śrīmadvālmīkīya rāmāyaṇē ayōdhyākāṇḍam ।
atha ṣaṭpañchāśassargaḥ ।
atha rātryāṃ vyatītāyāmavasuptamanantaram ।
prabōdhayāmāsa śanairlakṣmaṇaṃ raghunandanaḥ ॥ 1 ॥
saumitrē śruṇu vanyānāṃ valgu vyāharatāṃ svanam ।
sampratiṣṭhāmahē kāla prasthānasya parantapa ॥ 2 ॥
sa suptassamayē bhrātrā lakṣmaṇaḥ pratibōdhitaḥ ।
jahau nidrāṃ cha tandrīṃ cha prasaktaṃ cha pathi śramam ॥ 3 ॥
tata utthāya tē sarvē spṛṣṭvā nadyā śśivaṃ jalam ।
panthānamṛṣiṇā'diṣṭaṃ chitrakūṭasya taṃ yayuḥ ॥ 4 ॥
tatassamprasthitaḥ kālē rāmassaumitriṇā saha ।
sītāṃ kamalapatrākṣīmidaṃ vachanamabravīt ॥ 5 ॥
ādiptāniva vaidēhi sarvataḥ puṣpitānnagān ।
svaiḥ puṣpaiḥ kiṃśukān paśya mālinaśiśirātyayē ॥ 6 ॥
paśya bhallātakān phullānnarai ranupasēvitān ।
phalapatrairavanatā nnūnaṃ śakṣyāma jīvitum ॥ 7 ॥
paśya drōṇapramāṇāni lambamānāni lakṣmaṇa ।
madhūni madhukārībhi ssambhṛtāni nagē nagē ॥ 8 ॥
ēṣa krōśati natyūhastaṃ śikhī pratikūjati ।
ramaṇīyē vanōddēśē puṣpasaṃstarasaṅkaṭē ॥ 9 ॥
mātaṅgayūthānusṛtaṃ pakṣisaṃṅghānunāditam ।
chitrakūṭamimaṃ paśya pravṛddhaśikharaṃ girim ॥ 10 ॥
samabhūmitalē ramyē drumairbahubhirāvṛtē ।
puṇyē raṃsyāmahē tāta chitrakūṭasya kānanē ॥ 11 ॥
tatastau pādachārēṇa gachChantau saha sītayā ।
ramyamāsēdatuśśailaṃ chitrakūṭaṃ manōramam ॥ 12 ॥
tantu parvatamāsādya nānāpakṣigaṇāyutam ।
bahumūlaphalaṃ ramyaṃ sampannaṃ sarasōdakam ॥ 13 ॥
manōjñō'yaṃ girissaumya nānādrumalatāyutaḥ ।
bahumūlaphalō ramya ssvājīvaḥ pratibhāti mē ॥ 14 ॥
munayaścha mahātmānō vasantyasmi śilōchchayē ।
ayaṃ vāsō bhavēttāvadatra saumya ramēmahi ॥ 15 ॥
iti sītā cha rāmaścha lakṣmaṇaścha kṛtāñjaliḥ ।
abhigamyā'śramaṃ sarvē vālmīki mabhivādayan ॥ 16 ॥
tānmaharṣi pramuditaḥ pūjayāmāsa dharmavit ।
asyatāmiti chōvācha svāgantu nivēdya cha ॥ 17 ॥
tatō'bravīnmahābāhurlakṣmaṇaṃ lakṣmaṇāgrajaḥ ।
sannivēdya yathānyāya mātmānamṛṣayē prabhuḥ ॥ 18 ॥
lakṣmaṇā''naya dārūṇi dṛḍhāni cha varāṇi cha ।
kuruṣvā'vasathaṃ saumya vāsē mē'bhirataṃ manaḥ ॥ 19 ॥
tasya tadvachanaṃ śrutvā saumitrirvividhān drumān ।
ājahāra tata śchakrē parṇaśālāmarindamaḥ ॥ 20 ॥
tāṃ niṣṭhitāṃ baddhakaṭāṃ dṛṣṭvā rāmassudarśanām ।
śuśrūṣamāṇamēkāgramidaṃ vachanamabravīt ॥ 21 ॥
aiṇēyaṃ māṃsamāhṛtya śālāṃ yakṣyāmahē vayam ।
kartavyaṃ vāstuśamanaṃ saumitrē chirajīvibhiḥ ॥ 22 ॥
mṛgaṃ hatvā''naya kṣipraṃ lakṣmaṇēha śubhēkṣaṇa ।
kartavya śśāstradṛṣṭō hi vidhirdharmamanusmara ॥ 23 ॥
bhrāturvachanamājñāya lakṣmaṇaḥ paravīrahā ।
chakāra sa yathōktaṃ cha taṃ rāma punarabravīt ॥ 24 ॥
aiṇēyaṃ śrapayasvaitachChālāṃ yakṣyāmahē vayam ।
tvara saumya muhūrtō'yaṃ dhruvaścha divasō'pyayam ॥ 25 ॥
sa lakṣmaṇaḥ kṛṣṇamṛgaṃ mēdhyaṃ hatvā pratāpavān ।
atha chikṣēpa saumitrissamiddhē jātavēdasi ॥ 26 ॥
tantu pakvaṃ parijñāya niṣṭaptaṃ Chinnaśōṇitam ।
lakṣmaṇaḥ puruṣavyāghramatha rāghavamabravīt ॥ 27 ॥
ayaṃ sarvaḥ samastāgṅaḥ śrṛtaḥ kṛṣṇamṛgō mayā ।
dēvatāṃ dēvasaṅkāśa yajasva kuśalō hyasi ॥ 28 ॥
rāmaḥ snātvā tu niyatō guṇavān japyakōvidaḥ ।
saṅgrahēṇākarōt sravārna mantrān satrāvasānikān ॥ 29 ॥
iṣṭvā dēvagaṇānsarvānvivēśā'vasathaṃ śuchiḥ ।
babhūva cha manōhlādō rāmasyāmitatējasaḥ ॥ 30 ॥
vaiśvadēvabaliṃ kṛtvā raudraṃ vaiṣṇava mēva cha ।
vāstusaṃśamanīyāni maṅgalāni pravartayan ॥ 31 ॥
japaṃ cha nyāyata kṛtvā snātvā nadyāṃ yathāvidhi ।
pāpasaṃśamanaṃ rāma śchakāra balimuttamam ॥ 32 ॥
vēdisthalavidhānāni chaityānyāyatanāni cha ।
āśramasyānurūpāṇi sthāpayāmāsa rāghavaḥ ॥ 33 ॥
vanyairmālyaiḥ phalairmūlaiḥ pakvairmāṃsairyathāvidhi ।
adbhirjapaiścha vēdōktairdarbhaiścha sasamitkuśaiḥ ॥ 34 ॥
tau tarpayitvā bhūtāni rāghavau saha sītayā ।
tadā viviśatu śśālāṃ suśubhāṃ śubhalakṣaṇau ॥ 35 ॥
tāṃ vṛkṣaparṇachChadanāṃ manōjñāṃ yathāpradēśaṃ sukṛtāṃ nivātām ।
vāsāya sarvē viviśussamētāssabhāṃ yathā dēvagaṇāssudharmām ॥ 36 ॥
anēkanānāmṛgapakṣisaṅkulē vichitrapatrastabakairdrumairyutē ।
vanōttamē vyālamṛgānunāditē tadā vijahru ssusukhaṃ jitēndriyāḥ ॥ 37 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ṣaṭpañchāśassargaḥ ॥
