ශ්රීමද්වාල්මීකීය රාමායණේ සුංදරකාංඩම් ।
අථ අෂ්ටමස්සර්ගඃ ।
ස තස්ය මධ්යේ භවනස්ය සංස්ථිතං මහද්විමානං මණිවජ්රචිත්රිතම් ।
ප්රතප්තජාංබූනදජාලකෘත්රිමං දදර්ශ වීරඃ පවනාත්මජඃ කපිඃ ॥ 1 ॥
තදප්රමේයාප්රතිකාරකෘත්රිමං කෘතං ස්වයං සාධ්විති විශ්වකර්මණා ।
දිවං ගතං වායුපථප්රතිෂ්ඨිතං ව්යරාජතාදිත්යපථස්ය ලක්ෂ්මවත් ॥ 2 ॥
න තත්ර කිංචින්න කෘතං ප්රයත්නතෝ න තත්ර කිංචින්න මහාර්හරත්නවත් ।
න තේ විශේෂා නියතාඃ සුරේෂ්වපි න තත්ර කිංචින්න මහාවිශේෂවත් ॥ 3 ॥
තපඃ සමාධානපරාක්රමාර්ජිතං මනඃ සමාධානවිචාරචාරිණම් ।
අනේකසංස්ථානවිශේෂනිර්මිතං තතස්තතස්තුල්යවිශේෂදර්ශනම් ॥ 4 ॥
විශේෂමාලංබ්ය විශේෂසංස්ථිතං විචිත්රකූටං බහුකූටමංඩිතම් ।
මනෝऽභිරාමං ශරදිංදුනිර්මලං විචිත්රකූටං ශිඛරං ගිරේර්යථා ॥ 5 ॥
වහංති යං කුංඩලශෝභිතානනාඃ මහාශනා ව්යෝමචරා නිශාචරාඃ ।
විවෘත්තවිධ්වස්තවිශාලලෝචනාඃ මහාජවා භූතගණාඃ සහස්රශඃ ॥ 6 ॥
වසංතපුෂ්පෝත්කරචාරුදර්ශනං වසංතමාසාදපි කාංතදර්ශනම් ।
ස පුෂ්පකං තත්ර විමානමුත්තමං දදර්ශ තද්වානරවීරසත්තමඃ ॥ 7 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ අෂ්ටමස්සර්ගඃ ॥
