śrīmadvālmīkīya rāmāyaṇē araṇyakāṇḍam ।
atha ṣaṭtriṃśassargaḥ ।
mārīcha śrūyātāṃ tāta vachanaṃ mama bhāṣataḥ ।
ārtō'smi mama chārtasya bhavānhi paramā gatiḥ ॥ 1 ॥
jānīṣē tvaṃ janasthānē yathā bhrātā kharō mama ।
dūṣaṇaścha mahābāhu svasā śūrpaṇakhā cha mē ॥ 2 ॥
triśirāścha mahātējā rākṣasaḥ piśitāśanaḥ ।
anyē cha bahavaśśūrā labdhalakṣā niśācharāḥ ॥ 3 ॥
vasatni manniyōgēna nityavāsaṃ cha rākṣasāḥ ।
bādhamānā mahāraṇyē munīnvai dharmachāriṇaḥ ॥ 4 ॥
chaturdaśa sahasrāṇi rakṣasāṃ bhīmakarmaṇām ।
śūrāṇāṃ labdhalakṣāṇāṃ kharachittānuvartinām ॥ 5 ॥
tē tvidānīṃ janasthānē vasamānā mahābalāḥ ।
saṅgatāḥ paramāyattā rāmēṇa saha saṃyugē ॥ 6 ॥
nānāpraharaṇōpētāḥ kharapramukharākṣasāḥ ।
tēna sañjātarōṣēṇa rāmēṇa raṇamūrdhani ।
anuktvā paruṣaṃ kiñchichCharairvyāpāritaṃ dhanuḥ ॥ 7 ॥
chaturdaśa sahasrāṇi rakṣasāmugratējasām ।
nihatāni śaraistīkṣṇairmānuṣēṇa padātinā ॥ 8 ॥
kharaścha nihatassaṅkhyē dūṣaṇaścha nipātitaḥ ।
hataścha triśirāśchāpi nirbhayā daṇḍakāḥ kṛtāḥ ॥ 9 ॥
pitrā nirastaḥ kruddhēna sabhāryaḥ kṣīṇajīvitaḥ ।
sa hantā tasya sainyasya rāmaḥ kṣatriyapāṃsanaḥ ॥ 10 ॥
duśśīlaḥ karkaśastīkṣṇō mūrkhō lubdhō'jitēndriyaḥ ॥ 11 ॥
tyaktadharmō hyadharmātmā bhūtānāmahitē rataḥ ।
yēna vairaṃ vinā'raṇyē satvamāśritya kēvalam ॥ 12 ॥
karṇanāsāpaharaṇādbhaginī mē virūpitā ।
tasyabhāryāṃ janasthānātsītāṃ surasutōpamām ॥ 13 ॥
ānayiṣyāmi vikramya sahāyastatra mē bhava ।
tvayā hyahaṃ sahāyēna pārśvasthēna mahābala ॥ 14 ॥
bhrātṛbhiścha surānyuddhē samagrānnābhichintayē ।
tatsahāyō bhava tvaṃ mē samarthō hyasi rākṣasa ॥ 15 ॥
vīryē yuddhē cha darpē cha na hyasti sadṛśastava ।
upāyajñō mahānśūrassarvamāyāviśāradaḥ ॥ 16 ॥
ētadarthamahaṃ prāptastvatsamīpaṃ niśāchara ।
śṛṇu tatkarma sāhāyyē yatkāryaṃ vachanānmama ॥ 17 ॥
sauvarṇastvaṃ mṛgō bhūtvā chitrō rajatabindubhiḥ ।
āśramē tasya rāmasya sītāyāḥ pramukhē chara ॥ 18 ॥
tvāṃ tu nissaṃśayaṃ sītā dṛṣṭvā tu mṛgarūpiṇam ।
gṛhyatāmiti bhartāraṃ lakṣmaṇaṃ chābhidhāsyati ॥ 19 ॥
tatastayōrapāyē tu śūnyē sītāṃ yathāsukham ।
nirābādhō hariṣyāmi rāhuśchandraprabhāmiva ॥ 20 ॥
tataḥ paśchātsukhaṃ rāmē bhāryāharaṇakarśitē ।
visrabdhaḥ prahariṣyāmi kṛtārthēnāntarātmanā ॥ 21 ॥
tasya rāmakathāṃ śrutvā mārīchasya mahātmanaḥ ।
śuṣkaṃ samabhavadvaktraṃ paritaptā babhūva ha ॥ 22 ॥
ōṣṭhau parilihañchuṣkau nētrairanimiṣairiva ।
mṛtabhūta ivārtastu rāvaṇaṃ samudaikṣata ॥ 23 ॥
sa rāvaṇaṃ trastaviṣaṇṇachētā mahāvanē rāmaparākramajñaḥ ।
kṛtāñjalistatvamuvācha vākyaṃ hitaṃ cha tasmai hitamātmanaścha ॥ 24 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē ṣaṭtriṃśassargaḥ ॥
