શ્રીમદ્વાલ્મીકીય રામાયણે અરણ્યકાંડમ્ ।
અથ ષટ્ત્રિંશસ્સર્ગઃ ।
મારીચ શ્રૂયાતાં તાત વચનં મમ ભાષતઃ ।
આર્તોઽસ્મિ મમ ચાર્તસ્ય ભવાન્હિ પરમા ગતિઃ ॥ 1 ॥
જાનીષે ત્વં જનસ્થાને યથા ભ્રાતા ખરો મમ ।
દૂષણશ્ચ મહાબાહુ સ્વસા શૂર્પણખા ચ મે ॥ 2 ॥
ત્રિશિરાશ્ચ મહાતેજા રાક્ષસઃ પિશિતાશનઃ ।
અન્યે ચ બહવશ્શૂરા લબ્ધલક્ષા નિશાચરાઃ ॥ 3 ॥
વસત્નિ મન્નિયોગેન નિત્યવાસં ચ રાક્ષસાઃ ।
બાધમાના મહારણ્યે મુનીન્વૈ ધર્મચારિણઃ ॥ 4 ॥
ચતુર્દશ સહસ્રાણિ રક્ષસાં ભીમકર્મણામ્ ।
શૂરાણાં લબ્ધલક્ષાણાં ખરચિત્તાનુવર્તિનામ્ ॥ 5 ॥
તે ત્વિદાનીં જનસ્થાને વસમાના મહાબલાઃ ।
સંગતાઃ પરમાયત્તા રામેણ સહ સંયુગે ॥ 6 ॥
નાનાપ્રહરણોપેતાઃ ખરપ્રમુખરાક્ષસાઃ ।
તેન સંજાતરોષેણ રામેણ રણમૂર્ધનિ ।
અનુક્ત્વા પરુષં કિંચિચ્છરૈર્વ્યાપારિતં ધનુઃ ॥ 7 ॥
ચતુર્દશ સહસ્રાણિ રક્ષસામુગ્રતેજસામ્ ।
નિહતાનિ શરૈસ્તીક્ષ્ણૈર્માનુષેણ પદાતિના ॥ 8 ॥
ખરશ્ચ નિહતસ્સંખ્યે દૂષણશ્ચ નિપાતિતઃ ।
હતશ્ચ ત્રિશિરાશ્ચાપિ નિર્ભયા દંડકાઃ કૃતાઃ ॥ 9 ॥
પિત્રા નિરસ્તઃ ક્રુદ્ધેન સભાર્યઃ ક્ષીણજીવિતઃ ।
સ હંતા તસ્ય સૈન્યસ્ય રામઃ ક્ષત્રિયપાંસનઃ ॥ 10 ॥
દુશ્શીલઃ કર્કશસ્તીક્ષ્ણો મૂર્ખો લુબ્ધોઽજિતેંદ્રિયઃ ॥ 11 ॥
ત્યક્તધર્મો હ્યધર્માત્મા ભૂતાનામહિતે રતઃ ।
યેન વૈરં વિનાઽરણ્યે સત્વમાશ્રિત્ય કેવલમ્ ॥ 12 ॥
કર્ણનાસાપહરણાદ્ભગિની મે વિરૂપિતા ।
તસ્યભાર્યાં જનસ્થાનાત્સીતાં સુરસુતોપમામ્ ॥ 13 ॥
આનયિષ્યામિ વિક્રમ્ય સહાયસ્તત્ર મે ભવ ।
ત્વયા હ્યહં સહાયેન પાર્શ્વસ્થેન મહાબલ ॥ 14 ॥
ભ્રાતૃભિશ્ચ સુરાન્યુદ્ધે સમગ્રાન્નાભિચિંતયે ।
તત્સહાયો ભવ ત્વં મે સમર્થો હ્યસિ રાક્ષસ ॥ 15 ॥
વીર્યે યુદ્ધે ચ દર્પે ચ ન હ્યસ્તિ સદૃશસ્તવ ।
ઉપાયજ્ઞો મહાન્શૂરસ્સર્વમાયાવિશારદઃ ॥ 16 ॥
એતદર્થમહં પ્રાપ્તસ્ત્વત્સમીપં નિશાચર ।
શૃણુ તત્કર્મ સાહાય્યે યત્કાર્યં વચનાન્મમ ॥ 17 ॥
સૌવર્ણસ્ત્વં મૃગો ભૂત્વા ચિત્રો રજતબિંદુભિઃ ।
આશ્રમે તસ્ય રામસ્ય સીતાયાઃ પ્રમુખે ચર ॥ 18 ॥
ત્વાં તુ નિસ્સંશયં સીતા દૃષ્ટ્વા તુ મૃગરૂપિણમ્ ।
ગૃહ્યતામિતિ ભર્તારં લક્ષ્મણં ચાભિધાસ્યતિ ॥ 19 ॥
તતસ્તયોરપાયે તુ શૂન્યે સીતાં યથાસુખમ્ ।
નિરાબાધો હરિષ્યામિ રાહુશ્ચંદ્રપ્રભામિવ ॥ 20 ॥
તતઃ પશ્ચાત્સુખં રામે ભાર્યાહરણકર્શિતે ।
વિસ્રબ્ધઃ પ્રહરિષ્યામિ કૃતાર્થેનાંતરાત્મના ॥ 21 ॥
તસ્ય રામકથાં શ્રુત્વા મારીચસ્ય મહાત્મનઃ ।
શુષ્કં સમભવદ્વક્ત્રં પરિતપ્તા બભૂવ હ ॥ 22 ॥
ઓષ્ઠૌ પરિલિહંચુષ્કૌ નેત્રૈરનિમિષૈરિવ ।
મૃતભૂત ઇવાર્તસ્તુ રાવણં સમુદૈક્ષત ॥ 23 ॥
સ રાવણં ત્રસ્તવિષણ્ણચેતા મહાવને રામપરાક્રમજ્ઞઃ ।
કૃતાંજલિસ્તત્વમુવાચ વાક્યં હિતં ચ તસ્મૈ હિતમાત્મનશ્ચ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે ષટ્ત્રિંશસ્સર્ગઃ ॥
