𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑍋 𑌨𑌿𑌵𑌿𑌷𑍍𑌟𑌾𑌂 𑌧𑍍𑌵𑌜𑌿𑌨𑍀𑌂 𑌗𑌂𑌗𑌾𑌮𑌨𑍍𑌵𑌾𑌶𑍍𑌰𑌿𑌤𑌾𑌂 𑌨𑌦𑍀𑌮𑍍 ।
𑌨𑌿𑌷𑌾𑌦𑌰𑌾𑌜𑍋 𑌦𑍃𑌷𑍍𑌟𑍍𑌵𑍈𑌵 𑌜𑍍𑌞𑌾𑌤𑍀𑌨𑍍𑌸𑌂𑌤𑍍𑌵𑌰𑌿𑌤𑍋𑌽𑌽𑌬𑍍𑌰𑌵𑍀𑌤𑍍 ॥ 1 ॥
𑌮𑌹𑌤𑍀𑌯𑌮𑌿𑌤𑌸𑍍𑌸𑍇𑌨𑌾 𑌸𑌾𑌗𑌰𑌾𑌭𑌾 𑌪𑍍𑌰𑌦𑍃𑌶𑍍𑌯𑌤𑍇 ।
𑌨𑌾𑌸𑍍𑌯𑌾𑌂𑌤𑌮𑌧𑌿𑌗𑌚𑍍𑌛𑌾𑌮𑌿 𑌮𑌨𑌸𑌾𑌪𑌿 𑌵𑌿𑌚𑌿𑌂𑌤𑌯𑌨𑍍 ॥ 2 ॥
𑌯𑌥𑌾 𑌤𑍁 𑌖𑌲𑍁 𑌦𑍁𑌰𑍍𑌬𑍁𑌦𑍍𑌧𑌿𑌰𑍍𑌭𑌰𑌤 𑌸𑍍𑌸𑍍𑌵𑌯𑌮𑌾𑌗𑌤𑌃 ।
𑌸 𑌏𑌷 𑌹𑌿 𑌮𑌹𑌾𑌕𑌾𑌯𑌃 𑌕𑍋𑌵𑌿𑌦𑌾𑌰𑌧𑍍𑌵𑌜𑍋 𑌰𑌥𑍇 ॥ 3 ॥
𑌬𑌂𑌧𑌯𑌿𑌷𑍍𑌯𑌤𑌿 𑌵𑌾 𑌦𑌾𑌶𑌾𑌨𑌥𑌵𑌾𑌽𑌸𑍍𑌮𑌾𑌨𑍍𑌵𑌧𑌿𑌷𑍍𑌯𑌤𑌿 ।
𑌅𑌥 𑌦𑌾𑌶𑌰𑌥𑌿𑌂 𑌰𑌾𑌮𑌂 𑌪𑌿𑌤𑍍𑌰𑌾 𑌰𑌾𑌜𑍍𑌯𑌾𑌦𑍍𑌵𑌿𑌵𑌾𑌸𑌿𑌤𑌮𑍍 ॥ 4 ॥
𑌸𑌂𑌪𑌨𑍍𑌨𑌾𑌂 𑌶𑍍𑌰𑌿𑌯𑌮𑌨𑍍𑌵𑌿𑌚𑍍𑌛𑌨𑍍𑌸𑍍𑌤𑌸𑍍𑌯 𑌰𑌾𑌜𑍍𑌞 𑌸𑍍𑌸𑍁𑌦𑍁𑌰𑍍𑌲𑌭𑌾𑌮𑍍 ।
𑌭𑌰𑌤𑌃 𑌕𑍈𑌕𑌯𑍀𑌪𑍁𑌤𑍍𑌰𑍋 𑌹𑌂𑌤𑍁𑌂 𑌸𑌮𑌧𑌿𑌗𑌚𑍍𑌛𑌤𑌿 ॥ 5 ॥
𑌭𑌰𑍍𑌤𑌾𑌚𑍈𑌵 𑌸𑌖𑌾𑌚𑍈𑌵 𑌰𑌾𑌮𑍋 𑌦𑌾𑌶𑌰𑌥𑌿𑌰𑍍𑌮𑌮 ।
𑌤𑌸𑍍𑌯𑌾𑌰𑍍𑌥𑌕𑌾𑌮𑌾𑌸𑍍𑌸𑌨𑍍𑌨𑌦𑍍𑌧𑌾 𑌗𑌂𑌗𑌾𑌽𑌨𑍂𑌪𑍇 𑌪𑍍𑌰𑌤𑌿𑌷𑍍𑌠𑌤 ॥ 6 ॥
𑌤𑌿𑌷𑍍𑌠𑌂𑌤𑍁 𑌸𑌰𑍍𑌵𑍇 𑌦𑌾𑌶𑌾𑌶𑍍𑌚 𑌗𑌂𑌗𑌾𑌮𑌨𑍍𑌵𑌾𑌶𑍍𑌰𑌿𑌤𑌾 𑌨𑌦𑍀𑌮𑍍 ।
𑌬𑌲𑌯𑍁𑌕𑍍𑌤𑌾 𑌨𑌦𑍀𑌰𑌕𑍍𑌷𑌾 𑌮𑌾𑌂𑌸𑌮𑍂𑌲𑌫𑌲𑌾𑌶𑌨𑌾𑌃 ॥ ॥
𑌨𑌾𑌵𑌾𑌂 𑌶𑌤𑌾𑌨𑌾𑌂 𑌪𑌂𑌚𑌾𑌨𑌾𑌂 𑌕𑍈𑌵𑌰𑍍𑌤𑌾𑌨𑌾𑌂 𑌶𑌤𑌂 𑌶𑌤𑌮𑍍 ।
𑌸𑌨𑍍𑌨𑌦𑍍𑌧𑌾𑌨𑌾𑌂 𑌤𑌥𑌾 𑌯𑍂𑌨𑌾𑌂 𑌤𑌿𑌷𑍍𑌠𑌂𑌤𑍍𑌵𑌿𑌤𑍍𑌯𑌭𑍍𑌯𑌚𑍋𑌦𑌯𑌤𑍍 ॥ ॥
𑌯𑌦𑌾𑌽𑌽𑌦𑍁𑌷𑍍𑌟𑌸𑍍𑌤𑍁 𑌭𑌰𑌤𑍋 𑌰𑌾𑌮𑌸𑍍𑌯𑍇𑌹 𑌭𑌵𑌿𑌷𑍍𑌯𑌤𑌿 ।
𑌸𑍇𑌯𑌂 𑌸𑍍𑌵𑌸𑍍𑌤𑌿𑌮𑌤𑍀 𑌸𑍇𑌨𑌾 𑌗𑌂𑌗𑌾𑌮𑌦𑍍𑌯 𑌤𑌰𑌿𑌷𑍍𑌯𑌤𑌿 ॥ ॥
𑌇𑌤𑍍𑌯𑍁𑌕𑍍𑌤𑍍𑌵𑍋𑌪𑌾𑌯𑌨𑌂 𑌗𑍃𑌹𑍍𑌯 𑌮𑌤𑍍𑌸𑍍𑌯𑌮𑌾𑌂𑌸𑌮𑌧𑍂𑌨𑌿 𑌚 ।
𑌅𑌭𑌿𑌚𑌕𑍍𑌰𑌾𑌮 𑌭𑌰𑌤𑌂 𑌨𑌿𑌷𑌾𑌦𑌾𑌧𑌿𑌪𑌤𑌿𑌰𑍍𑌗𑍁𑌹𑌃 ॥ 10 ॥
𑌤𑌮𑌾𑌯𑌾𑌂𑌤𑌂 𑌤𑍁 𑌸𑌂𑌪𑍍𑌰𑍇𑌕𑍍𑌷𑍍𑌯 𑌸𑍂𑌤𑌪𑍁𑌤𑍍𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌭𑌰𑌤𑌾𑌯𑌾𑌽𑌚𑌚𑌕𑍍𑌷𑍇𑌽𑌥 𑌵𑌿𑌨𑌯𑌜𑍍𑌞𑍋 𑌵𑌿𑌨𑍀𑌤𑌵𑌤𑍍 ॥ 11 ॥
𑌏𑌷 𑌜𑍍𑌞𑌾𑌤𑌿𑌸𑌹𑌸𑍍𑌰𑍇𑌣 𑌸𑍍𑌥𑌪𑌤𑌿𑌃 𑌪𑌰𑌿𑌵𑌾𑌰𑌿𑌤𑌃 ।
𑌕𑍁𑌶𑌲𑍋 𑌦𑌂𑌡𑌕𑌾𑌰𑌣𑍍𑌯𑍇 𑌵𑍃𑌦𑍍𑌧𑍋 𑌭𑍍𑌰𑌾𑌤𑍁𑌶𑍍𑌚 𑌤𑍇 𑌸𑌖𑌾 ॥ 12 ॥
𑌤𑌸𑍍𑌮𑌾𑌤𑍍𑌪𑌶𑍍𑌯𑌤𑍁 𑌕𑌾𑌕𑍁𑌤𑍍𑌸𑍍𑌥 𑌤𑍍𑌵𑌾𑌂 𑌨𑌿𑌷𑌾𑌦𑌾𑌧𑌿𑌪𑍋 𑌗𑍁𑌹𑌃 ।
𑌅𑌸𑌂𑌶𑌯𑌂 𑌵𑌿𑌜𑌾𑌨𑍀𑌤𑍇 𑌯𑌤𑍍𑌰 𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 13 ॥
𑌏𑌤𑌤𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑍁𑌮𑌂𑌤𑍍𑌰𑌾𑌦𑍍𑌭𑌰𑌤 𑌶𑍍𑌶𑍁𑌭𑌮𑍍 ।
𑌉𑌵𑌾𑌚 𑌵𑌚𑌨𑌂 𑌶𑍀𑌘𑍍𑌰𑌂 𑌗𑍁𑌹𑌃 𑌪𑌶𑍍𑌯𑌤𑍁 𑌮𑌾𑌮𑌿𑌤𑌿 ॥ 14 ॥
𑌲𑌬𑍍𑌧𑍍𑌵𑌾𑌽𑌭𑍍𑌯𑌨𑍁𑌜𑍍𑌞𑌾𑌂 𑌸𑌂𑌹𑍃𑌷𑍍𑌟𑍋 𑌜𑍍𑌞𑌾𑌤𑌿𑌭𑌿𑌃 𑌪𑌰𑌿𑌵𑌾𑌰𑌿𑌤𑌃 ।
𑌆𑌗𑌮𑍍𑌯 𑌭𑌰𑌤𑌂 𑌪𑍍𑌰𑌹𑍍𑌵𑍋 𑌗𑍁𑌹𑍋 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 15 ॥
𑌨𑌿𑌷𑍍𑌕𑍁𑌟𑌶𑍍𑌚𑍈𑌵 𑌦𑍇𑌶𑍋𑌽𑌯𑌂 𑌵𑌂𑌚𑌿𑌤𑌾𑌶𑍍𑌚𑌾𑌪𑌿 𑌤𑍇 𑌵𑌯𑌮𑍍 ।
𑌨𑌿𑌵𑍇𑌦𑌯𑌾𑌮𑌸𑍍𑌤𑍇 𑌸𑌰𑍍𑌵𑍇 𑌸𑍍𑌵𑌕𑍇 𑌦𑌾𑌸𑌕𑍁𑌲𑍇 𑌵𑌸 ॥ 16 ॥
𑌅𑌸𑍍𑌤𑌿 𑌮𑍂𑌲𑌂 𑌫𑌲𑌂𑌚𑍈𑌵 𑌨𑌿𑌷𑌾𑌦𑍈𑌸𑍍𑌸𑌮𑍁𑌪𑌾𑌹𑍃𑌤𑌮𑍍 ।
𑌆𑌰𑍍𑌦𑍍𑌰𑌂 𑌚 𑌮𑌾𑌂𑌸𑌂 𑌶𑍁𑌷𑍍𑌕𑌂 𑌚 𑌵𑌨𑍍𑌯𑌂 𑌚𑍋𑌚𑍍𑌚𑌾𑌵𑌚𑌂 𑌮𑌹𑌤𑍍 ॥ 1 ॥
𑌆𑌶𑌂𑌸𑍇 𑌸𑍍𑌵𑌾𑌶𑌿𑌤𑌾 𑌸𑍇𑌨𑌾 𑌵𑌤𑍍𑌸𑍍𑌯𑌤𑍀𑌮𑌾𑌂 𑌵𑌿𑌭𑌾𑌵𑌰𑍀𑌮𑍍 ।
𑌅𑌰𑍍𑌚𑌿𑌤𑍋 𑌵𑌿𑌵𑌿𑌧𑍈𑌃 𑌕𑌾𑌮𑍈 𑌶𑍍𑌶𑍍𑌵 𑌸𑍍𑌸𑌸𑍈𑌨𑍍𑌯𑍋 𑌗𑌮𑌿𑌷𑍍𑌯𑌸𑌿 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍁𑌰𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥
