ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂට්පංචාශස්සර්ගඃ ।
අථ රාත්ර්යාං ව්යතීතායාමවසුප්තමනංතරම් ।
ප්රබෝධයාමාස ශනෛර්ලක්ෂ්මණං රඝුනංදනඃ ॥ 1 ॥
සෞමිත්රේ ශ්රුණු වන්යානාං වල්ගු ව්යාහරතාං ස්වනම් ।
සංප්රතිෂ්ඨාමහේ කාල ප්රස්ථානස්ය පරංතප ॥ 2 ॥
ස සුප්තස්සමයේ භ්රාත්රා ලක්ෂ්මණඃ ප්රතිබෝධිතඃ ।
ජහෞ නිද්රාං ච තංද්රීං ච ප්රසක්තං ච පථි ශ්රමම් ॥ 3 ॥
තත උත්ථාය තේ සර්වේ ස්පෘෂ්ට්වා නද්යා ශ්ශිවං ජලම් ।
පංථානමෘෂිණාऽදිෂ්ටං චිත්රකූටස්ය තං යයුඃ ॥ 4 ॥
තතස්සංප්රස්ථිතඃ කාලේ රාමස්සෞමිත්රිණා සහ ।
සීතාං කමලපත්රාක්ෂීමිදං වචනමබ්රවීත් ॥ 5 ॥
ආදිප්තානිව වෛදේහි සර්වතඃ පුෂ්පිතාන්නගාන් ।
ස්වෛඃ පුෂ්පෛඃ කිංශුකාන් පශ්ය මාලිනශිශිරාත්යයේ ॥ 6 ॥
පශ්ය භල්ලාතකාන් ඵුල්ලාන්නරෛ රනුපසේවිතාන් ।
ඵලපත්රෛරවනතා න්නූනං ශක්ෂ්යාම ජීවිතුම් ॥ 7 ॥
පශ්ය ද්රෝණප්රමාණානි ලංබමානානි ලක්ෂ්මණ ।
මධූනි මධුකාරීභි ස්සංභෘතානි නගේ නගේ ॥ 8 ॥
ඒෂ ක්රෝශති නත්යූහස්තං ශිඛී ප්රතිකූජති ।
රමණීයේ වනෝද්දේශේ පුෂ්පසංස්තරසංකටේ ॥ 9 ॥
මාතංගයූථානුසෘතං පක්ෂිසංංඝානුනාදිතම් ।
චිත්රකූටමිමං පශ්ය ප්රවෘද්ධශිඛරං ගිරිම් ॥ 10 ॥
සමභූමිතලේ රම්යේ ද්රුමෛර්බහුභිරාවෘතේ ।
පුණ්යේ රංස්යාමහේ තාත චිත්රකූටස්ය කානනේ ॥ 11 ॥
තතස්තෞ පාදචාරේණ ගච්ඡංතෞ සහ සීතයා ।
රම්යමාසේදතුශ්ශෛලං චිත්රකූටං මනෝරමම් ॥ 12 ॥
තංතු පර්වතමාසාද්ය නානාපක්ෂිගණායුතම් ।
බහුමූලඵලං රම්යං සංපන්නං සරසෝදකම් ॥ 13 ॥
මනෝජ්ඤෝऽයං ගිරිස්සෞම්ය නානාද්රුමලතායුතඃ ।
බහුමූලඵලෝ රම්ය ස්ස්වාජීවඃ ප්රතිභාති මේ ॥ 14 ॥
මුනයශ්ච මහාත්මානෝ වසංත්යස්මි ශිලෝච්චයේ ।
අයං වාසෝ භවේත්තාවදත්ර සෞම්ය රමේමහි ॥ 15 ॥
ඉති සීතා ච රාමශ්ච ලක්ෂ්මණශ්ච කෘතාංජලිඃ ।
අභිගම්යාऽශ්රමං සර්වේ වාල්මීකි මභිවාදයන් ॥ 16 ॥
තාන්මහර්ෂි ප්රමුදිතඃ පූජයාමාස ධර්මවිත් ।
අස්යතාමිති චෝවාච ස්වාගංතු නිවේද්ය ච ॥ 17 ॥
තතෝऽබ්රවීන්මහාබාහුර්ලක්ෂ්මණං ලක්ෂ්මණාග්රජඃ ।
සන්නිවේද්ය යථාන්යාය මාත්මානමෘෂයේ ප්රභුඃ ॥ 18 ॥
ලක්ෂ්මණාऽऽනය දාරූණි දෘඪානි ච වරාණි ච ।
කුරුෂ්වාऽවසථං සෞම්ය වාසේ මේऽභිරතං මනඃ ॥ 19 ॥
