śrīmadvālmīkīya rāmāyaṇē yuddhakāṇḍam ।
atha daśamassargaḥ ।
tataḥpratyuṣasiprāptēprāptadharmārthaniśchayaḥ ।
rākṣasādhipatērvēśmabhīmakarmāvibhīṣaṇaḥ ॥ 1 ॥
śailāgrachayasaṅkāśaṃśailaśṛṅgamivōnnatam ।
suvibhaktamahākakṣammahājanaparigraham ॥ 2 ॥
matimadbhirmahāmātrairanuraktairadhiṣṭhitam ।
rākṣasairāptaparyāptaissarvataḥparirakṣitam ॥ 3 ॥
mattamātaṅganiśśvāsairvyākulīkṛtamārutam ।
śaṅkhaghōṣamahāghōṣantūryanādānunāditam ॥ 4 ॥
pramadājanasambādhamprajalpitamahāpatham ।
taptakāñchananiryūhambhūṣaṇōttamabhūṣitam ॥ 5 ॥
gandharvāṇāmivā'vāsamālayammarutāmiva ।
ratnasañchayasambādhambhavanambhōgināmiva ॥ 6 ॥
tammahābhramivā'dityastējōvistṛtaraśmimān ।
agrajasyālayaṃvīraḥpravivēśamahādyutiḥ ॥ 7 ॥
puṇyānpuṇyāhaghōṣāṃśchavēdavidbhirudāhṛtān ।
śuśrāvasumahātējābhrāturvijayasaṃśritān ॥ 8 ॥
pūjitān dadhipātraiśchasarpirbhissumanōkṣataiḥ ।
mantravēdavidōviprāndadarśasamahābalaḥ ॥ 9 ॥
sapūjyamānōrakṣōbhiddīpyamānassvatējasā ।
āsanasthammahābāhurvavandēdhanadānujam ॥ 10 ॥
sarājadṛṣṭisampannamāsanaṃhēmabhūṣitam ।
jagāmasamudāchāramprayujyāchārakōvidaḥ ॥ 11 ॥
sarāvaṇammahātmānaṃvijanēmantrisannidhau ।
uvāchahitamatyarthaṃvachanaṃhētuniśchitam ॥ 12 ॥
prasādyabhrātarañjēṣṭhaṃsāntvēnōpasthitakramaḥ ।
dēśakālārthasaṃvādidṛṣṭalōkaparāvaraḥ ॥ 13 ॥
yadāprabhṛtivaidēhīsamprāstēmāmpurīntava ।
tadāprabhṛtidṛśyantēnimittānyaśubhāninaḥ ॥ 14 ॥
sasphuliṅgassadhūmārchissadhūmakaluṣōdayaḥ ।
mantrasaṅghahutō'pyagnirnasamyagabhivarthatē ॥ 15 ॥
agniṣṭhēṣvagniśalāsutathābrahmasthālīṣucha ।
sarīsṛpāṇidṛśyantēhanyēṣuchapipīlikāḥ ॥ 16 ॥
gavāṃsayāṃsiskannānivimadāvīrakuñjarāḥ ।
dīnamaśvāḥprahēṣantēnachagrāsābhinandinaḥ ॥ 17 ॥
kharōṣṭrāśvatarārājabhanabhinnarōmāssravanticha ।
nasvabhāvē'vatiṣṭhantividhānairapichintitāḥ ॥ 18 ॥
vāyasāḥsaṅghaśaḥkrūrāvyāharantisamantataḥ ।
samavētāśchadṛśyantēvimānāgrēṣusaṅghaśaḥ ॥ 19 ॥
gṛdhrāśchaparilīyantēpurīmuparipiṇḍitāḥ ।
upapannāśchasnadhyēdvēvyāhaRnatyaśivaṃśivāḥ ॥ 20 ॥
kravyādānāmmṛgāṇāñchapurīdvārēṣusaṅghaśaḥ ।
śrūyantēvipulāghōṣāssavisphūrjitanissvanāḥ ॥ 21 ॥
tadēvamprastutēkāryēprāyaśchittamidaṅkṣamam ।
rōchatēyadivaidēhīrāghavāyapradīyatām ॥ 22 ॥
idañchayadivāmōhāllōbhādvāvyāhṛtammayā ।
tatrāpichamahārāja nadōṣaṅkartumarhasi ॥ 23 ॥
ayaṃhidōṣassarvasyajanasyāsyōpalakṣyatē ।
rakṣasāṃrākṣasīnāñchapurasyāntaḥpurasyacha ॥ 24 ॥
śrāvaṇēchāsyamantrasyanivṛttāssarvamantriṇaḥ ।
avaśyañchamayāvāchyaṃyaddṛṣṭamapivāśrutam ॥ 25 ॥
hitammahārthammṛduhētusaṃhitaṃvyatītakālāyatisampratikṣamam ।
niśamyatadvākyamupasthitajvaraḥprasaṅgavānuttaramētadabravīt ॥ 26 ॥
bhayannapaśyāmikutaśchidapyahannarāghavaḥprāpsyatijātumaithilīm ।
suraissahēndrairapisaṅgarēkathammamāgratassthāsyatilakṣmaṇāgrajaḥ ॥ 27 ॥
ityēvamuktvāsurasainyanāśanōmahābalassaṃyatichaṇḍavikramaḥ ।
daśānanōbhrātaramāptavādinaṃvisarjayāmāsatadāvibhīṣaṇam ॥ 28 ॥
ityārṣē śrīmadrāmāyaṇē vālmīkīya ādikāvyē yuddhakāṇḍē daśamassargaḥ ॥
