శ్రీమద్వాల్మీకీయ రామాయణే బాలకాండమ్ ।
అథ సప్తవింశస్సర్గః ।
అథ తాం రజనీముష్య విశ్వామిత్రో మహాయశాః ।
ప్రహస్య రాఘవం వాక్యమువాచ మధురాక్షరమ్ ॥ 1 ॥
పరితుష్టోఽస్మి భద్రం తే రాజపుత్ర మహాయశః ।
ప్రీత్యా పరమయా యుక్తో దదామ్యస్త్రాణి సర్వశః ॥ 2 ॥
దేవాసురగణాన్వాపి సగంధర్వోరగానపి ।
యైరమిత్రాన్ ప్రసహ్యాజౌ వశీకృత్య జయిష్యసి ॥ 3 ॥
తాని దివ్యాని భద్రం తే దదామ్యస్త్రాణి సర్వశః ।
దండచక్రం మహద్దివ్యం తవ దాస్యామి రాఘవ ॥ 4 ॥
ధర్మచక్రం తతో వీర కాలచక్రం తథైవ చ ।
విష్ణుచక్రం తథాత్యుగ్రమైంద్రమస్త్రం తథైవ చ ॥ 5 ॥
వజ్రమస్త్రం నరశ్రేష్ఠ శైవం శూలవరం తథా ।
అస్త్రం బ్రహ్మశిరశ్చైవ ఐషీకమపి రాఘవ ॥ 6 ॥
దదామి తే మహాబాహో బ్రాహ్మమస్త్రమనుత్తమమ్ ।
గదే ద్వే చైవ కాకుత్స్థ మోదకీ శిఖరీ ఉభే ॥ 7 ॥
ప్రదీప్తే నరశార్దూల ప్రయచ్ఛామి నృపాత్మజ ।
ధర్మపాశమహం రామ కాలపాశం తథైవ చ ॥ 8 ॥
పాశం వారుణమస్త్రం చ దదామ్యహమనుత్తమమ్ ।
అశనీ ద్వే ప్రయచ్ఛామి శుష్కార్ద్రే రఘునందన ॥ 9 ॥
దదామి చాస్త్రం పైనాకమస్త్రం నారాయణం తథా ।
ఆగ్నేయమస్త్రం దయితం శిఖరం నామ నామతః ॥ 10 ॥
వాయవ్యం ప్రథనం నామ దదామి చ తవానఘ ।
అస్త్రం హయశిరో నామ క్రౌంచమస్త్రం తథైవ చ ।
శక్తిద్వయం చ కాకుత్స్థ దదామి తవ రాఘవ ॥ 11 ॥
కంకాలం ముసలం ఘోరం కాపాలమథ కంకణమ్ ।
ధారయంత్యసురా యాని దదామ్యేతాని సర్వశః ॥ 12 ॥
వైద్యాధరం మహాస్త్రం చ నందనం నామ నామతః ।
అసిరత్నం మహాబాహో దదామి చ నృపాత్మజ ॥ 13 ॥
గాంధర్వమస్త్రం దయితం మానవం నామ నామతః ।
ప్రస్వాపనప్రశమనే దద్మి సౌరం చ రాఘవ ॥ 14 ॥
దర్పణం శోషణం చైవ సంతాపనవిలాపనే ।
మదనం చైవ దుర్ధర్షం కందర్పదయితం తథా ॥ 15 ॥
పైశాచమస్త్రం దయితం మోహనం నామ నామతః ।
ప్రతీచ్ఛ నరశార్దూల రాజపుత్ర మహాయశః ॥ 16 ॥
తామసం నరశార్దూల సౌమనం చ మహాబల ।
సంవర్ధం చైవ దుర్ధర్షం మౌసలం చ నృపాత్మజ ॥ 17 ॥
సత్యమస్త్రం మహాబాహో తథా మాయాధరం పరమ్ ।
ఘోరం తేజః ప్రభం నామ పరతేజోఽపకర్షణమ్ ॥ 18 ॥
సౌమ్యాస్త్రం శిశిరం నామ త్వష్టురస్త్రం సుదామనమ్ ।
దారుణం చ భగస్యాపి శితేషు మథ మానవమ్ ॥ 19 ॥
ఏతాన్ రామ మహాబాహో కామరూపాన్ మహాబలాన్ ।
గృహాణ పరమోదారాన్ క్షిప్రమేవ నృపాత్మజ ॥ 20 ॥
స్థితస్తు ప్రాఙ్ముఖో భూత్వా శుచిర్మునివరస్తదా ।
దదౌ రామాయ సుప్రీతో మంత్రగ్రామమనుత్తమమ్ ॥ 21 ॥
సర్వసంగ్రహణం యేషాం దైవతైరపి దుర్లభమ్ ।
తాన్యస్త్రాణి తదా విప్రో రాఘవాయ న్యవేదయత్ ॥ 22 ॥
జపతస్తు మునేస్తస్య విశ్వామిత్రస్య ధీమతః ।
ఉపతస్థుర్మహార్హాణి సర్వాణ్యస్త్రాణి రాఘవమ్ ॥ 23 ॥
ఊచుశ్చ ముదితాస్సర్వే రామం ప్రాంజలయస్తదా ।
ఇమే స్మ పరమోదారాః కింకరాస్తవ రాఘవ ॥ 24 ॥
ప్రతిగృహ్య చ కాకుత్స్థః సమాలభ్య చ పాణినా ।
మానసా మే భవిష్యధ్వమితి తానభ్యచోదయత్ ॥ 25 ॥
తతః ప్రీతమనా రామో విశ్వామిత్రం మహామునిమ్ ।
అభివాద్య మహాతేజా గమనాయోపచక్రమే ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే సప్తవింశస్సర్గః ॥
