ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഷട്പംചാശസ്സര്ഗഃ ।
അഥ രാത്ര്യാം വ്യതീതായാമവസുപ്തമനംതരമ് ।
പ്രബോധയാമാസ ശനൈര്ലക്ഷ്മണം രഘുനംദനഃ ॥ 1 ॥
സൌമിത്രേ ശ്രുണു വന്യാനാം വല്ഗു വ്യാഹരതാം സ്വനമ് ।
സംപ്രതിഷ്ഠാമഹേ കാല പ്രസ്ഥാനസ്യ പരംതപ ॥ 2 ॥
സ സുപ്തസ്സമയേ ഭ്രാത്രാ ലക്ഷ്മണഃ പ്രതിബോധിതഃ ।
ജഹൌ നിദ്രാം ച തംദ്രീം ച പ്രസക്തം ച പഥി ശ്രമമ് ॥ 3 ॥
തത ഉത്ഥായ തേ സർവേ സ്പൃഷ്ട്വാ നദ്യാ ശ്ശിവം ജലമ് ।
പംഥാനമൃഷിണാഽദിഷ്ടം ചിത്രകൂടസ്യ തം യയുഃ ॥ 4 ॥
തതസ്സംപ്രസ്ഥിതഃ കാലേ രാമസ്സൌമിത്രിണാ സഹ ।
സീതാം കമലപത്രാക്ഷീമിദം വചനമബ്രവീത് ॥ 5 ॥
ആദിപ്താനിവ വൈദേഹി സർവതഃ പുഷ്പിതാന്നഗാന് ।
സ്വൈഃ പുഷ്പൈഃ കിംശുകാന് പശ്യ മാലിനശിശിരാത്യയേ ॥ 6 ॥
പശ്യ ഭല്ലാതകാന് ഫുല്ലാന്നരൈ രനുപസേവിതാന് ।
ഫലപത്രൈരവനതാ ന്നൂനം ശക്ഷ്യാമ ജീവിതുമ് ॥ 7 ॥
പശ്യ ദ്രോണപ്രമാണാനി ലംബമാനാനി ലക്ഷ്മണ ।
മധൂനി മധുകാരീഭി സ്സംഭൃതാനി നഗേ നഗേ ॥ 8 ॥
ഏഷ ക്രോശതി നത്യൂഹസ്തം ശിഖീ പ്രതികൂജതി ।
രമണീയേ വനോദ്ദേശേ പുഷ്പസംസ്തരസംകടേ ॥ 9 ॥
മാതംഗയൂഥാനുസൃതം പക്ഷിസംംഘാനുനാദിതമ് ।
ചിത്രകൂടമിമം പശ്യ പ്രവൃദ്ധശിഖരം ഗിരിമ് ॥ 10 ॥
സമഭൂമിതലേ രമ്യേ ദ്രുമൈര്ബഹുഭിരാവൃതേ ।
പുണ്യേ രംസ്യാമഹേ താത ചിത്രകൂടസ്യ കാനനേ ॥ 11 ॥
തതസ്തൌ പാദചാരേണ ഗച്ഛംതൌ സഹ സീതയാ ।
രമ്യമാസേദതുശ്ശൈലം ചിത്രകൂടം മനോരമമ് ॥ 12 ॥
തംതു പർവതമാസാദ്യ നാനാപക്ഷിഗണായുതമ് ।
ബഹുമൂലഫലം രമ്യം സംപന്നം സരസോദകമ് ॥ 13 ॥
മനോജ്ഞോഽയം ഗിരിസ്സൌമ്യ നാനാദ്രുമലതായുതഃ ।
ബഹുമൂലഫലോ രമ്യ സ്സ്വാജീവഃ പ്രതിഭാതി മേ ॥ 14 ॥
മുനയശ്ച മഹാത്മാനോ വസംത്യസ്മി ശിലോച്ചയേ ।
അയം വാസോ ഭവേത്താവദത്ര സൌമ്യ രമേമഹി ॥ 15 ॥
ഇതി സീതാ ച രാമശ്ച ലക്ഷ്മണശ്ച കൃതാംജലിഃ ।
അഭിഗമ്യാഽശ്രമം സർവേ വാല്മീകി മഭിവാദയന് ॥ 16 ॥
താന്മഹര്ഷി പ്രമുദിതഃ പൂജയാമാസ ധര്മവിത് ।
അസ്യതാമിതി ചോവാച സ്വാഗംതു നിവേദ്യ ച ॥ 17 ॥
തതോഽബ്രവീന്മഹാബാഹുര്ലക്ഷ്മണം ലക്ഷ്മണാഗ്രജഃ ।
സന്നിവേദ്യ യഥാന്യായ മാത്മാനമൃഷയേ പ്രഭുഃ ॥ 18 ॥
ലക്ഷ്മണാഽഽനയ ദാരൂണി ദൃഢാനി ച വരാണി ച ।
കുരുഷ്വാഽവസഥം സൌമ്യ വാസേ മേഽഭിരതം മനഃ ॥ 19 ॥
