𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌸𑌾 𑌤𑌥𑍋𑌕𑍍𑌤𑌾 𑌤𑍁 𑌵𑍈𑌦𑍇𑌹𑍀 𑌨𑌿𑌰𑍍𑌭𑌯𑌾 𑌶𑍋𑌕𑌕𑌰𑍍𑌶𑌿𑌤𑌾 ।
𑌤𑍃𑌣𑌮𑌂𑌤𑌰𑌤𑌃 𑌕𑍃𑌤𑍍𑌵𑌾 𑌰𑌾𑌵𑌣𑌂 𑌪𑍍𑌰𑌤𑍍𑌯𑌭𑌾𑌷𑌤 ॥ 1 ॥
𑌰𑌾𑌜𑌾 𑌦𑌶𑌰𑌥𑍋 𑌨𑌾𑌮 𑌧𑌰𑍍𑌮𑌸𑍇𑌤𑍁𑌰𑌿𑌵𑌾𑌚𑌲𑌃 ।
𑌸𑌤𑍍𑌯𑌸𑌂𑌧𑌃 𑌪𑌰𑌿𑌜𑍍𑌞𑌾𑌤𑍋 𑌯𑌸𑍍𑌯 𑌪𑍁𑌤𑍍𑌰𑌸𑍍𑌸𑌰𑌾𑌘𑌵𑌃 ॥ 2 ॥
𑌰𑌾𑌮𑍋 𑌨𑌾𑌮 𑌸 𑌧𑌰𑍍𑌮𑌾𑌤𑍍𑌮𑌾 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌵𑌿𑌶𑍍𑌰𑍁𑌤𑌃 ।
𑌦𑍀𑌰𑍍𑌘𑌬𑌾𑌹𑍁𑌰𑍍𑌵𑌿𑌶𑌾𑌲𑌾𑌕𑍍𑌷𑍋 𑌦𑍈𑌵𑌤𑌂 𑌹𑌿 𑌪𑌤𑌿𑌰𑍍𑌮𑌮 ॥ 3 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌲𑍇 𑌜𑌾𑌤𑌸𑍍𑌸𑌿𑌂𑌹𑌸𑍍𑌕𑌂𑌧𑍋 𑌮𑌹𑌾𑌦𑍍𑌯𑍁𑌤𑌿𑌃 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌯𑌸𑍍𑌤𑍇 𑌪𑍍𑌰𑌾𑌣𑌾𑌨𑍍𑌹𑌰𑌿𑌷𑍍𑌯𑌤𑌿 ॥ 4 ॥
𑌪𑍍𑌰𑌤𑍍𑌯𑌕𑍍𑌷𑌂 𑌯𑌦𑍍𑌯𑌹𑌂 𑌤𑌸𑍍𑌯 𑌤𑍍𑌵𑌯𑌾 𑌸𑍍𑌯𑌾𑌂 𑌧𑌰𑍍𑌷𑌿𑌤𑌾 𑌬𑌲𑌾𑌤𑍍 ।
𑌶𑌯𑌿𑌤𑌾 𑌤𑍍𑌵𑌂 𑌹𑌤𑌸𑍍𑌸𑌂𑌖𑍍𑌯𑍇 𑌜𑌨𑌸𑍍𑌥𑌾𑌨𑍇 𑌯𑌥𑌾 𑌖𑌰𑌃 ॥ 5 ॥
