ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତଵିଂଶସ୍ସର୍ଗଃ ।
ଅଥ ତାଂ ରଜନୀମୁଷ୍ୟ ଵିଶ୍ଵାମିତ୍ରୋ ମହାୟଶାଃ ।
ପ୍ରହସ୍ୟ ରାଘଵଂ ଵାକ୍ୟମୁଵାଚ ମଧୁରାକ୍ଷରମ୍ ॥ 1 ॥
ପରିତୁଷ୍ଟୋଽସ୍ମି ଭଦ୍ରଂ ତେ ରାଜପୁତ୍ର ମହାୟଶଃ ।
ପ୍ରୀତ୍ୟା ପରମୟା ୟୁକ୍ତୋ ଦଦାମ୍ୟସ୍ତ୍ରାଣି ସର୍ଵଶଃ ॥ 2 ॥
ଦେଵାସୁରଗଣାନ୍ଵାପି ସଗଂଧର୍ଵୋରଗାନପି ।
ୟୈରମିତ୍ରାନ୍ ପ୍ରସହ୍ୟାଜୌ ଵଶୀକୃତ୍ୟ ଜୟିଷ୍ୟସି ॥ 3 ॥
ତାନି ଦିଵ୍ୟାନି ଭଦ୍ରଂ ତେ ଦଦାମ୍ୟସ୍ତ୍ରାଣି ସର୍ଵଶଃ ।
ଦଂଡଚକ୍ରଂ ମହଦ୍ଦିଵ୍ୟଂ ତଵ ଦାସ୍ୟାମି ରାଘଵ ॥ 4 ॥
ଧର୍ମଚକ୍ରଂ ତତୋ ଵୀର କାଲଚକ୍ରଂ ତଥୈଵ ଚ ।
ଵିଷ୍ଣୁଚକ୍ରଂ ତଥାତ୍ୟୁଗ୍ରମୈଂଦ୍ରମସ୍ତ୍ରଂ ତଥୈଵ ଚ ॥ 5 ॥
ଵଜ୍ରମସ୍ତ୍ରଂ ନରଶ୍ରେଷ୍ଠ ଶୈଵଂ ଶୂଲଵରଂ ତଥା ।
ଅସ୍ତ୍ରଂ ବ୍ରହ୍ମଶିରଶ୍ଚୈଵ ଐଷୀକମପି ରାଘଵ ॥ 6 ॥
ଦଦାମି ତେ ମହାବାହୋ ବ୍ରାହ୍ମମସ୍ତ୍ରମନୁତ୍ତମମ୍ ।
ଗଦେ ଦ୍ଵେ ଚୈଵ କାକୁତ୍ସ୍ଥ ମୋଦକୀ ଶିଖରୀ ଉଭେ ॥ 7 ॥
ପ୍ରଦୀପ୍ତେ ନରଶାର୍ଦୂଲ ପ୍ରୟଚ୍ଛାମି ନୃପାତ୍ମଜ ।
ଧର୍ମପାଶମହଂ ରାମ କାଲପାଶଂ ତଥୈଵ ଚ ॥ 8 ॥
ପାଶଂ ଵାରୁଣମସ୍ତ୍ରଂ ଚ ଦଦାମ୍ୟହମନୁତ୍ତମମ୍ ।
ଅଶନୀ ଦ୍ଵେ ପ୍ରୟଚ୍ଛାମି ଶୁଷ୍କାର୍ଦ୍ରେ ରଘୁନଂଦନ ॥ 9 ॥
ଦଦାମି ଚାସ୍ତ୍ରଂ ପୈନାକମସ୍ତ୍ରଂ ନାରାୟଣଂ ତଥା ।
ଆଗ୍ନେୟମସ୍ତ୍ରଂ ଦୟିତଂ ଶିଖରଂ ନାମ ନାମତଃ ॥ 10 ॥
ଵାୟଵ୍ୟଂ ପ୍ରଥନଂ ନାମ ଦଦାମି ଚ ତଵାନଘ ।
ଅସ୍ତ୍ରଂ ହୟଶିରୋ ନାମ କ୍ରୌଂଚମସ୍ତ୍ରଂ ତଥୈଵ ଚ ।
ଶକ୍ତିଦ୍ଵୟଂ ଚ କାକୁତ୍ସ୍ଥ ଦଦାମି ତଵ ରାଘଵ ॥ 11 ॥
କଂକାଲଂ ମୁସଲଂ ଘୋରଂ କାପାଲମଥ କଂକଣମ୍ ।
ଧାରୟଂତ୍ୟସୁରା ୟାନି ଦଦାମ୍ୟେତାନି ସର୍ଵଶଃ ॥ 12 ॥
ଵୈଦ୍ୟାଧରଂ ମହାସ୍ତ୍ରଂ ଚ ନଂଦନଂ ନାମ ନାମତଃ ।
