શ્રીમદ્વાલ્મીકીય રામાયણે સુંદરકાંડમ્ ।
અથ અષ્ટમસ્સર્ગઃ ।
સ તસ્ય મધ્યે ભવનસ્ય સંસ્થિતં મહદ્વિમાનં મણિવજ્રચિત્રિતમ્ ।
પ્રતપ્તજાંબૂનદજાલકૃત્રિમં દદર્શ વીરઃ પવનાત્મજઃ કપિઃ ॥ 1 ॥
તદપ્રમેયાપ્રતિકારકૃત્રિમં કૃતં સ્વયં સાધ્વિતિ વિશ્વકર્મણા ।
દિવં ગતં વાયુપથપ્રતિષ્ઠિતં વ્યરાજતાદિત્યપથસ્ય લક્ષ્મવત્ ॥ 2 ॥
ન તત્ર કિંચિન્ન કૃતં પ્રયત્નતો ન તત્ર કિંચિન્ન મહાર્હરત્નવત્ ।
ન તે વિશેષા નિયતાઃ સુરેષ્વપિ ન તત્ર કિંચિન્ન મહાવિશેષવત્ ॥ 3 ॥
તપઃ સમાધાનપરાક્રમાર્જિતં મનઃ સમાધાનવિચારચારિણમ્ ।
અનેકસંસ્થાનવિશેષનિર્મિતં તતસ્તતસ્તુલ્યવિશેષદર્શનમ્ ॥ 4 ॥
વિશેષમાલંબ્ય વિશેષસંસ્થિતં વિચિત્રકૂટં બહુકૂટમંડિતમ્ ।
મનોઽભિરામં શરદિંદુનિર્મલં વિચિત્રકૂટં શિખરં ગિરેર્યથા ॥ 5 ॥
વહંતિ યં કુંડલશોભિતાનનાઃ મહાશના વ્યોમચરા નિશાચરાઃ ।
વિવૃત્તવિધ્વસ્તવિશાલલોચનાઃ મહાજવા ભૂતગણાઃ સહસ્રશઃ ॥ 6 ॥
વસંતપુષ્પોત્કરચારુદર્શનં વસંતમાસાદપિ કાંતદર્શનમ્ ।
સ પુષ્પકં તત્ર વિમાનમુત્તમં દદર્શ તદ્વાનરવીરસત્તમઃ ॥ 7 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે અષ્ટમસ્સર્ગઃ ॥