𑌯 𑌏𑌤𑍇 𑌰𑌾𑌕𑍍𑌷𑌸𑌾𑌃 𑌪𑍍𑌰𑍋𑌕𑍍𑌤𑌾 𑌘𑍋𑌰𑌰𑍂𑌪𑌾 𑌮𑌹𑌾𑌬𑌲𑌾𑌃 ।
𑌰𑌾𑌘𑌵𑍇 𑌨𑌿𑌰𑍍𑌵𑌿𑌷𑌾𑌸𑍍𑌸𑌰𑍍𑌵𑍇 𑌸𑍁𑌪𑌰𑍍𑌣𑍇 𑌪𑌨𑍍𑌨𑌗𑌾 𑌯𑌥𑌾 ॥ 6 ॥
𑌤𑌸𑍍𑌯 𑌜𑍍𑌯𑌾𑌵𑌿𑌪𑍍𑌰𑌮𑍁𑌕𑍍𑌤𑌾𑌸𑍍𑌤𑍇 𑌶𑌰𑌾𑌃 𑌕𑌾𑌂𑌚𑌨𑌭𑍂𑌷𑌣𑌾𑌃 ।
𑌶𑌰𑍀𑌰𑌂 𑌵𑌿𑌧𑌮𑌿𑌷𑍍𑌯𑌂𑌤𑌿 𑌗𑌂𑌗𑌾𑌕𑍂𑌲𑌮𑌿𑌵𑍋𑌰𑍍𑌮𑌯𑌃 ॥ ॥
𑌅𑌸𑍁𑌰𑍈𑌰𑍍𑌵𑌾 𑌸𑍁𑌰𑍈𑌰𑍍𑌵𑌾 𑌤𑍍𑌵𑌂 𑌯𑌦𑍍𑌯𑌵𑌧𑍍𑌯𑍋𑌽𑌸𑌿 𑌰𑌾𑌵𑌣 ।
𑌉𑌤𑍍𑌪𑌾𑌦𑍍𑌯 𑌸𑍁𑌮𑌹𑌦𑍍𑌵𑍈𑌰𑌂 𑌜𑍀𑌵𑌂𑌸𑍍𑌤𑌸𑍍𑌯 𑌨 𑌮𑍋𑌕𑍍𑌷𑍍𑌯𑌸𑍇 ॥ ॥
𑌸 𑌤𑍇 𑌜𑍀𑌵𑌿𑌤𑌶𑍇𑌷𑌸𑍍𑌯 𑌰𑌾𑌘𑌵𑍋𑌽𑌂𑌤𑌕𑌰𑍋 𑌬𑌲𑍀 ।
𑌪𑌶𑍋𑌰𑍍𑌯𑍂𑌪𑌗𑌤𑌸𑍍𑌯𑍇𑌵 𑌜𑍀𑌵𑌿𑌤𑌂 𑌤𑌵 𑌦𑍁𑌰𑍍𑌲𑌭𑌮𑍍 ॥ ॥
𑌯𑌦𑌿 𑌪𑌶𑍍𑌯𑍇𑌤𑍍𑌸 𑌰𑌾𑌮𑌸𑍍𑌤𑍍𑌵𑌾𑌂 𑌰𑍋𑌷𑌦𑍀𑌪𑍍𑌤𑍇𑌨 𑌚𑌕𑍍𑌷𑍁𑌷𑌾 ।
𑌰𑌕𑍍𑌷𑌸𑍍𑌤𑍍𑌵𑌮𑌦𑍍𑌯 𑌨𑌿𑌰𑍍𑌧𑌗𑍍𑌧𑍋 𑌗𑌚𑍍𑌛𑍇𑌸𑍍𑌸𑌦𑍍𑌯𑌃 𑌪𑌰𑌾𑌭𑌵𑌮𑍍 ॥ 10 ॥
𑌯𑌶𑍍𑌚𑌂𑌦𑍍𑌰𑌂 𑌨𑌭𑌸𑍋 𑌭𑍂𑌮𑍌 𑌪𑌾𑌤𑌯𑍇𑌨𑍍𑌨𑌾𑌶𑌯𑍇𑌤 𑌵𑌾 ।
𑌸𑌾𑌗𑌰𑌂 𑌶𑍋𑌷𑌯𑍇𑌦𑍍𑌵𑌾𑌪𑌿 𑌸 𑌸𑍀𑌤𑌾𑌂 𑌮𑍋𑌚𑌯𑍇𑌦𑌿𑌹 ॥ 11 ॥
𑌗𑌤𑌾𑌯𑍁𑌸𑍍𑌤𑍍𑌵𑌂 𑌗𑌤𑌶𑍍𑌰𑍀𑌕𑍋 𑌗𑌤𑌸𑌤𑍍𑌤𑍍𑌵 𑌗𑌤𑍇𑌂𑌦𑍍𑌰𑌿𑌯𑌃 ।
𑌲𑌂𑌕𑌾 𑌵𑍈𑌧𑌵𑍍𑌯𑌸𑌂𑌯𑍁𑌕𑍍𑌤𑌾 𑌤𑍍𑌵𑌤𑍍𑌕𑍃𑌤𑍇𑌨 𑌭𑌵𑌿𑌷𑍍𑌯𑌤𑌿 ॥ 12 ॥
