රදෘෂ්ටේන කර්මණා ।
කථං ප්රාප්ස්යාම්යහං කාමං බුද්ධිරත්රවිචාර්යතාම් ॥ 9 ॥
තතස්සාධ්විති තද්වාක්යං බ්රාහ්මණාඃ ප්රත්යපූජයන් ।
වසිෂ්ඨප්රමුඛාස්සර්වේ පාර්ථිවස්ය මුඛාච්ච්යුතම් ॥ 10 ॥
ඌචුශ්ච පරමප්රීතාස්සර්වේ දශරථං වචඃ ।
සංභාරාස්සංභ්රියංතාං තේ තුරගශ්ච විමුච්යතාම් ॥ 11 ॥
සර්වථා ප්රාප්ස්යසේ පුත්රානභිප්රේතාංශ්ච පාර්ථිව ।
යස්ය තේ ධාර්මිකී බුද්ධිරියං පුත්රාර්ථමාගතා ॥ 12 ॥
තතඃ ප්රීතෝऽභවද්රාජා ශ්රුත්වා තද්විජභාෂිතම් ।
අමාත්යාංශ්චාබ්රවීද්රාජා හර්ෂපර්යාකුලේක්ෂණඃ ॥ 13 ॥
සංභාරාස්සංභ්රියංතාං මේ ගුරූණාං වචනාදිහ ।
සමර්ථාධිෂ්ඨිතශ්චාශ්වස්සෝපාධ්යායෝ විමුච්යතාම් ॥ 14 ॥
සරය්වාශ්චෝත්තරේ තීරේ යජ්ඤභූමිර්විධීයතාම් ।
ශාංතයශ්චාභිවර්ධංතාං යථාකල්පං යථාවිධි ॥ 15 ॥
ශක්යඃ ප්රාප්තුමයං යජ්ඤස්සර්වේණාපි මහීක්ෂිතා ।
නාපරාධෝ භවේත්කෂ්ටෝ යද්යස්මින්ක්රතුසත්තමේ ॥ 16 ॥
ඡිද්රං හි මෘගයංතේऽත්ර විද්වාංසෝ බ්රහ්මරාක්ෂසාඃ ।
නිහතස්ය ච යජ්ඤස්ය සද්යඃ කර්තා විනශ්යති ॥ 17 ॥
තද්යථා විධිපූර්වං මේ ක්රතුරේෂ සමාප්යතේ ।
තථා විධානං ක්රියතාං සමර්ථාඃ කරණේෂ්විහ ॥ 18 ॥
තථේති චාබ්රුවන්සර්වේ මංත්රිණඃප්රත්යපූජයන් ।
පාර්ථිවේංද්රස්ය තද්වාක්යං යථාජ්ඤප්තං නිශම්ය තේ ॥ 19 ॥
තථා ද්විජාස්තේ ධර්මජ්ඤා වර්ධයංතෝ නෘපෝත්තමම් ।
අනුජ්ඤාතාස්තතස්සර්වේ පුනර්ජග්මුර්යථාගතම් ॥ 20 ॥
විසර්ජයිත්වා තාන්විප්රාන්සචිවානිදමබ්රවීත් ।
ඍත්විග්භිරුපදිෂ්ටෝऽයං යථාවත්ක්රතුරාප්යතාම් ॥ 21 ॥
ඉත්යුක්ත්වා නෘපශාර්දූලස්සචිවාන්සමුපස්ථිතාන් ।
විසර්ජයිත්වා ස්වං වේශ්ම ප්රවිවේශ මහාද්යුතිඃ ॥ 22 ॥
තතස්ස ගත්වා තාඃපත්නීර්නරේංද්රෝ හෘදයප්රියාඃ ।
උවාච දීක්ෂාං විශත යක්ෂ්යේऽහං සුතකාරණාත් ॥ 23 ॥
තාසාං තේනාතිකාංතේන වචනේන සුවර්චසාම් ।
මුඛපද්මාන්යශෝභංත පද්මානීව හිමාත්යයේ ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ අෂ්ටමස්සර්ගඃ ॥
