ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ചതുരശീതിതമസ്സര്ഗഃ ।
തതോ നിവിഷ്ടാം ധ്വജിനീം ഗംഗാമന്വാശ്രിതാം നദീമ് ।
നിഷാദരാജോ ദൃഷ്ട്വൈവ ജ്ഞാതീന്സംത്വരിതോഽഽബ്രവീത് ॥ 1 ॥
മഹതീയമിതസ്സേനാ സാഗരാഭാ പ്രദൃശ്യതേ ।
നാസ്യാംതമധിഗച്ഛാമി മനസാപി വിചിംതയന് ॥ 2 ॥
യഥാ തു ഖലു ദുര്ബുദ്ധിര്ഭരത സ്സ്വയമാഗതഃ ।
സ ഏഷ ഹി മഹാകായഃ കോവിദാരധ്വജോ രഥേ ॥ 3 ॥
ബംധയിഷ്യതി വാ ദാശാനഥവാഽസ്മാന്വധിഷ്യതി ।
അഥ ദാശരഥിം രാമം പിത്രാ രാജ്യാദ്വിവാസിതമ് ॥ 4 ॥
സംപന്നാം ശ്രിയമന്വിച്ഛന്സ്തസ്യ രാജ്ഞ സ്സുദുര്ലഭാമ് ।
ഭരതഃ കൈകയീപുത്രോ ഹംതും സമധിഗച്ഛതി ॥ 5 ॥
ഭര്താചൈവ സഖാചൈവ രാമോ ദാശരഥിര്മമ ।
തസ്യാര്ഥകാമാസ്സന്നദ്ധാ ഗംഗാഽനൂപേ പ്രതിഷ്ഠത ॥ 6 ॥
തിഷ്ഠംതു സർവേ ദാശാശ്ച ഗംഗാമന്വാശ്രിതാ നദീമ് ।
ബലയുക്താ നദീരക്ഷാ മാംസമൂലഫലാശനാഃ ॥ 7 ॥
നാവാം ശതാനാം പംചാനാം കൈവര്താനാം ശതം ശതമ് ।
സന്നദ്ധാനാം തഥാ യൂനാം തിഷ്ഠംത്വിത്യഭ്യചോദയത് ॥ 8 ॥
യദാഽഽദുഷ്ടസ്തു ഭരതോ രാമസ്യേഹ ഭവിഷ്യതി ।
സേയം സ്വസ്തിമതീ സേനാ ഗംഗാമദ്യ തരിഷ്യതി ॥ 9 ॥
ഇത്യുക്ത്വോപായനം ഗൃഹ്യ മത്സ്യമാംസമധൂനി ച ।
അഭിചക്രാമ ഭരതം നിഷാദാധിപതിര്ഗുഹഃ ॥ 10 ॥
തമായാംതം തു സംപ്രേക്ഷ്യ സൂതപുത്രഃ പ്രതാപവാന് ।
ഭരതായാഽചചക്ഷേഽഥ വിനയജ്ഞോ വിനീതവത് ॥ 11 ॥
ഏഷ ജ്ഞാതിസഹസ്രേണ സ്ഥപതിഃ പരിവാരിതഃ ।
കുശലോ ദംഡകാരണ്യേ വൃദ്ധോ ഭ്രാതുശ്ച തേ സഖാ ॥ 12 ॥
തസ്മാത്പശ്യതു കാകുത്സ്ഥ ത്വാം നിഷാദാധിപോ ഗുഹഃ ।
അസംശയം വിജാനീതേ യത്ര തൌ രാമലക്ഷ്മണൌ ॥ 13 ॥
ഏതത്തു വചനം ശ്രുത്വാ സുമംത്രാദ്ഭരത ശ്ശുഭമ് ।
ഉവാച വചനം ശീഘ്രം ഗുഹഃ പശ്യതു മാമിതി ॥ 14 ॥
ലബ്ധ്വാഽഭ്യനുജ്ഞാം സംഹൃഷ്ടോ ജ്ഞാതിഭിഃ പരിവാരിതഃ ।
ആഗമ്യ ഭരതം പ്രഹ്വോ ഗുഹോ വചനമബ്രവീത് ॥ 15 ॥
നിഷ്കുടശ്ചൈവ ദേശോഽയം വംചിതാശ്ചാപി തേ വയമ് ।
നിവേദയാമസ്തേ സർവേ സ്വകേ ദാസകുലേ വസ ॥ 16 ॥
അസ്തി മൂലം ഫലംചൈവ നിഷാദൈസ്സമുപാഹൃതമ് ।
ആര്ദ്രം ച മാംസം ശുഷ്കം ച വന്യം ചോച്ചാവചം മഹത് ॥ 17 ॥
ആശംസേ സ്വാശിതാ സേനാ വത്സ്യതീമാം വിഭാവരീമ് ।
അര്ചിതോ വിവിധൈഃ കാമൈ ശ്ശ്വ സ്സസൈന്യോ ഗമിഷ്യസി ॥ 18 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ചതുരശീതിതമസ്സര്ഗഃ ॥