𑌨 𑌤𑍇 𑌪𑌾𑌪𑌮𑌿𑌦𑌂 𑌕𑌰𑍍𑌮 𑌶𑍁𑌖𑍋𑌦𑌰𑍍𑌕𑌂 𑌭𑌵𑌿𑌷𑍍𑌯𑌤𑌿 ।
𑌯𑌾𑌽𑌹𑌂 𑌨𑍀𑌤𑌾 𑌵𑌿𑌨𑌾𑌭𑌾𑌵𑌂 𑌪𑌤𑌿𑌪𑌾𑌰𑍍𑌶𑍍𑌵𑌾𑌤𑍍𑌤𑍍𑌵𑌯𑌾 𑌵𑌨𑍇 ॥ 13 ॥
𑌸 𑌹𑌿 𑌦𑍈𑌵𑌤𑌸𑌂𑌯𑍁𑌕𑍍𑌤𑍋 𑌮𑌮 𑌭𑌰𑍍𑌤𑌾 𑌮𑌹𑌾𑌦𑍍𑌯𑍁𑌤𑌿𑌃 ।
𑌨𑌿𑌰𑍍𑌭𑌯𑍋 𑌵𑍀𑌰𑍍𑌯𑌮𑌾𑌶𑍍𑌰𑌿𑌤𑍍𑌯 𑌶𑍂𑌨𑍍𑌯𑍇 𑌵𑌸𑌤𑌿 𑌦𑌂𑌡𑌕𑍇 ॥ 14 ॥
𑌸 𑌤𑍇 𑌦𑌰𑍍𑌪𑌂 𑌬𑌲𑌂 𑌵𑍀𑌰𑍍𑌯𑌮𑍁𑌤𑍍𑌸𑍇𑌕𑌂 𑌚 𑌤𑌥𑌾𑌵𑌿𑌧𑌮𑍍 ।
𑌅𑌪𑌨𑍇𑌷𑍍𑌯𑌤𑌿 𑌗𑌾𑌤𑍍𑌰𑍇𑌭𑍍𑌯𑌶𑍍𑌶𑌰𑌵𑌰𑍍𑌷𑍇𑌣 𑌸𑌂𑌯𑍁𑌗𑍇 ॥ 15 ॥
𑌯𑌦𑌾 𑌵𑌿𑌨𑌾𑌶𑍋 𑌭𑍂𑌤𑌾𑌨𑌾𑌂 𑌦𑍃𑌶𑍍𑌯𑌤𑍇 𑌕𑌾𑌲𑌚𑍋𑌦𑌿𑌤𑌃 ।
𑌤𑌦𑌾 𑌕𑌾𑌰𑍍𑌯𑍇 𑌪𑍍𑌰𑌮𑌾𑌦𑍍𑌯𑌂𑌤𑌿 𑌨𑌰𑌾𑌃 𑌕𑌾𑌲𑌵𑌶𑌂 𑌗𑌤𑌾𑌃 ॥ 16 ॥
𑌮𑌾𑌂 𑌪𑍍𑌰𑌧𑍃𑌷𑍍𑌯 𑌸 𑌤𑍇 𑌕𑌾𑌲𑌃 𑌪𑍍𑌰𑌾𑌪𑍍𑌤𑍋𑌽𑌯𑌂 𑌰𑌾𑌕𑍍𑌷𑌸𑌾𑌧𑌮 ।
𑌆𑌤𑍍𑌮𑌨𑍋 𑌰𑌾𑌕𑍍𑌷𑌸𑌾𑌨𑌾𑌂 𑌚 𑌵𑌧𑌾𑌯𑌾𑌂𑌤𑌃𑌪𑍁𑌰𑌸𑍍𑌯 𑌚 ॥ 1 ॥
𑌨 𑌶𑌕𑍍𑌯𑌾 𑌯𑌜𑍍𑌞𑌮𑌧𑍍𑌯𑌸𑍍𑌥𑌾 𑌵𑍇𑌦𑍀 𑌸𑍃𑌗𑍍𑌭𑌾𑌂𑌡𑌮𑌂𑌡𑌿𑌤𑌾 ।
𑌦𑍍𑌵𑌿𑌜𑌾𑌤𑌿𑌮𑌂𑌤𑍍𑌰𑌪𑍂𑌤𑌾 𑌚 𑌚𑌂𑌡𑌾𑌲𑍇𑌨𑌾𑌵𑌮𑌰𑍍𑌦𑌿𑌤𑍁𑌮𑍍 ॥ 1 ॥
𑌤𑌥𑌾𑌽𑌹𑌂 𑌧𑌰𑍍𑌮𑌨𑌿𑌤𑍍𑌯𑌸𑍍𑌯 𑌧𑌰𑍍𑌮𑌪𑌤𑍍𑌨𑍀 𑌪𑌤𑌿𑌵𑍍𑌰𑌤𑌾 ।
𑌤𑍍𑌵𑌯𑌾 𑌸𑍍𑌪𑍃𑌷𑍍𑌟𑍁𑌂 𑌨 𑌶𑌕𑍍𑌯𑌾𑌸𑍍𑌮𑌿 𑌰𑌾𑌕𑍍𑌷𑌸𑌾𑌧𑌮 𑌪𑌾𑌪𑌿𑌨𑌾 ॥ 1 ॥
