ශ්රීමද්වාල්මීකීය රාමායණේ අරණ්යකාංඩම් ।
අථ ෂට්ත්රිංශස්සර්ගඃ ।
මාරීච ශ්රූයාතාං තාත වචනං මම භාෂතඃ ।
ආර්තෝऽස්මි මම චාර්තස්ය භවාන්හි පරමා ගතිඃ ॥ 1 ॥
ජානීෂේ ත්වං ජනස්ථානේ යථා භ්රාතා ඛරෝ මම ।
දූෂණශ්ච මහාබාහු ස්වසා ශූර්පණඛා ච මේ ॥ 2 ॥
ත්රිශිරාශ්ච මහාතේජා රාක්ෂසඃ පිශිතාශනඃ ।
අන්යේ ච බහවශ්ශූරා ලබ්ධලක්ෂා නිශාචරාඃ ॥ 3 ॥
වසත්නි මන්නියෝගේන නිත්යවාසං ච රාක්ෂසාඃ ।
බාධමානා මහාරණ්යේ මුනීන්වෛ ධර්මචාරිණඃ ॥ 4 ॥
චතුර්දශ සහස්රාණි රක්ෂසාං භීමකර්මණාම් ।
ශූරාණාං ලබ්ධලක්ෂාණාං ඛරචිත්තානුවර්තිනාම් ॥ 5 ॥
තේ ත්විදානීං ජනස්ථානේ වසමානා මහාබලාඃ ।
සංගතාඃ පරමායත්තා රාමේණ සහ සංයුගේ ॥ 6 ॥
නානාප්රහරණෝපේතාඃ ඛරප්රමුඛරාක්ෂසාඃ ।
තේන සංජාතරෝෂේණ රාමේණ රණමූර්ධනි ।
අනුක්ත්වා පරුෂං කිංචිච්ඡරෛර්ව්යාපාරිතං ධනුඃ ॥ 7 ॥
චතුර්දශ සහස්රාණි රක්ෂසාමුග්රතේජසාම් ।
නිහතානි ශරෛස්තීක්ෂ්ණෛර්මානුෂේණ පදාතිනා ॥ 8 ॥
ඛරශ්ච නිහතස්සංඛ්යේ දූෂණශ්ච නිපාතිතඃ ।
හතශ්ච ත්රිශිරාශ්චාපි නිර්භයා දංඩකාඃ කෘතාඃ ॥ 9 ॥
පිත්රා නිරස්තඃ ක්රුද්ධේන සභාර්යඃ ක්ෂීණජීවිතඃ ।
ස හංතා තස්ය සෛන්යස්ය රාමඃ ක්ෂත්රියපාංසනඃ ॥ 10 ॥
දුශ්ශීලඃ කර්කශස්තීක්ෂ්ණෝ මූර්ඛෝ ලුබ්ධෝऽජිතේංද්රියඃ ॥ 11 ॥
ත්යක්තධර්මෝ හ්යධර්මාත්මා භූතානාමහිතේ රතඃ ।
යේන වෛරං විනාऽරණ්යේ සත්වමාශ්රිත්ය කේවලම් ॥ 12 ॥
කර්ණනාසාපහරණාද්භගිනී මේ විරූපිතා ।
තස්යභාර්යාං ජනස්ථානාත්සීතාං සුරසුතෝපමාම් ॥ 13 ॥
ආනයිෂ්යාමි වික්රම්ය සහායස්තත්ර මේ භව ।
ත්වයා හ්යහං සහායේන පාර්ශ්වස්ථේන මහාබල ॥ 14 ॥
භ්රාතෘභිශ්ච සුරාන්යුද්ධේ සමග්රාන්නාභිචිංතයේ ।
තත්සහායෝ භව ත්වං මේ සමර්ථෝ හ්යසි රාක්ෂස ॥ 15 ॥
වීර්යේ යුද්ධේ ච දර්පේ ච න හ්යස්ති සදෘශස්තව ।
උපායජ්ඤෝ මහාන්ශූරස්සර්වමායාවිශාරදඃ ॥ 16 ॥
ඒතදර්ථමහං ප්රාප්තස්ත්වත්සමීපං නිශාචර ।
ශෘණු තත්කර්ම සාහාය්යේ යත්කාර්යං වචනාන්මම ॥ 17 ॥
සෞවර්ණස්ත්වං මෘගෝ භූත්වා චිත්රෝ රජතබිංදුභිඃ ।
ආශ්රමේ තස්ය රාමස්ය සීතායාඃ ප්රමුඛේ චර ॥ 18 ॥
ත්වාං තු නිස්සංශයං සීතා දෘෂ්ට්වා තු මෘගරූපිණම් ।
ගෘහ්යතාමිති භර්තාරං ලක්ෂ්මණං චාභිධාස්යති ॥ 19 ॥
තතස්තයෝරපායේ තු ශූන්යේ සීතාං යථාසුඛම් ।
නිරාබාධෝ හරිෂ්යාමි රාහුශ්චංද්රප්රභාමිව ॥ 20 ॥
තතඃ පශ්චාත්සුඛං රාමේ භාර්යාහරණකර්ශිතේ ।
විස්රබ්ධඃ ප්රහරිෂ්යාමි කෘතාර්ථේනාංතරාත්මනා ॥ 21 ॥
තස්ය රාමකථාං ශ්රුත්වා මාරීචස්ය මහාත්මනඃ ।
ශුෂ්කං සමභවද්වක්ත්රං පරිතප්තා බභූව හ ॥ 22 ॥
ඕෂ්ඨෞ පරිලිහංචුෂ්කෞ නේත්රෛරනිමිෂෛරිව ।
මෘතභූත ඉවාර්තස්තු රාවණං සමුදෛක්ෂත ॥ 23 ॥
ස රාවණං ත්රස්තවිෂණ්ණචේතා මහාවනේ රාමපරාක්රමජ්ඤඃ ।
කෘතාංජලිස්තත්වමුවාච වාක්යං හිතං ච තස්මෛ හිතමාත්මනශ්ච ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂට්ත්රිංශස්සර්ගඃ ॥
