ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଷଟ୍ତ୍ରିଂଶସ୍ସର୍ଗଃ ।
ମାରୀଚ ଶ୍ରୂୟାତାଂ ତାତ ଵଚନଂ ମମ ଭାଷତଃ ।
ଆର୍ତୋଽସ୍ମି ମମ ଚାର୍ତସ୍ୟ ଭଵାନ୍ହି ପରମା ଗତିଃ ॥ 1 ॥
ଜାନୀଷେ ତ୍ଵଂ ଜନସ୍ଥାନେ ୟଥା ଭ୍ରାତା ଖରୋ ମମ ।
ଦୂଷଣଶ୍ଚ ମହାବାହୁ ସ୍ଵସା ଶୂର୍ପଣଖା ଚ ମେ ॥ 2 ॥
ତ୍ରିଶିରାଶ୍ଚ ମହାତେଜା ରାକ୍ଷସଃ ପିଶିତାଶନଃ ।
ଅନ୍ୟେ ଚ ବହଵଶ୍ଶୂରା ଲବ୍ଧଲକ୍ଷା ନିଶାଚରାଃ ॥ 3 ॥
ଵସତ୍ନି ମନ୍ନିୟୋଗେନ ନିତ୍ୟଵାସଂ ଚ ରାକ୍ଷସାଃ ।
ବାଧମାନା ମହାରଣ୍ୟେ ମୁନୀନ୍ଵୈ ଧର୍ମଚାରିଣଃ ॥ 4 ॥
ଚତୁର୍ଦଶ ସହସ୍ରାଣି ରକ୍ଷସାଂ ଭୀମକର୍ମଣାମ୍ ।
ଶୂରାଣାଂ ଲବ୍ଧଲକ୍ଷାଣାଂ ଖରଚିତ୍ତାନୁଵର୍ତିନାମ୍ ॥ 5 ॥
ତେ ତ୍ଵିଦାନୀଂ ଜନସ୍ଥାନେ ଵସମାନା ମହାବଲାଃ ।
ସଂଗତାଃ ପରମାୟତ୍ତା ରାମେଣ ସହ ସଂୟୁଗେ ॥ 6 ॥
ନାନାପ୍ରହରଣୋପେତାଃ ଖରପ୍ରମୁଖରାକ୍ଷସାଃ ।
ତେନ ସଂଜାତରୋଷେଣ ରାମେଣ ରଣମୂର୍ଧନି ।
ଅନୁକ୍ତ୍ଵା ପରୁଷଂ କିଂଚିଚ୍ଛରୈର୍ଵ୍ୟାପାରିତଂ ଧନୁଃ ॥ 7 ॥
ଚତୁର୍ଦଶ ସହସ୍ରାଣି ରକ୍ଷସାମୁଗ୍ରତେଜସାମ୍ ।
ନିହତାନି ଶରୈସ୍ତୀକ୍ଷ୍ଣୈର୍ମାନୁଷେଣ ପଦାତିନା ॥ 8 ॥
ଖରଶ୍ଚ ନିହତସ୍ସଂଖ୍ୟେ ଦୂଷଣଶ୍ଚ ନିପାତିତଃ ।
ହତଶ୍ଚ ତ୍ରିଶିରାଶ୍ଚାପି ନିର୍ଭୟା ଦଂଡକାଃ କୃତାଃ ॥ 9 ॥
ପିତ୍ରା ନିରସ୍ତଃ କ୍ରୁଦ୍ଧେନ ସଭାର୍ୟଃ କ୍ଷୀଣଜୀଵିତଃ ।
ସ ହଂତା ତସ୍ୟ ସୈନ୍ୟସ୍ୟ ରାମଃ କ୍ଷତ୍ରିୟପାଂସନଃ ॥ 10 ॥
ଦୁଶ୍ଶୀଲଃ କର୍କଶସ୍ତୀକ୍ଷ୍ଣୋ ମୂର୍ଖୋ ଲୁବ୍ଧୋଽଜିତେଂଦ୍ରିୟଃ ॥ 11 ॥
ତ୍ୟକ୍ତଧର୍ମୋ ହ୍ୟଧର୍ମାତ୍ମା ଭୂତାନାମହିତେ ରତଃ ।
ୟେନ ଵୈରଂ ଵିନାଽରଣ୍ୟେ ସତ୍ଵମାଶ୍ରିତ୍ୟ କେଵଲମ୍ ॥ 12 ॥
କର୍ଣନାସାପହରଣାଦ୍ଭଗିନୀ ମେ ଵିରୂପିତା ।
