ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഷട്ത്രിംശസ്സര്ഗഃ ।
മാരീച ശ്രൂയാതാം താത വചനം മമ ഭാഷതഃ ।
ആര്തോഽസ്മി മമ ചാര്തസ്യ ഭവാന്ഹി പരമാ ഗതിഃ ॥ 1 ॥
ജാനീഷേ ത്വം ജനസ്ഥാനേ യഥാ ഭ്രാതാ ഖരോ മമ ।
ദൂഷണശ്ച മഹാബാഹു സ്വസാ ശൂര്പണഖാ ച മേ ॥ 2 ॥
ത്രിശിരാശ്ച മഹാതേജാ രാക്ഷസഃ പിശിതാശനഃ ।
അന്യേ ച ബഹവശ്ശൂരാ ലബ്ധലക്ഷാ നിശാചരാഃ ॥ 3 ॥
വസത്നി മന്നിയോഗേന നിത്യവാസം ച രാക്ഷസാഃ ।
ബാധമാനാ മഹാരണ്യേ മുനീന്വൈ ധര്മചാരിണഃ ॥ 4 ॥
ചതുര്ദശ സഹസ്രാണി രക്ഷസാം ഭീമകര്മണാമ് ।
ശൂരാണാം ലബ്ധലക്ഷാണാം ഖരചിത്താനുവര്തിനാമ് ॥ 5 ॥
തേ ത്വിദാനീം ജനസ്ഥാനേ വസമാനാ മഹാബലാഃ ।
സംഗതാഃ പരമായത്താ രാമേണ സഹ സംയുഗേ ॥ 6 ॥
നാനാപ്രഹരണോപേതാഃ ഖരപ്രമുഖരാക്ഷസാഃ ।
തേന സംജാതരോഷേണ രാമേണ രണമൂര്ധനി ।
അനുക്ത്വാ പരുഷം കിംചിച്ഛരൈർവ്യാപാരിതം ധനുഃ ॥ 7 ॥
ചതുര്ദശ സഹസ്രാണി രക്ഷസാമുഗ്രതേജസാമ് ।
നിഹതാനി ശരൈസ്തീക്ഷ്ണൈര്മാനുഷേണ പദാതിനാ ॥ 8 ॥
ഖരശ്ച നിഹതസ്സംഖ്യേ ദൂഷണശ്ച നിപാതിതഃ ।
ഹതശ്ച ത്രിശിരാശ്ചാപി നിര്ഭയാ ദംഡകാഃ കൃതാഃ ॥ 9 ॥
പിത്രാ നിരസ്തഃ ക്രുദ്ധേന സഭാര്യഃ ക്ഷീണജീവിതഃ ।
സ ഹംതാ തസ്യ സൈന്യസ്യ രാമഃ ക്ഷത്രിയപാംസനഃ ॥ 10 ॥
ദുശ്ശീലഃ കര്കശസ്തീക്ഷ്ണോ മൂര്ഖോ ലുബ്ധോഽജിതേംദ്രിയഃ ॥ 11 ॥
ത്യക്തധര്മോ ഹ്യധര്മാത്മാ ഭൂതാനാമഹിതേ രതഃ ।
യേന വൈരം വിനാഽരണ്യേ സത്വമാശ്രിത്യ കേവലമ് ॥ 12 ॥
കര്ണനാസാപഹരണാദ്ഭഗിനീ മേ വിരൂപിതാ ।
തസ്യഭാര്യാം ജനസ്ഥാനാത്സീതാം സുരസുതോപമാമ് ॥ 13 ॥
ആനയിഷ്യാമി വിക്രമ്യ സഹായസ്തത്ര മേ ഭവ ।
ത്വയാ ഹ്യഹം സഹായേന പാര്ശ്വസ്ഥേന മഹാബല ॥ 14 ॥
ഭ്രാതൃഭിശ്ച സുരാന്യുദ്ധേ സമഗ്രാന്നാഭിചിംതയേ ।
തത്സഹായോ ഭവ ത്വം മേ സമര്ഥോ ഹ്യസി രാക്ഷസ ॥ 15 ॥
വീര്യേ യുദ്ധേ ച ദര്പേ ച ന ഹ്യസ്തി സദൃശസ്തവ ।
ഉപായജ്ഞോ മഹാന്ശൂരസ്സർവമായാവിശാരദഃ ॥ 16 ॥
ഏതദര്ഥമഹം പ്രാപ്തസ്ത്വത്സമീപം നിശാചര ।
ശൃണു തത്കര്മ സാഹായ്യേ യത്കാര്യം വചനാന്മമ ॥ 17 ॥
സൌവര്ണസ്ത്വം മൃഗോ ഭൂത്വാ ചിത്രോ രജതബിംദുഭിഃ ।
ആശ്രമേ തസ്യ രാമസ്യ സീതായാഃ പ്രമുഖേ ചര ॥ 18 ॥
ത്വാം തു നിസ്സംശയം സീതാ ദൃഷ്ട്വാ തു മൃഗരൂപിണമ് ।
ഗൃഹ്യതാമിതി ഭര്താരം ലക്ഷ്മണം ചാഭിധാസ്യതി ॥ 19 ॥
തതസ്തയോരപായേ തു ശൂന്യേ സീതാം യഥാസുഖമ് ।
നിരാബാധോ ഹരിഷ്യാമി രാഹുശ്ചംദ്രപ്രഭാമിവ ॥ 20 ॥
തതഃ പശ്ചാത്സുഖം രാമേ ഭാര്യാഹരണകര്ശിതേ ।
വിസ്രബ്ധഃ പ്രഹരിഷ്യാമി കൃതാര്ഥേനാംതരാത്മനാ ॥ 21 ॥
തസ്യ രാമകഥാം ശ്രുത്വാ മാരീചസ്യ മഹാത്മനഃ ।
ശുഷ്കം സമഭവദ്വക്ത്രം പരിതപ്താ ബഭൂവ ഹ ॥ 22 ॥
ഓഷ്ഠൌ പരിലിഹംചുഷ്കൌ നേത്രൈരനിമിഷൈരിവ ।
മൃതഭൂത ഇവാര്തസ്തു രാവണം സമുദൈക്ഷത ॥ 23 ॥
സ രാവണം ത്രസ്തവിഷണ്ണചേതാ മഹാവനേ രാമപരാക്രമജ്ഞഃ ।
കൃതാംജലിസ്തത്വമുവാച വാക്യം ഹിതം ച തസ്മൈ ഹിതമാത്മനശ്ച ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഷട്ത്രിംശസ്സര്ഗഃ ॥
