ශ්රීමද්වාල්මීකීය රාමායණේ අරණ්යකාංඩම් ।
අථ ෂට්පංචාශස්සර්ගඃ ।
සා තථෝක්තා තු වෛදේහී නිර්භයා ශෝකකර්ශිතා ।
තෘණමංතරතඃ කෘත්වා රාවණං ප්රත්යභාෂත ॥ 1 ॥
රාජා දශරථෝ නාම ධර්මසේතුරිවාචලඃ ।
සත්යසංධඃ පරිජ්ඤාතෝ යස්ය පුත්රස්සරාඝවඃ ॥ 2 ॥
රාමෝ නාම ස ධර්මාත්මා ත්රිෂු ලෝකේෂු විශ්රුතඃ ।
දීර්ඝබාහුර්විශාලාක්ෂෝ දෛවතං හි පතිර්මම ॥ 3 ॥
ඉක්ෂ්වාකූණාං කුලේ ජාතස්සිංහස්කංධෝ මහාද්යුතිඃ ।
ලක්ෂ්මණේන සහ භ්රාත්රා යස්තේ ප්රාණාන්හරිෂ්යති ॥ 4 ॥
ප්රත්යක්ෂං යද්යහං තස්ය ත්වයා ස්යාං ධර්ෂිතා බලාත් ।
ශයිතා ත්වං හතස්සංඛ්යේ ජනස්ථානේ යථා ඛරඃ ॥ 5 ॥
ය ඒතේ රාක්ෂසාඃ ප්රෝක්තා ඝෝරරූපා මහාබලාඃ ।
රාඝවේ නිර්විෂාස්සර්වේ සුපර්ණේ පන්නගා යථා ॥ 6 ॥
තස්ය ජ්යාවිප්රමුක්තාස්තේ ශරාඃ කාංචනභූෂණාඃ ।
ශරීරං විධමිෂ්යංති ගංගාකූලමිවෝර්මයඃ ॥ 7 ॥
අසුරෛර්වා සුරෛර්වා ත්වං යද්යවධ්යෝऽසි රාවණ ।
උත්පාද්ය සුමහද්වෛරං ජීවංස්තස්ය න මෝක්ෂ්යසේ ॥ 8 ॥
ස තේ ජීවිතශේෂස්ය රාඝවෝऽංතකරෝ බලී ।
පශෝර්යූපගතස්යේව ජීවිතං තව දුර්ලභම් ॥ 9 ॥
යදි පශ්යේත්ස රාමස්ත්වාං රෝෂදීප්තේන චක්ෂුෂා ।
රක්ෂස්ත්වමද්ය නිර්ධග්ධෝ ගච්ඡේස්සද්යඃ පරාභවම් ॥ 10 ॥
යශ්චංද්රං නභසෝ භූමෞ පාතයේන්නාශයේත වා ।
සාගරං ශෝෂයේද්වාපි ස සීතාං මෝචයේදිහ ॥ 11 ॥
ගතායුස්ත්වං ගතශ්රීකෝ ගතසත්ත්ව ගතේංද්රියඃ ।
ලංකා වෛධව්යසංයුක්තා ත්වත්කෘතේන භවිෂ්යති ॥ 12 ॥
න තේ පාපමිදං කර්ම ශුඛෝදර්කං භවිෂ්යති ।
යාऽහං නීතා විනාභාවං පතිපාර්ශ්වාත්ත්වයා වනේ ॥ 13 ॥
ස හි දෛවතසංයුක්තෝ මම භර්තා මහාද්යුතිඃ ।
නිර්භයෝ වීර්යමාශ්රිත්ය ශූන්යේ වසති දංඩකේ ॥ 14 ॥
ස තේ දර්පං බලං වීර්යමුත්සේකං ච තථාවිධම් ।
අපනේෂ්යති ගාත්රේභ්යශ්ශරවර්ෂේණ සංයුගේ ॥ 15 ॥
යදා විනාශෝ භූතානාං දෘශ්යතේ කාලචෝදිතඃ ।
තදා කාර්යේ ප්රමාද්යංති නරාඃ කාලවශං ගතාඃ ॥ 16 ॥
මාං ප්රධෘෂ්ය ස තේ කාලඃ ප්රාප්තෝऽයං රාක්ෂසාධම ।
ආත්මනෝ රාක්ෂසානාං ච වධායාංතඃපුරස්ය ච ॥ 17 ॥
න ශක්යා යජ්ඤමධ්යස්ථා වේදී සෘග්භාංඩමංඩිතා ।
ද්විජාතිමංත්රපූතා ච චංඩාලේනාවමර්දිතුම් ॥ 18 ॥
