śrīmadvālmīkīya rāmāyaṇē sundarakāṇḍam ।
atha aṣṭamassargaḥ ।
sa tasya madhyē bhavanasya saṃsthitaṃ mahadvimānaṃ maṇivajrachitritam ।
prataptajāmbūnadajālakṛtrimaṃ dadarśa vīraḥ pavanātmajaḥ kapiḥ ॥ 1 ॥
tadapramēyāpratikārakṛtrimaṃ kṛtaṃ svayaṃ sādhviti viśvakarmaṇā ।
divaṃ gataṃ vāyupathapratiṣṭhitaṃ vyarājatādityapathasya lakṣmavat ॥ 2 ॥
na tatra kiñchinna kṛtaṃ prayatnatō na tatra kiñchinna mahārharatnavat ।
na tē viśēṣā niyatāḥ surēṣvapi na tatra kiñchinna mahāviśēṣavat ॥ 3 ॥
tapaḥ samādhānaparākramārjitaṃ manaḥ samādhānavichārachāriṇam ।
anēkasaṃsthānaviśēṣanirmitaṃ tatastatastulyaviśēṣadarśanam ॥ 4 ॥
viśēṣamālambya viśēṣasaṃsthitaṃ vichitrakūṭaṃ bahukūṭamaṇḍitam ।
manō'bhirāmaṃ śaradindunirmalaṃ vichitrakūṭaṃ śikharaṃ girēryathā ॥ 5 ॥
vahanti yaṃ kuṇḍalaśōbhitānanāḥ mahāśanā vyōmacharā niśācharāḥ ।
vivṛttavidhvastaviśālalōchanāḥ mahājavā bhūtagaṇāḥ sahasraśaḥ ॥ 6 ॥
vasantapuṣpōtkarachārudarśanaṃ vasantamāsādapi kāntadarśanam ।
sa puṣpakaṃ tatra vimānamuttamaṃ dadarśa tadvānaravīrasattamaḥ ॥ 7 ॥
ityārṣē śrīmadrāmāyaṇē vālmīkīya ādikāvyē sundarakāṇḍē aṣṭamassargaḥ ॥
