શ્રીમદ્વાલ્મીકીય રામાયણે બાલકાંડમ્ ।
અથ સપ્તવિંશસ્સર્ગઃ ।
અથ તાં રજનીમુષ્ય વિશ્વામિત્રો મહાયશાઃ ।
પ્રહસ્ય રાઘવં વાક્યમુવાચ મધુરાક્ષરમ્ ॥ 1 ॥
પરિતુષ્ટોઽસ્મિ ભદ્રં તે રાજપુત્ર મહાયશઃ ।
પ્રીત્યા પરમયા યુક્તો દદામ્યસ્ત્રાણિ સર્વશઃ ॥ 2 ॥
દેવાસુરગણાન્વાપિ સગંધર્વોરગાનપિ ।
યૈરમિત્રાન્ પ્રસહ્યાજૌ વશીકૃત્ય જયિષ્યસિ ॥ 3 ॥
તાનિ દિવ્યાનિ ભદ્રં તે દદામ્યસ્ત્રાણિ સર્વશઃ ।
દંડચક્રં મહદ્દિવ્યં તવ દાસ્યામિ રાઘવ ॥ 4 ॥
ધર્મચક્રં તતો વીર કાલચક્રં તથૈવ ચ ।
વિષ્ણુચક્રં તથાત્યુગ્રમૈંદ્રમસ્ત્રં તથૈવ ચ ॥ 5 ॥
વજ્રમસ્ત્રં નરશ્રેષ્ઠ શૈવં શૂલવરં તથા ।
અસ્ત્રં બ્રહ્મશિરશ્ચૈવ ઐષીકમપિ રાઘવ ॥ 6 ॥
દદામિ તે મહાબાહો બ્રાહ્મમસ્ત્રમનુત્તમમ્ ।
ગદે દ્વે ચૈવ કાકુત્સ્થ મોદકી શિખરી ઉભે ॥ 7 ॥
પ્રદીપ્તે નરશાર્દૂલ પ્રયચ્છામિ નૃપાત્મજ ।
ધર્મપાશમહં રામ કાલપાશં તથૈવ ચ ॥ 8 ॥
પાશં વારુણમસ્ત્રં ચ દદામ્યહમનુત્તમમ્ ।
અશની દ્વે પ્રયચ્છામિ શુષ્કાર્દ્રે રઘુનંદન ॥ 9 ॥
દદામિ ચાસ્ત્રં પૈનાકમસ્ત્રં નારાયણં તથા ।
આગ્નેયમસ્ત્રં દયિતં શિખરં નામ નામતઃ ॥ 10 ॥
વાયવ્યં પ્રથનં નામ દદામિ ચ તવાનઘ ।
અસ્ત્રં હયશિરો નામ ક્રૌંચમસ્ત્રં તથૈવ ચ ।
શક્તિદ્વયં ચ કાકુત્સ્થ દદામિ તવ રાઘવ ॥ 11 ॥
કંકાલં મુસલં ઘોરં કાપાલમથ કંકણમ્ ।
ધારયંત્યસુરા યાનિ દદામ્યેતાનિ સર્વશઃ ॥ 12 ॥
વૈદ્યાધરં મહાસ્ત્રં ચ નંદનં નામ નામતઃ ।
અસિરત્નં મહાબાહો દદામિ ચ નૃપાત્મજ ॥ 13 ॥
ગાંધર્વમસ્ત્રં દયિતં માનવં નામ નામતઃ ।
પ્રસ્વાપનપ્રશમને દદ્મિ સૌરં ચ રાઘવ ॥ 14 ॥
દર્પણં શોષણં ચૈવ સંતાપનવિલાપને ।
મદનં ચૈવ દુર્ધર્ષં કંદર્પદયિતં તથા ॥ 15 ॥
પૈશાચમસ્ત્રં દયિતં મોહનં નામ નામતઃ ।
પ્રતીચ્છ નરશાર્દૂલ રાજપુત્ર મહાયશઃ ॥ 16 ॥
તામસં નરશાર્દૂલ સૌમનં ચ મહાબલ ।
સંવર્ધં ચૈવ દુર્ધર્ષં મૌસલં ચ નૃપાત્મજ ॥ 17 ॥
સત્યમસ્ત્રં મહાબાહો તથા માયાધરં પરમ્ ।
ઘોરં તેજઃ પ્રભં નામ પરતેજોઽપકર્ષણમ્ ॥ 18 ॥
સૌમ્યાસ્ત્રં શિશિરં નામ ત્વષ્ટુરસ્ત્રં સુદામનમ્ ।
દારુણં ચ ભગસ્યાપિ શિતેષુ મથ માનવમ્ ॥ 19 ॥
એતાન્ રામ મહાબાહો કામરૂપાન્ મહાબલાન્ ।
ગૃહાણ પરમોદારાન્ ક્ષિપ્રમેવ નૃપાત્મજ ॥ 20 ॥
સ્થિતસ્તુ પ્રાઙ્મુખો ભૂત્વા શુચિર્મુનિવરસ્તદા ।
દદૌ રામાય સુપ્રીતો મંત્રગ્રામમનુત્તમમ્ ॥ 21 ॥
સર્વસંગ્રહણં યેષાં દૈવતૈરપિ દુર્લભમ્ ।
તાન્યસ્ત્રાણિ તદા વિપ્રો રાઘવાય ન્યવેદયત્ ॥ 22 ॥
જપતસ્તુ મુનેસ્તસ્ય વિશ્વામિત્રસ્ય ધીમતઃ ।
ઉપતસ્થુર્મહાર્હાણિ સર્વાણ્યસ્ત્રાણિ રાઘવમ્ ॥ 23 ॥
ઊચુશ્ચ મુદિતાસ્સર્વે રામં પ્રાંજલયસ્તદા ।
ઇમે સ્મ પરમોદારાઃ કિંકરાસ્તવ રાઘવ ॥ 24 ॥
પ્રતિગૃહ્ય ચ કાકુત્સ્થઃ સમાલભ્ય ચ પાણિના ।
માનસા મે ભવિષ્યધ્વમિતિ તાનભ્યચોદયત્ ॥ 25 ॥
તતઃ પ્રીતમના રામો વિશ્વામિત્રં મહામુનિમ્ ।
અભિવાદ્ય મહાતેજા ગમનાયોપચક્રમે ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે સપ્તવિંશસ્સર્ગઃ ॥