തസ്യ തദ്വചനം ശ്രുത്വാ സൌമിത്രിർവിവിധാന് ദ്രുമാന് ।
ആജഹാര തത ശ്ചക്രേ പര്ണശാലാമരിംദമഃ ॥ 20 ॥
താം നിഷ്ഠിതാം ബദ്ധകടാം ദൃഷ്ട്വാ രാമസ്സുദര്ശനാമ് ।
ശുശ്രൂഷമാണമേകാഗ്രമിദം വചനമബ്രവീത് ॥ 21 ॥
ഐണേയം മാംസമാഹൃത്യ ശാലാം യക്ഷ്യാമഹേ വയമ് ।
കര്തവ്യം വാസ്തുശമനം സൌമിത്രേ ചിരജീവിഭിഃ ॥ 22 ॥
മൃഗം ഹത്വാഽഽനയ ക്ഷിപ്രം ലക്ഷ്മണേഹ ശുഭേക്ഷണ ।
കര്തവ്യ ശ്ശാസ്ത്രദൃഷ്ടോ ഹി വിധിര്ധര്മമനുസ്മര ॥ 23 ॥
ഭ്രാതുർവചനമാജ്ഞായ ലക്ഷ്മണഃ പരവീരഹാ ।
ചകാര സ യഥോക്തം ച തം രാമ പുനരബ്രവീത് ॥ 24 ॥
ഐണേയം ശ്രപയസ്വൈതച്ഛാലാം യക്ഷ്യാമഹേ വയമ് ।
ത്വര സൌമ്യ മുഹൂര്തോഽയം ധ്രുവശ്ച ദിവസോഽപ്യയമ് ॥ 25 ॥
സ ലക്ഷ്മണഃ കൃഷ്ണമൃഗം മേധ്യം ഹത്വാ പ്രതാപവാന് ।
അഥ ചിക്ഷേപ സൌമിത്രിസ്സമിദ്ധേ ജാതവേദസി ॥ 26 ॥
തംതു പക്വം പരിജ്ഞായ നിഷ്ടപ്തം ഛിന്നശോണിതമ് ।
ലക്ഷ്മണഃ പുരുഷവ്യാഘ്രമഥ രാഘവമബ്രവീത് ॥ 27 ॥
അയം സർവഃ സമസ്താഗ്ങഃ ശ്രൃതഃ കൃഷ്ണമൃഗോ മയാ ।
ദേവതാം ദേവസംകാശ യജസ്വ കുശലോ ഹ്യസി ॥ 28 ॥
രാമഃ സ്നാത്വാ തു നിയതോ ഗുണവാന് ജപ്യകോവിദഃ ।
സംഗ്രഹേണാകരോത് സ്രവാര്ന മംത്രാന് സത്രാവസാനികാന് ॥ 29 ॥
ഇഷ്ട്വാ ദേവഗണാന്സർവാന്വിവേശാഽവസഥം ശുചിഃ ।
ബഭൂവ ച മനോഹ്ലാദോ രാമസ്യാമിതതേജസഃ ॥ 30 ॥
വൈശ്വദേവബലിം കൃത്വാ രൌദ്രം വൈഷ്ണവ മേവ ച ।
വാസ്തുസംശമനീയാനി മംഗലാനി പ്രവര്തയന് ॥ 31 ॥
ജപം ച ന്യായത കൃത്വാ സ്നാത്വാ നദ്യാം യഥാവിധി ।
പാപസംശമനം രാമ ശ്ചകാര ബലിമുത്തമമ് ॥ 32 ॥
വേദിസ്ഥലവിധാനാനി ചൈത്യാന്യായതനാനി ച ।
ആശ്രമസ്യാനുരൂപാണി സ്ഥാപയാമാസ രാഘവഃ ॥ 33 ॥
വന്യൈര്മാല്യൈഃ ഫലൈര്മൂലൈഃ പക്വൈര്മാംസൈര്യഥാവിധി ।
അദ്ഭിര്ജപൈശ്ച വേദോക്തൈര്ദര്ഭൈശ്ച സസമിത്കുശൈഃ ॥ 34 ॥
തൌ തര്പയിത്വാ ഭൂതാനി രാഘവൌ സഹ സീതയാ ।
തദാ വിവിശതു ശ്ശാലാം സുശുഭാം ശുഭലക്ഷണൌ ॥ 35 ॥
താം വൃക്ഷപര്ണച്ഛദനാം മനോജ്ഞാം യഥാപ്രദേശം സുകൃതാം നിവാതാമ് ।
വാസായ സർവേ വിവിശുസ്സമേതാസ്സഭാം യഥാ ദേവഗണാസ്സുധര്മാമ് ॥ 36 ॥
അനേകനാനാമൃഗപക്ഷിസംകുലേ വിചിത്രപത്രസ്തബകൈര്ദ്രുമൈര്യുതേ ।
വനോത്തമേ വ്യാലമൃഗാനുനാദിതേ തദാ വിജഹ്രു സ്സുസുഖം ജിതേംദ്രിയാഃ ॥ 37 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഷട്പംചാശസ്സര്ഗഃ ॥
