śrīmadvālmīkīya rāmāyaṇē ayōdhyākāṇḍam ।
atha chaturaśītitamassargaḥ ।
tatō niviṣṭāṃ dhvajinīṃ gaṅgāmanvāśritāṃ nadīm ।
niṣādarājō dṛṣṭvaiva jñātīnsantvaritō''bravīt ॥ 1 ॥
mahatīyamitassēnā sāgarābhā pradṛśyatē ।
nāsyāntamadhigachChāmi manasāpi vichintayan ॥ 2 ॥
yathā tu khalu durbuddhirbharata ssvayamāgataḥ ।
sa ēṣa hi mahākāyaḥ kōvidāradhvajō rathē ॥ 3 ॥
bandhayiṣyati vā dāśānathavā'smānvadhiṣyati ।
atha dāśarathiṃ rāmaṃ pitrā rājyādvivāsitam ॥ 4 ॥
sampannāṃ śriyamanvichChanstasya rājña ssudurlabhām ।
bharataḥ kaikayīputrō hantuṃ samadhigachChati ॥ 5 ॥
bhartāchaiva sakhāchaiva rāmō dāśarathirmama ।
tasyārthakāmāssannaddhā gaṅgā'nūpē pratiṣṭhata ॥ 6 ॥
tiṣṭhantu sarvē dāśāścha gaṅgāmanvāśritā nadīm ।
balayuktā nadīrakṣā māṃsamūlaphalāśanāḥ ॥ 7 ॥
nāvāṃ śatānāṃ pañchānāṃ kaivartānāṃ śataṃ śatam ।
sannaddhānāṃ tathā yūnāṃ tiṣṭhantvityabhyachōdayat ॥ 8 ॥
yadā''duṣṭastu bharatō rāmasyēha bhaviṣyati ।
sēyaṃ svastimatī sēnā gaṅgāmadya tariṣyati ॥ 9 ॥
ityuktvōpāyanaṃ gṛhya matsyamāṃsamadhūni cha ।
abhichakrāma bharataṃ niṣādādhipatirguhaḥ ॥ 10 ॥
tamāyāntaṃ tu samprēkṣya sūtaputraḥ pratāpavān ।
bharatāyā'chachakṣē'tha vinayajñō vinītavat ॥ 11 ॥
ēṣa jñātisahasrēṇa sthapatiḥ parivāritaḥ ।
kuśalō daṇḍakāraṇyē vṛddhō bhrātuścha tē sakhā ॥ 12 ॥
tasmātpaśyatu kākutstha tvāṃ niṣādādhipō guhaḥ ।
asaṃśayaṃ vijānītē yatra tau rāmalakṣmaṇau ॥ 13 ॥
ētattu vachanaṃ śrutvā sumantrādbharata śśubham ।
uvācha vachanaṃ śīghraṃ guhaḥ paśyatu māmiti ॥ 14 ॥
labdhvā'bhyanujñāṃ saṃhṛṣṭō jñātibhiḥ parivāritaḥ ।
āgamya bharataṃ prahvō guhō vachanamabravīt ॥ 15 ॥
niṣkuṭaśchaiva dēśō'yaṃ vañchitāśchāpi tē vayam ।
nivēdayāmastē sarvē svakē dāsakulē vasa ॥ 16 ॥
asti mūlaṃ phalañchaiva niṣādaissamupāhṛtam ।
ārdraṃ cha māṃsaṃ śuṣkaṃ cha vanyaṃ chōchchāvachaṃ mahat ॥ 17 ॥
āśaṃsē svāśitā sēnā vatsyatīmāṃ vibhāvarīm ।
architō vividhaiḥ kāmai śśva ssasainyō gamiṣyasi ॥ 18 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē chaturaśītitamassargaḥ ॥