ତସ୍ୟଭାର୍ୟାଂ ଜନସ୍ଥାନାତ୍ସୀତାଂ ସୁରସୁତୋପମାମ୍ ॥ 13 ॥
ଆନୟିଷ୍ୟାମି ଵିକ୍ରମ୍ୟ ସହାୟସ୍ତତ୍ର ମେ ଭଵ ।
ତ୍ଵୟା ହ୍ୟହଂ ସହାୟେନ ପାର୍ଶ୍ଵସ୍ଥେନ ମହାବଲ ॥ 14 ॥
ଭ୍ରାତୃଭିଶ୍ଚ ସୁରାନ୍ୟୁଦ୍ଧେ ସମଗ୍ରାନ୍ନାଭିଚିଂତୟେ ।
ତତ୍ସହାୟୋ ଭଵ ତ୍ଵଂ ମେ ସମର୍ଥୋ ହ୍ୟସି ରାକ୍ଷସ ॥ 15 ॥
ଵୀର୍ୟେ ୟୁଦ୍ଧେ ଚ ଦର୍ପେ ଚ ନ ହ୍ୟସ୍ତି ସଦୃଶସ୍ତଵ ।
ଉପାୟଜ୍ଞୋ ମହାନ୍ଶୂରସ୍ସର୍ଵମାୟାଵିଶାରଦଃ ॥ 16 ॥
ଏତଦର୍ଥମହଂ ପ୍ରାପ୍ତସ୍ତ୍ଵତ୍ସମୀପଂ ନିଶାଚର ।
ଶୃଣୁ ତତ୍କର୍ମ ସାହାୟ୍ୟେ ୟତ୍କାର୍ୟଂ ଵଚନାନ୍ମମ ॥ 17 ॥
ସୌଵର୍ଣସ୍ତ୍ଵଂ ମୃଗୋ ଭୂତ୍ଵା ଚିତ୍ରୋ ରଜତବିଂଦୁଭିଃ ।
ଆଶ୍ରମେ ତସ୍ୟ ରାମସ୍ୟ ସୀତାୟାଃ ପ୍ରମୁଖେ ଚର ॥ 18 ॥
ତ୍ଵାଂ ତୁ ନିସ୍ସଂଶୟଂ ସୀତା ଦୃଷ୍ଟ୍ଵା ତୁ ମୃଗରୂପିଣମ୍ ।
ଗୃହ୍ୟତାମିତି ଭର୍ତାରଂ ଲକ୍ଷ୍ମଣଂ ଚାଭିଧାସ୍ୟତି ॥ 19 ॥
ତତସ୍ତୟୋରପାୟେ ତୁ ଶୂନ୍ୟେ ସୀତାଂ ୟଥାସୁଖମ୍ ।
ନିରାବାଧୋ ହରିଷ୍ୟାମି ରାହୁଶ୍ଚଂଦ୍ରପ୍ରଭାମିଵ ॥ 20 ॥
ତତଃ ପଶ୍ଚାତ୍ସୁଖଂ ରାମେ ଭାର୍ୟାହରଣକର୍ଶିତେ ।
ଵିସ୍ରବ୍ଧଃ ପ୍ରହରିଷ୍ୟାମି କୃତାର୍ଥେନାଂତରାତ୍ମନା ॥ 21 ॥
ତସ୍ୟ ରାମକଥାଂ ଶ୍ରୁତ୍ଵା ମାରୀଚସ୍ୟ ମହାତ୍ମନଃ ।
ଶୁଷ୍କଂ ସମଭଵଦ୍ଵକ୍ତ୍ରଂ ପରିତପ୍ତା ବଭୂଵ ହ ॥ 22 ॥
ଓଷ୍ଠୌ ପରିଲିହଂଚୁଷ୍କୌ ନେତ୍ରୈରନିମିଷୈରିଵ ।
ମୃତଭୂତ ଇଵାର୍ତସ୍ତୁ ରାଵଣଂ ସମୁଦୈକ୍ଷତ ॥ 23 ॥
ସ ରାଵଣଂ ତ୍ରସ୍ତଵିଷଣ୍ଣଚେତା ମହାଵନେ ରାମପରାକ୍ରମଜ୍ଞଃ ।
କୃତାଂଜଲିସ୍ତତ୍ଵମୁଵାଚ ଵାକ୍ୟଂ ହିତଂ ଚ ତସ୍ମୈ ହିତମାତ୍ମନଶ୍ଚ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଷଟ୍ତ୍ରିଂଶସ୍ସର୍ଗଃ ॥
