ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଅଷ୍ଟମସ୍ସର୍ଗଃ ।
ସ ତସ୍ୟ ମଧ୍ୟେ ଭଵନସ୍ୟ ସଂସ୍ଥିତଂ ମହଦ୍ଵିମାନଂ ମଣିଵଜ୍ରଚିତ୍ରିତମ୍ ।
ପ୍ରତପ୍ତଜାଂବୂନଦଜାଲକୃତ୍ରିମଂ ଦଦର୍ଶ ଵୀରଃ ପଵନାତ୍ମଜଃ କପିଃ ॥ 1 ॥
ତଦପ୍ରମେୟାପ୍ରତିକାରକୃତ୍ରିମଂ କୃତଂ ସ୍ଵୟଂ ସାଧ୍ଵିତି ଵିଶ୍ଵକର୍ମଣା ।
ଦିଵଂ ଗତଂ ଵାୟୁପଥପ୍ରତିଷ୍ଠିତଂ ଵ୍ୟରାଜତାଦିତ୍ୟପଥସ୍ୟ ଲକ୍ଷ୍ମଵତ୍ ॥ 2 ॥
ନ ତତ୍ର କିଂଚିନ୍ନ କୃତଂ ପ୍ରୟତ୍ନତୋ ନ ତତ୍ର କିଂଚିନ୍ନ ମହାର୍ହରତ୍ନଵତ୍ ।
ନ ତେ ଵିଶେଷା ନିୟତାଃ ସୁରେଷ୍ଵପି ନ ତତ୍ର କିଂଚିନ୍ନ ମହାଵିଶେଷଵତ୍ ॥ 3 ॥
ତପଃ ସମାଧାନପରାକ୍ରମାର୍ଜିତଂ ମନଃ ସମାଧାନଵିଚାରଚାରିଣମ୍ ।
ଅନେକସଂସ୍ଥାନଵିଶେଷନିର୍ମିତଂ ତତସ୍ତତସ୍ତୁଲ୍ୟଵିଶେଷଦର୍ଶନମ୍ ॥ 4 ॥
ଵିଶେଷମାଲଂବ୍ୟ ଵିଶେଷସଂସ୍ଥିତଂ ଵିଚିତ୍ରକୂଟଂ ବହୁକୂଟମଂଡିତମ୍ ।
ମନୋଽଭିରାମଂ ଶରଦିଂଦୁନିର୍ମଲଂ ଵିଚିତ୍ରକୂଟଂ ଶିଖରଂ ଗିରେର୍ୟଥା ॥ 5 ॥
ଵହଂତି ୟଂ କୁଂଡଲଶୋଭିତାନନାଃ ମହାଶନା ଵ୍ୟୋମଚରା ନିଶାଚରାଃ ।
ଵିଵୃତ୍ତଵିଧ୍ଵସ୍ତଵିଶାଲଲୋଚନାଃ ମହାଜଵା ଭୂତଗଣାଃ ସହସ୍ରଶଃ ॥ 6 ॥
ଵସଂତପୁଷ୍ପୋତ୍କରଚାରୁଦର୍ଶନଂ ଵସଂତମାସାଦପି କାଂତଦର୍ଶନମ୍ ।
ସ ପୁଷ୍ପକଂ ତତ୍ର ଵିମାନମୁତ୍ତମଂ ଦଦର୍ଶ ତଦ୍ଵାନରଵୀରସତ୍ତମଃ ॥ 7 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଅଷ୍ଟମସ୍ସର୍ଗଃ ॥