𑌕𑍍𑌰𑍀𑌡𑌂𑌤𑍀 𑌰𑌾𑌜𑌹𑌂𑌸𑍇𑌨 𑌪𑌦𑍍𑌮𑌷𑌂𑌡𑍇𑌷𑍁 𑌨𑌿𑌤𑍍𑌯𑌦𑌾 ।
𑌹𑌂𑌸𑍀 𑌸𑌾 𑌤𑍃𑌣𑌷𑌂𑌡𑌸𑍍𑌥𑌂 𑌕𑌥𑌂 𑌪𑌶𑍍𑌯𑍇𑌤 𑌮𑌦𑍍𑌗𑍁𑌕𑌮𑍍 ॥ 20 ॥
𑌇𑌦𑌂 𑌶𑌰𑍀𑌰𑌂 𑌨𑌿𑌸𑍍𑌸𑌂𑌜𑍍𑌞𑌂 𑌬𑌂𑌧 𑌵𑌾 𑌖𑌾𑌤𑌯𑌸𑍍𑌵 𑌵𑌾 ।
𑌨𑍇𑌦𑌂 𑌶𑌰𑍀𑌰𑌂 𑌰𑌕𑍍𑌷𑌯𑌂 𑌮𑍇 𑌜𑍀𑌵𑌿𑌤𑌂 𑌵𑌾𑌪𑌿 𑌰𑌾𑌕𑍍𑌷𑌸 ॥ 21 ॥
𑌨 𑌤𑍁 𑌶𑌕𑍍𑌷𑍍𑌯𑌾𑌮𑍍𑌯𑍁𑌪𑌕𑍍𑌰𑍋𑌶𑌂 𑌪𑍃𑌥𑌿𑌵𑍍𑌯𑌾𑌂 𑌦𑌾𑌤𑍁𑌮𑌾𑌤𑍍𑌮𑌨𑌃 ।
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌵𑍈𑌦𑍇𑌹𑍀 𑌕𑍍𑌰𑍋𑌧𑌾𑌤𑍍𑌸𑍁𑌪𑌰𑍁𑌷𑌂 𑌵𑌚𑌃 ॥ 22 ॥
𑌰𑌾𑌵𑌣𑌂 𑌮𑍈𑌥𑌿𑌲𑍀 𑌤𑌤𑍍𑌰 𑌪𑍁𑌨𑌰𑍍𑌨𑍋𑌵𑌾𑌚 𑌕𑌿𑌂𑌚𑌨 ।
𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌪𑌰𑍁𑌷𑌂 𑌰𑍋𑌮𑌹𑌰𑍍𑌷𑌣𑌮𑍍 ॥ 23 ॥
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑌸𑍍𑌸𑍀𑌤𑌾𑌂 𑌭𑌯𑌸𑌂𑌦𑌰𑍍𑌶𑌨𑌂 𑌵𑌚𑌃 ।
𑌶𑍃𑌣𑍁 𑌮𑍈𑌥𑌿𑌲𑌿 𑌮𑌦𑍍𑌵𑌾𑌕𑍍𑌯𑌂 𑌮𑌾𑌸𑌾𑌂𑌦𑍍𑌵𑌾𑌦𑌶 𑌭𑌾𑌮𑌿𑌨𑌿 ॥ 24 ॥
𑌕𑌾𑌲𑍇𑌨𑌾𑌨𑍇𑌨 𑌨𑌾𑌭𑍍𑌯𑍇𑌷𑌿 𑌯𑌦𑌿 𑌮𑌾𑌂 𑌚𑌾𑌰𑍁𑌹𑌾𑌸𑌿𑌨𑌿 ।
𑌤𑌤𑌸𑍍𑌤𑍍𑌵𑌾𑌂 𑌪𑍍𑌰𑌾𑌤𑌰𑌾𑌶𑌾𑌰𑍍𑌥𑌂 𑌸𑍂𑌦𑌾𑌶𑍍𑌛𑍇𑌤𑍍𑌸𑍍𑌯𑌂𑌤𑌿 𑌲𑍇𑌶𑌶𑌃 ॥ 25 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌪𑌰𑍁𑌷𑌂 𑌵𑌾𑌕𑍍𑌯𑌂 𑌰𑌾𑌵𑌣𑌶𑍍𑌶𑌤𑍍𑌰𑍁𑌰𑌾𑌵𑌣𑌃 ।
𑌰𑌾𑌕𑍍𑌷𑌸𑍀𑌶𑍍𑌚 𑌤𑌤𑌃 𑌕𑍍𑌰𑍁𑌦𑍍𑌧 𑌇𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 26 ॥
𑌶𑍀𑌘𑍍𑌰𑌮𑍇𑌵 𑌹𑌿 𑌰𑌾𑌕𑍍𑌷𑌸𑍍𑌯𑍋 𑌵𑌿𑌕𑍃𑌤𑌾 𑌘𑍋𑌰𑌦𑌰𑍍𑌶𑌨𑌾𑌃 ।
𑌦𑌰𑍍𑌪𑌮𑌸𑍍𑌯𑌾 𑌵𑌿𑌨𑍇𑌷𑍍𑌯𑌧𑍍𑌵𑌂 𑌮𑌾𑌂𑌸𑌶𑍋𑌣𑌿𑌤𑌭𑍋𑌜𑌨𑌾𑌃 ॥ 2 ॥
𑌵𑌚𑌨𑌾𑌦𑍇𑌵 𑌤𑌾𑌸𑍍𑌤𑌸𑍍𑌯 𑌸𑍁𑌘𑍋𑌰𑌾 𑌰𑌾𑌕𑍍𑌷𑌸𑍀𑌗𑌣𑌾𑌃 ।
𑌕𑍃𑌤𑌪𑍍𑌰𑌾𑌂𑌜𑌲𑌯𑍋 𑌭𑍂𑌤𑍍𑌵𑌾 𑌮𑍈𑌥𑌿𑌲𑍀𑌂 𑌪𑌰𑍍𑌯𑌵𑌾𑌰𑌯𑌨𑍍 ॥ 2 ॥
𑌸 𑌤𑌾𑌃 𑌪𑍍𑌰𑍋𑌵𑌾𑌚 𑌰𑌾𑌜𑌾 𑌤𑍁 𑌰𑌾𑌵𑌣𑍋 𑌘𑍋𑌰𑌦𑌰𑍍𑌶𑌨𑌃 ।
𑌪𑍍𑌰𑌚𑌾𑌲𑍍𑌯 𑌚𑌰𑌣𑍋𑌤𑍍𑌕𑌰𑍍𑌷𑍈𑌰𑍍𑌦𑌾𑌰𑌯𑌨𑍍𑌨𑌿𑌵 𑌮𑍇𑌦𑌿𑌨𑍀𑌮𑍍 ॥ 2 ॥
𑌅𑌶𑍋𑌕𑌵𑌨𑌿𑌕𑌾𑌮𑌧𑍍𑌯𑍇 𑌮𑍈𑌥𑌿𑌲𑍀 𑌨𑍀𑌯𑌤𑌾𑌮𑌿𑌯𑌮𑍍 ।
𑌤𑌤𑍍𑌰𑍇𑌯𑌂 𑌰𑌕𑍍𑌷𑍍𑌯𑌤𑌾𑌂 𑌗𑍂𑌢𑌂 𑌯𑍁𑌷𑍍𑌮𑌾𑌭𑌿𑌃 𑌪𑌰𑌿𑌵𑌾𑌰𑌿𑌤𑌾 ॥ 30 ॥
𑌤𑌤𑍍𑌰𑍈𑌨𑌾𑌂 𑌤𑌰𑍍𑌜𑌨𑍈𑌰𑍍𑌘𑍋𑌰𑍈𑌃 𑌪𑍁𑌨𑌸𑍍𑌸𑌾𑌂𑌤𑍍𑌵𑍈𑌶𑍍𑌚 𑌮𑍈𑌥𑌿𑌲𑍀𑌮𑍍 ।
𑌆𑌨𑌯𑌧𑍍𑌵𑌂 𑌵𑌶𑌂 𑌸𑌰𑍍𑌵𑌾 𑌵𑌨𑍍𑌯𑌾𑌂 𑌗𑌜𑌵𑌧𑍂𑌮𑌿𑌵 ॥ 31 ॥
𑌇𑌤𑌿 𑌪𑍍𑌰𑌤𑌿𑌸𑌮𑌾𑌦𑌿𑌷𑍍𑌟𑌾 𑌰𑌾𑌕𑍍𑌷𑌸𑍍𑌯𑍋 𑌰𑌾𑌵𑌣𑍇𑌨 𑌤𑌾𑌃 ।
𑌅𑌶𑍋𑌕𑌵𑌨𑌿𑌕𑌾𑌂 𑌜𑌗𑍍𑌮𑍁𑌰𑍍𑌮𑍈𑌥𑌿𑌲𑍀𑌂 𑌪𑌰𑌿𑌗𑍃𑌹𑍍𑌯 𑌤𑍁 ॥ 32 ॥
𑌸𑌰𑍍𑌵𑌕𑌾𑌲𑌫𑌲𑍈𑌰𑍍𑌵𑍃𑌕𑍍𑌷𑍈𑌰𑍍𑌨𑌾𑌨𑌾𑌪𑍁𑌷𑍍𑌪𑌫𑌲𑍈𑌰𑍍𑌵𑍃𑌤𑌾𑌮𑍍 ।
𑌸𑌰𑍍𑌵𑌕𑌾𑌲𑌮𑌦𑍈𑌶𑍍𑌚𑌾𑌪𑌿 𑌦𑍍𑌵𑌿𑌜𑍈𑌸𑍍𑌸𑌮𑍁𑌪𑌸𑍇𑌵𑌿𑌤𑌾𑌮𑍍 ॥ 33 ॥
𑌸𑌾 𑌤𑍁 𑌶𑍋𑌕𑌪𑌰𑍀𑌤𑌾𑌂𑌗𑍀 𑌮𑍈𑌥𑌿𑌲𑍀 𑌜𑌨𑌕𑌾𑌤𑍍𑌮𑌜𑌾 ।
𑌰𑌾𑌕𑍍𑌷𑌸𑍀𑌵𑌶𑌮𑌾𑌪𑌨𑍍𑌨𑌾 𑌵𑍍𑌯𑌾𑌘𑍍𑌰𑍀𑌣𑌾𑌂 𑌹𑌰𑌿𑌣𑍀 𑌯𑌥𑌾 ॥ 34 ॥
𑌶𑍋𑌕𑍇𑌨 𑌮𑌹𑌤𑌾 𑌗𑍍𑌰𑌸𑍍𑌤𑌾 𑌮𑍈𑌥𑌿𑌲𑍀 𑌜𑌨𑌕𑌾𑌤𑍍𑌮𑌜𑌾 ।
𑌨 𑌶𑌰𑍍𑌮 𑌲𑌭𑌤𑍇 𑌭𑍀𑌰𑍁𑌃 𑌪𑌾𑌶𑌬𑌦𑍍𑌧𑌾 𑌮𑍃𑌗𑍀 𑌯𑌥𑌾 ॥ 35 ॥
𑌨 𑌵𑌿𑌂𑌦𑌤𑍇 𑌤𑌤𑍍𑌰 𑌤𑍁 𑌶𑌰𑍍𑌮 𑌮𑍈𑌥𑌿𑌲𑍀 𑌵𑌿𑌰𑍂𑌪𑌨𑍇𑌤𑍍𑌰𑌾𑌭𑌿𑌰𑌤𑍀𑌵 𑌤𑌰𑍍𑌜𑌿𑌤𑌾 ।
𑌪𑌤𑌿𑌂 𑌸𑍍𑌮𑌰𑌂𑌤𑍀 𑌦𑌯𑌿𑌤𑌂 𑌚 𑌦𑍇𑌵𑌤𑌂 𑌵𑌿𑌚𑍇𑌤𑌨𑌾𑌽𑌭𑍂𑌦𑍍𑌭𑌯𑌶𑍋𑌕𑌪𑍀𑌡𑌿𑌤𑌾 ॥ 36 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌷𑌟𑍍𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
