ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഷട്പംചാശസ്സര്ഗഃ ।
സാ തഥോക്താ തു വൈദേഹീ നിര്ഭയാ ശോകകര്ശിതാ ।
തൃണമംതരതഃ കൃത്വാ രാവണം പ്രത്യഭാഷത ॥ 1 ॥
രാജാ ദശരഥോ നാമ ധര്മസേതുരിവാചലഃ ।
സത്യസംധഃ പരിജ്ഞാതോ യസ്യ പുത്രസ്സരാഘവഃ ॥ 2 ॥
രാമോ നാമ സ ധര്മാത്മാ ത്രിഷു ലോകേഷു വിശ്രുതഃ ।
ദീര്ഘബാഹുർവിശാലാക്ഷോ ദൈവതം ഹി പതിര്മമ ॥ 3 ॥
ഇക്ഷ്വാകൂണാം കുലേ ജാതസ്സിംഹസ്കംധോ മഹാദ്യുതിഃ ।
ലക്ഷ്മണേന സഹ ഭ്രാത്രാ യസ്തേ പ്രാണാന്ഹരിഷ്യതി ॥ 4 ॥
പ്രത്യക്ഷം യദ്യഹം തസ്യ ത്വയാ സ്യാം ധര്ഷിതാ ബലാത് ।
ശയിതാ ത്വം ഹതസ്സംഖ്യേ ജനസ്ഥാനേ യഥാ ഖരഃ ॥ 5 ॥
യ ഏതേ രാക്ഷസാഃ പ്രോക്താ ഘോരരൂപാ മഹാബലാഃ ।
രാഘവേ നിർവിഷാസ്സർവേ സുപര്ണേ പന്നഗാ യഥാ ॥ 6 ॥
തസ്യ ജ്യാവിപ്രമുക്താസ്തേ ശരാഃ കാംചനഭൂഷണാഃ ।
ശരീരം വിധമിഷ്യംതി ഗംഗാകൂലമിവോര്മയഃ ॥ 7 ॥
അസുരൈർവാ സുരൈർവാ ത്വം യദ്യവധ്യോഽസി രാവണ ।
ഉത്പാദ്യ സുമഹദ്വൈരം ജീവംസ്തസ്യ ന മോക്ഷ്യസേ ॥ 8 ॥
സ തേ ജീവിതശേഷസ്യ രാഘവോഽംതകരോ ബലീ ।
പശോര്യൂപഗതസ്യേവ ജീവിതം തവ ദുര്ലഭമ് ॥ 9 ॥
യദി പശ്യേത്സ രാമസ്ത്വാം രോഷദീപ്തേന ചക്ഷുഷാ ।
രക്ഷസ്ത്വമദ്യ നിര്ധഗ്ധോ ഗച്ഛേസ്സദ്യഃ പരാഭവമ് ॥ 10 ॥
യശ്ചംദ്രം നഭസോ ഭൂമൌ പാതയേന്നാശയേത വാ ।
സാഗരം ശോഷയേദ്വാപി സ സീതാം മോചയേദിഹ ॥ 11 ॥
ഗതായുസ്ത്വം ഗതശ്രീകോ ഗതസത്ത്വ ഗതേംദ്രിയഃ ।
ലംകാ വൈധവ്യസംയുക്താ ത്വത്കൃതേന ഭവിഷ്യതി ॥ 12 ॥
ന തേ പാപമിദം കര്മ ശുഖോദര്കം ഭവിഷ്യതി ।
യാഽഹം നീതാ വിനാഭാവം പതിപാര്ശ്വാത്ത്വയാ വനേ ॥ 13 ॥
സ ഹി ദൈവതസംയുക്തോ മമ ഭര്താ മഹാദ്യുതിഃ ।
നിര്ഭയോ വീര്യമാശ്രിത്യ ശൂന്യേ വസതി ദംഡകേ ॥ 14 ॥
സ തേ ദര്പം ബലം വീര്യമുത്സേകം ച തഥാവിധമ് ।
അപനേഷ്യതി ഗാത്രേഭ്യശ്ശരവര്ഷേണ സംയുഗേ ॥ 15 ॥
യദാ വിനാശോ ഭൂതാനാം ദൃശ്യതേ കാലചോദിതഃ ।
തദാ കാര്യേ പ്രമാദ്യംതി നരാഃ കാലവശം ഗതാഃ ॥ 16 ॥
മാം പ്രധൃഷ്യ സ തേ കാലഃ പ്രാപ്തോഽയം രാക്ഷസാധമ ।
ആത്മനോ രാക്ഷസാനാം ച വധായാംതഃപുരസ്യ ച ॥ 17 ॥
ന ശക്യാ യജ്ഞമധ്യസ്ഥാ വേദീ സൃഗ്ഭാംഡമംഡിതാ ।
ദ്വിജാതിമംത്രപൂതാ ച ചംഡാലേനാവമര്ദിതുമ് ॥ 18 ॥
തഥാഽഹം ധര്മനിത്യസ്യ ധര്മപത്നീ പതിവ്രതാ ।
ത്വയാ സ്പൃഷ്ടും ന ശക്യാസ്മി രാക്ഷസാധമ പാപിനാ ॥ 19 ॥
ക്രീഡംതീ രാജഹംസേന പദ്മഷംഡേഷു നിത്യദാ ।
ഹംസീ സാ തൃണഷംഡസ്ഥം കഥം പശ്യേത മദ്ഗുകമ് ॥ 20 ॥
ഇദം ശരീരം നിസ്സംജ്ഞം ബംധ വാ ഖാതയസ്വ വാ ।
നേദം ശരീരം രക്ഷയം മേ ജീവിതം വാപി രാക്ഷസ ॥ 21 ॥
ന തു ശക്ഷ്യാമ്യുപക്രോശം പൃഥിവ്യാം ദാതുമാത്മനഃ ।
ഏവമുക്ത്വാ തു വൈദേഹീ ക്രോധാത്സുപരുഷം വചഃ ॥ 22 ॥
രാവണം മൈഥിലീ തത്ര പുനര്നോവാച കിംചന ।
സീതായാ വചനം ശ്രുത്വാ പരുഷം രോമഹര്ഷണമ് ॥ 23 ॥
പ്രത്യുവാച തതസ്സീതാം ഭയസംദര്ശനം വചഃ ।
ശൃണു മൈഥിലി മദ്വാക്യം മാസാംദ്വാദശ ഭാമിനി ॥ 24 ॥
കാലേനാനേന നാഭ്യേഷി യദി മാം ചാരുഹാസിനി ।
തതസ്ത്വാം പ്രാതരാശാര്ഥം സൂദാശ്ഛേത്സ്യംതി ലേശശഃ ॥ 25 ॥
ഇത്യുക്ത്വാ പരുഷം വാക്യം രാവണശ്ശത്രുരാവണഃ ।
രാക്ഷസീശ്ച തതഃ ക്രുദ്ധ ഇദം വചനമബ്രവീത് ॥ 26 ॥
ശീഘ്രമേവ ഹി രാക്ഷസ്യോ വികൃതാ ഘോരദര്ശനാഃ ।
ദര്പമസ്യാ വിനേഷ്യധ്വം മാംസശോണിതഭോജനാഃ ॥ 27 ॥
വചനാദേവ താസ്തസ്യ സുഘോരാ രാക്ഷസീഗണാഃ ।
കൃതപ്രാംജലയോ ഭൂത്വാ മൈഥിലീം പര്യവാരയന് ॥ 28 ॥
സ താഃ പ്രോവാച രാജാ തു രാവണോ ഘോരദര്ശനഃ ।
പ്രചാല്യ ചരണോത്കര്ഷൈര്ദാരയന്നിവ മേദിനീമ് ॥ 29 ॥
അശോകവനികാമധ്യേ മൈഥിലീ നീയതാമിയമ് ।
തത്രേയം രക്ഷ്യതാം ഗൂഢം യുഷ്മാഭിഃ പരിവാരിതാ ॥ 30 ॥
തത്രൈനാം തര്ജനൈര്ഘോരൈഃ പുനസ്സാംത്വൈശ്ച മൈഥിലീമ് ।
ആനയധ്വം വശം സർവാ വന്യാം ഗജവധൂമിവ ॥ 31 ॥
ഇതി പ്രതിസമാദിഷ്ടാ രാക്ഷസ്യോ രാവണേന താഃ ।
അശോകവനികാം ജഗ്മുര്മൈഥിലീം പരിഗൃഹ്യ തു ॥ 32 ॥
സർവകാലഫലൈർവൃക്ഷൈര്നാനാപുഷ്പഫലൈർവൃതാമ് ।
സർവകാലമദൈശ്ചാപി ദ്വിജൈസ്സമുപസേവിതാമ് ॥ 33 ॥
സാ തു ശോകപരീതാംഗീ മൈഥിലീ ജനകാത്മജാ ।
രാക്ഷസീവശമാപന്നാ വ്യാഘ്രീണാം ഹരിണീ യഥാ ॥ 34 ॥
ശോകേന മഹതാ ഗ്രസ്താ മൈഥിലീ ജനകാത്മജാ ।
ന ശര്മ ലഭതേ ഭീരുഃ പാശബദ്ധാ മൃഗീ യഥാ ॥ 35 ॥
ന വിംദതേ തത്ര തു ശര്മ മൈഥിലീ വിരൂപനേത്രാഭിരതീവ തര്ജിതാ ।
പതിം സ്മരംതീ ദയിതം ച ദേവതം വിചേതനാഽഭൂദ്ഭയശോകപീഡിതാ ॥ 36 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഷട്പംചാശസ്സര്ഗഃ ॥