ଅସିରତ୍ନଂ ମହାବାହୋ ଦଦାମି ଚ ନୃପାତ୍ମଜ ॥ 13 ॥
ଗାଂଧର୍ଵମସ୍ତ୍ରଂ ଦୟିତଂ ମାନଵଂ ନାମ ନାମତଃ ।
ପ୍ରସ୍ଵାପନପ୍ରଶମନେ ଦଦ୍ମି ସୌରଂ ଚ ରାଘଵ ॥ 14 ॥
ଦର୍ପଣଂ ଶୋଷଣଂ ଚୈଵ ସଂତାପନଵିଲାପନେ ।
ମଦନଂ ଚୈଵ ଦୁର୍ଧର୍ଷଂ କଂଦର୍ପଦୟିତଂ ତଥା ॥ 15 ॥
ପୈଶାଚମସ୍ତ୍ରଂ ଦୟିତଂ ମୋହନଂ ନାମ ନାମତଃ ।
ପ୍ରତୀଚ୍ଛ ନରଶାର୍ଦୂଲ ରାଜପୁତ୍ର ମହାୟଶଃ ॥ 16 ॥
ତାମସଂ ନରଶାର୍ଦୂଲ ସୌମନଂ ଚ ମହାବଲ ।
ସଂଵର୍ଧଂ ଚୈଵ ଦୁର୍ଧର୍ଷଂ ମୌସଲଂ ଚ ନୃପାତ୍ମଜ ॥ 17 ॥
ସତ୍ୟମସ୍ତ୍ରଂ ମହାବାହୋ ତଥା ମାୟାଧରଂ ପରମ୍ ।
ଘୋରଂ ତେଜଃ ପ୍ରଭଂ ନାମ ପରତେଜୋଽପକର୍ଷଣମ୍ ॥ 18 ॥
ସୌମ୍ୟାସ୍ତ୍ରଂ ଶିଶିରଂ ନାମ ତ୍ଵଷ୍ଟୁରସ୍ତ୍ରଂ ସୁଦାମନମ୍ ।
ଦାରୁଣଂ ଚ ଭଗସ୍ୟାପି ଶିତେଷୁ ମଥ ମାନଵମ୍ ॥ 19 ॥
ଏତାନ୍ ରାମ ମହାବାହୋ କାମରୂପାନ୍ ମହାବଲାନ୍ ।
ଗୃହାଣ ପରମୋଦାରାନ୍ କ୍ଷିପ୍ରମେଵ ନୃପାତ୍ମଜ ॥ 20 ॥
ସ୍ଥିତସ୍ତୁ ପ୍ରାଙ୍ମୁଖୋ ଭୂତ୍ଵା ଶୁଚିର୍ମୁନିଵରସ୍ତଦା ।
ଦଦୌ ରାମାୟ ସୁପ୍ରୀତୋ ମଂତ୍ରଗ୍ରାମମନୁତ୍ତମମ୍ ॥ 21 ॥
ସର୍ଵସଂଗ୍ରହଣଂ ୟେଷାଂ ଦୈଵତୈରପି ଦୁର୍ଲଭମ୍ ।
ତାନ୍ୟସ୍ତ୍ରାଣି ତଦା ଵିପ୍ରୋ ରାଘଵାୟ ନ୍ୟଵେଦୟତ୍ ॥ 22 ॥
ଜପତସ୍ତୁ ମୁନେସ୍ତସ୍ୟ ଵିଶ୍ଵାମିତ୍ରସ୍ୟ ଧୀମତଃ ।
ଉପତସ୍ଥୁର୍ମହାର୍ହାଣି ସର୍ଵାଣ୍ୟସ୍ତ୍ରାଣି ରାଘଵମ୍ ॥ 23 ॥
ଊଚୁଶ୍ଚ ମୁଦିତାସ୍ସର୍ଵେ ରାମଂ ପ୍ରାଂଜଲୟସ୍ତଦା ।
ଇମେ ସ୍ମ ପରମୋଦାରାଃ କିଂକରାସ୍ତଵ ରାଘଵ ॥ 24 ॥
ପ୍ରତିଗୃହ୍ୟ ଚ କାକୁତ୍ସ୍ଥଃ ସମାଲଭ୍ୟ ଚ ପାଣିନା ।
ମାନସା ମେ ଭଵିଷ୍ୟଧ୍ଵମିତି ତାନଭ୍ୟଚୋଦୟତ୍ ॥ 25 ॥
ତତଃ ପ୍ରୀତମନା ରାମୋ ଵିଶ୍ଵାମିତ୍ରଂ ମହାମୁନିମ୍ ।
ଅଭିଵାଦ୍ୟ ମହାତେଜା ଗମନାୟୋପଚକ୍ରମେ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତଵିଂଶସ୍ସର୍ଗଃ ॥