තස්ය තද්වචනං ශ්රුත්වා සෞමිත්රිර්විවිධාන් ද්රුමාන් ।
ආජහාර තත ශ්චක්රේ පර්ණශාලාමරිංදමඃ ॥ 20 ॥
තාං නිෂ්ඨිතාං බද්ධකටාං දෘෂ්ට්වා රාමස්සුදර්ශනාම් ।
ශුශ්රූෂමාණමේකාග්රමිදං වචනමබ්රවීත් ॥ 21 ॥
ඓණේයං මාංසමාහෘත්ය ශාලාං යක්ෂ්යාමහේ වයම් ।
කර්තව්යං වාස්තුශමනං සෞමිත්රේ චිරජීවිභිඃ ॥ 22 ॥
මෘගං හත්වාऽऽනය ක්ෂිප්රං ලක්ෂ්මණේහ ශුභේක්ෂණ ।
කර්තව්ය ශ්ශාස්ත්රදෘෂ්ටෝ හි විධිර්ධර්මමනුස්මර ॥ 23 ॥
භ්රාතුර්වචනමාජ්ඤාය ලක්ෂ්මණඃ පරවීරහා ।
චකාර ස යථෝක්තං ච තං රාම පුනරබ්රවීත් ॥ 24 ॥
ඓණේයං ශ්රපයස්වෛතච්ඡාලාං යක්ෂ්යාමහේ වයම් ।
ත්වර සෞම්ය මුහූර්තෝऽයං ධ්රුවශ්ච දිවසෝऽප්යයම් ॥ 25 ॥
ස ලක්ෂ්මණඃ කෘෂ්ණමෘගං මේධ්යං හත්වා ප්රතාපවාන් ।
අථ චික්ෂේප සෞමිත්රිස්සමිද්ධේ ජාතවේදසි ॥ 26 ॥
තංතු පක්වං පරිජ්ඤාය නිෂ්ටප්තං ඡින්නශෝණිතම් ।
ලක්ෂ්මණඃ පුරුෂව්යාඝ්රමථ රාඝවමබ්රවීත් ॥ 27 ॥
අයං සර්වඃ සමස්තාග්ඞඃ ශ්රෘතඃ කෘෂ්ණමෘගෝ මයා ।
දේවතාං දේවසංකාශ යජස්ව කුශලෝ හ්යසි ॥ 28 ॥
රාමඃ ස්නාත්වා තු නියතෝ ගුණවාන් ජප්යකෝවිදඃ ।
සංග්රහේණාකරෝත් ස්රවාර්න මංත්රාන් සත්රාවසානිකාන් ॥ 29 ॥
ඉෂ්ට්වා දේවගණාන්සර්වාන්විවේශාऽවසථං ශුචිඃ ।
බභූව ච මනෝහ්ලාදෝ රාමස්යාමිතතේජසඃ ॥ 30 ॥
වෛශ්වදේවබලිං කෘත්වා රෞද්රං වෛෂ්ණව මේව ච ।
වාස්තුසංශමනීයානි මංගලානි ප්රවර්තයන් ॥ 31 ॥
ජපං ච න්යායත කෘත්වා ස්නාත්වා නද්යාං යථාවිධි ।
පාපසංශමනං රාම ශ්චකාර බලිමුත්තමම් ॥ 32 ॥
වේදිස්ථලවිධානානි චෛත්යාන්යායතනානි ච ।
ආශ්රමස්යානුරූපාණි ස්ථාපයාමාස රාඝවඃ ॥ 33 ॥
වන්යෛර්මාල්යෛඃ ඵලෛර්මූලෛඃ පක්වෛර්මාංසෛර්යථාවිධි ।
අද්භිර්ජපෛශ්ච වේදෝක්තෛර්දර්භෛශ්ච සසමිත්කුශෛඃ ॥ 34 ॥
තෞ තර්පයිත්වා භූතානි රාඝවෞ සහ සීතයා ।
තදා විවිශතු ශ්ශාලාං සුශුභාං ශුභලක්ෂණෞ ॥ 35 ॥
තාං වෘක්ෂපර්ණච්ඡදනාං මනෝජ්ඤාං යථාප්රදේශං සුකෘතාං නිවාතාම් ।
වාසාය සර්වේ විවිශුස්සමේතාස්සභාං යථා දේවගණාස්සුධර්මාම් ॥ 36 ॥
අනේකනානාමෘගපක්ෂිසංකුලේ විචිත්රපත්රස්තබකෛර්ද්රුමෛර්යුතේ ।
වනෝත්තමේ ව්යාලමෘගානුනාදිතේ තදා විජහ්රු ස්සුසුඛං ජිතේංද්රියාඃ ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂට්පංචාශස්සර්ගඃ ॥