තථාऽහං ධර්මනිත්යස්ය ධර්මපත්නී පතිව්රතා ।
ත්වයා ස්පෘෂ්ටුං න ශක්යාස්මි රාක්ෂසාධම පාපිනා ॥ 19 ॥
ක්රීඩංතී රාජහංසේන පද්මෂංඩේෂු නිත්යදා ।
හංසී සා තෘණෂංඩස්ථං කථං පශ්යේත මද්ගුකම් ॥ 20 ॥
ඉදං ශරීරං නිස්සංජ්ඤං බංධ වා ඛාතයස්ව වා ।
නේදං ශරීරං රක්ෂයං මේ ජීවිතං වාපි රාක්ෂස ॥ 21 ॥
න තු ශක්ෂ්යාම්යුපක්රෝශං පෘථිව්යාං දාතුමාත්මනඃ ।
ඒවමුක්ත්වා තු වෛදේහී ක්රෝධාත්සුපරුෂං වචඃ ॥ 22 ॥
රාවණං මෛථිලී තත්ර පුනර්නෝවාච කිංචන ।
සීතායා වචනං ශ්රුත්වා පරුෂං රෝමහර්ෂණම් ॥ 23 ॥
ප්රත්යුවාච තතස්සීතාං භයසංදර්ශනං වචඃ ।
ශෘණු මෛථිලි මද්වාක්යං මාසාංද්වාදශ භාමිනි ॥ 24 ॥
කාලේනානේන නාභ්යේෂි යදි මාං චාරුහාසිනි ।
තතස්ත්වාං ප්රාතරාශාර්ථං සූදාශ්ඡේත්ස්යංති ලේශශඃ ॥ 25 ॥
ඉත්යුක්ත්වා පරුෂං වාක්යං රාවණශ්ශත්රුරාවණඃ ।
රාක්ෂසීශ්ච තතඃ ක්රුද්ධ ඉදං වචනමබ්රවීත් ॥ 26 ॥
ශීඝ්රමේව හි රාක්ෂස්යෝ විකෘතා ඝෝරදර්ශනාඃ ।
දර්පමස්යා විනේෂ්යධ්වං මාංසශෝණිතභෝජනාඃ ॥ 27 ॥
වචනාදේව තාස්තස්ය සුඝෝරා රාක්ෂසීගණාඃ ।
කෘතප්රාංජලයෝ භූත්වා මෛථිලීං පර්යවාරයන් ॥ 28 ॥
ස තාඃ ප්රෝවාච රාජා තු රාවණෝ ඝෝරදර්ශනඃ ।
ප්රචාල්ය චරණෝත්කර්ෂෛර්දාරයන්නිව මේදිනීම් ॥ 29 ॥
අශෝකවනිකාමධ්යේ මෛථිලී නීයතාමියම් ।
තත්රේයං රක්ෂ්යතාං ගූඪං යුෂ්මාභිඃ පරිවාරිතා ॥ 30 ॥
තත්රෛනාං තර්ජනෛර්ඝෝරෛඃ පුනස්සාංත්වෛශ්ච මෛථිලීම් ।
ආනයධ්වං වශං සර්වා වන්යාං ගජවධූමිව ॥ 31 ॥
ඉති ප්රතිසමාදිෂ්ටා රාක්ෂස්යෝ රාවණේන තාඃ ।
අශෝකවනිකාං ජග්මුර්මෛථිලීං පරිගෘහ්ය තු ॥ 32 ॥
සර්වකාලඵලෛර්වෘක්ෂෛර්නානාපුෂ්පඵලෛර්වෘතාම් ।
සර්වකාලමදෛශ්චාපි ද්විජෛස්සමුපසේවිතාම් ॥ 33 ॥
සා තු ශෝකපරීතාංගී මෛථිලී ජනකාත්මජා ।
රාක්ෂසීවශමාපන්නා ව්යාඝ්රීණාං හරිණී යථා ॥ 34 ॥
ශෝකේන මහතා ග්රස්තා මෛථිලී ජනකාත්මජා ।
න ශර්ම ලභතේ භීරුඃ පාශබද්ධා මෘගී යථා ॥ 35 ॥
න විංදතේ තත්ර තු ශර්ම මෛථිලී විරූපනේත්රාභිරතීව තර්ජිතා ।
පතිං ස්මරංතී දයිතං ච දේවතං විචේතනාऽභූද්භයශෝකපීඩිතා ॥ 36 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂට්පංචාශස්සර්ගඃ ॥
