ശ്രീമദ്വാല്മീകീയ രാമായണേ സുംദരകാംഡമ് ।
അഥ അഷ്ടമസ്സര്ഗഃ ।
സ തസ്യ മധ്യേ ഭവനസ്യ സംസ്ഥിതം മഹദ്വിമാനം മണിവജ്രചിത്രിതമ് ।
പ്രതപ്തജാംബൂനദജാലകൃത്രിമം ദദര്ശ വീരഃ പവനാത്മജഃ കപിഃ ॥ 1 ॥
തദപ്രമേയാപ്രതികാരകൃത്രിമം കൃതം സ്വയം സാധ്വിതി വിശ്വകര്മണാ ।
ദിവം ഗതം വായുപഥപ്രതിഷ്ഠിതം വ്യരാജതാദിത്യപഥസ്യ ലക്ഷ്മവത് ॥ 2 ॥
ന തത്ര കിംചിന്ന കൃതം പ്രയത്നതോ ന തത്ര കിംചിന്ന മഹാര്ഹരത്നവത് ।
ന തേ വിശേഷാ നിയതാഃ സുരേഷ്വപി ന തത്ര കിംചിന്ന മഹാവിശേഷവത് ॥ 3 ॥
തപഃ സമാധാനപരാക്രമാര്ജിതം മനഃ സമാധാനവിചാരചാരിണമ് ।
അനേകസംസ്ഥാനവിശേഷനിര്മിതം തതസ്തതസ്തുല്യവിശേഷദര്ശനമ് ॥ 4 ॥
വിശേഷമാലംബ്യ വിശേഷസംസ്ഥിതം വിചിത്രകൂടം ബഹുകൂടമംഡിതമ് ।
മനോഽഭിരാമം ശരദിംദുനിര്മലം വിചിത്രകൂടം ശിഖരം ഗിരേര്യഥാ ॥ 5 ॥
വഹംതി യം കുംഡലശോഭിതാനനാഃ മഹാശനാ വ്യോമചരാ നിശാചരാഃ ।
വിവൃത്തവിധ്വസ്തവിശാലലോചനാഃ മഹാജവാ ഭൂതഗണാഃ സഹസ്രശഃ ॥ 6 ॥
വസംതപുഷ്പോത്കരചാരുദര്ശനം വസംതമാസാദപി കാംതദര്ശനമ് ।
സ പുഷ്പകം തത്ര വിമാനമുത്തമം ദദര്ശ തദ്വാനരവീരസത്തമഃ ॥ 7 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ അഷ്ടമസ്സര്ഗഃ ॥
