śrīmadvālmīkīya rāmāyaṇē bālakāṇḍam ।
atha saptaviṃśassargaḥ ।
atha tāṃ rajanīmuṣya viśvāmitrō mahāyaśāḥ ।
prahasya rāghavaṃ vākyamuvācha madhurākṣaram ॥ 1 ॥
parituṣṭō'smi bhadraṃ tē rājaputra mahāyaśaḥ ।
prītyā paramayā yuktō dadāmyastrāṇi sarvaśaḥ ॥ 2 ॥
dēvāsuragaṇānvāpi sagandharvōragānapi ।
yairamitrān prasahyājau vaśīkṛtya jayiṣyasi ॥ 3 ॥
tāni divyāni bhadraṃ tē dadāmyastrāṇi sarvaśaḥ ।
daṇḍachakraṃ mahaddivyaṃ tava dāsyāmi rāghava ॥ 4 ॥
dharmachakraṃ tatō vīra kālachakraṃ tathaiva cha ।
viṣṇuchakraṃ tathātyugramaindramastraṃ tathaiva cha ॥ 5 ॥
vajramastraṃ naraśrēṣṭha śaivaṃ śūlavaraṃ tathā ।
astraṃ brahmaśiraśchaiva aiṣīkamapi rāghava ॥ 6 ॥
dadāmi tē mahābāhō brāhmamastramanuttamam ।
gadē dvē chaiva kākutstha mōdakī śikharī ubhē ॥ 7 ॥
pradīptē naraśārdūla prayachChāmi nṛpātmaja ।
dharmapāśamahaṃ rāma kālapāśaṃ tathaiva cha ॥ 8 ॥
pāśaṃ vāruṇamastraṃ cha dadāmyahamanuttamam ।
aśanī dvē prayachChāmi śuṣkārdrē raghunandana ॥ 9 ॥
dadāmi chāstraṃ painākamastraṃ nārāyaṇaṃ tathā ।
āgnēyamastraṃ dayitaṃ śikharaṃ nāma nāmataḥ ॥ 10 ॥
vāyavyaṃ prathanaṃ nāma dadāmi cha tavānagha ।
astraṃ hayaśirō nāma krauñchamastraṃ tathaiva cha ।
śaktidvayaṃ cha kākutstha dadāmi tava rāghava ॥ 11 ॥
kaṅkālaṃ musalaṃ ghōraṃ kāpālamatha kaṅkaṇam ।
dhārayantyasurā yāni dadāmyētāni sarvaśaḥ ॥ 12 ॥
vaidyādharaṃ mahāstraṃ cha nandanaṃ nāma nāmataḥ ।
asiratnaṃ mahābāhō dadāmi cha nṛpātmaja ॥ 13 ॥
gāndharvamastraṃ dayitaṃ mānavaṃ nāma nāmataḥ ।
prasvāpanapraśamanē dadmi sauraṃ cha rāghava ॥ 14 ॥
darpaṇaṃ śōṣaṇaṃ chaiva santāpanavilāpanē ।
madanaṃ chaiva durdharṣaṃ kandarpadayitaṃ tathā ॥ 15 ॥
paiśāchamastraṃ dayitaṃ mōhanaṃ nāma nāmataḥ ।
pratīchCha naraśārdūla rājaputra mahāyaśaḥ ॥ 16 ॥
tāmasaṃ naraśārdūla saumanaṃ cha mahābala ।
saṃvardhaṃ chaiva durdharṣaṃ mausalaṃ cha nṛpātmaja ॥ 17 ॥
satyamastraṃ mahābāhō tathā māyādharaṃ param ।
ghōraṃ tējaḥ prabhaṃ nāma paratējō'pakarṣaṇam ॥ 18 ॥
saumyāstraṃ śiśiraṃ nāma tvaṣṭurastraṃ sudāmanam ।
dāruṇaṃ cha bhagasyāpi śitēṣu matha mānavam ॥ 19 ॥
ētān rāma mahābāhō kāmarūpān mahābalān ।
gṛhāṇa paramōdārān kṣipramēva nṛpātmaja ॥ 20 ॥
sthitastu prāṅmukhō bhūtvā śuchirmunivarastadā ।
dadau rāmāya suprītō mantragrāmamanuttamam ॥ 21 ॥
sarvasaṅgrahaṇaṃ yēṣāṃ daivatairapi durlabham ।
tānyastrāṇi tadā viprō rāghavāya nyavēdayat ॥ 22 ॥
japatastu munēstasya viśvāmitrasya dhīmataḥ ।
upatasthurmahārhāṇi sarvāṇyastrāṇi rāghavam ॥ 23 ॥
ūchuścha muditāssarvē rāmaṃ prāñjalayastadā ।
imē sma paramōdārāḥ kiṅkarāstava rāghava ॥ 24 ॥
pratigṛhya cha kākutsthaḥ samālabhya cha pāṇinā ।
mānasā mē bhaviṣyadhvamiti tānabhyachōdayat ॥ 25 ॥
tataḥ prītamanā rāmō viśvāmitraṃ mahāmunim ।
abhivādya mahātējā gamanāyōpachakramē ॥ 26 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptaviṃśassargaḥ ॥
