ශ්රීමද්වාල්මීකීය රාමායණේ බාලකාංඩම් ।
අථ සප්තවිංශස්සර්ගඃ ।
අථ තාං රජනීමුෂ්ය විශ්වාමිත්රෝ මහායශාඃ ।
ප්රහස්ය රාඝවං වාක්යමුවාච මධුරාක්ෂරම් ॥ 1 ॥
පරිතුෂ්ටෝऽස්මි භද්රං තේ රාජපුත්ර මහායශඃ ।
ප්රීත්යා පරමයා යුක්තෝ දදාම්යස්ත්රාණි සර්වශඃ ॥ 2 ॥
දේවාසුරගණාන්වාපි සගංධර්වෝරගානපි ।
යෛරමිත්රාන් ප්රසහ්යාජෞ වශීකෘත්ය ජයිෂ්යසි ॥ 3 ॥
තානි දිව්යානි භද්රං තේ දදාම්යස්ත්රාණි සර්වශඃ ।
දංඩචක්රං මහද්දිව්යං තව දාස්යාමි රාඝව ॥ 4 ॥
ධර්මචක්රං තතෝ වීර කාලචක්රං තථෛව ච ।
විෂ්ණුචක්රං තථාත්යුග්රමෛංද්රමස්ත්රං තථෛව ච ॥ 5 ॥
වජ්රමස්ත්රං නරශ්රේෂ්ඨ ශෛවං ශූලවරං තථා ।
අස්ත්රං බ්රහ්මශිරශ්චෛව ඓෂීකමපි රාඝව ॥ 6 ॥
දදාමි තේ මහාබාහෝ බ්රාහ්මමස්ත්රමනුත්තමම් ।
ගදේ ද්වේ චෛව කාකුත්ස්ථ මෝදකී ශිඛරී උභේ ॥ 7 ॥
ප්රදීප්තේ නරශාර්දූල ප්රයච්ඡාමි නෘපාත්මජ ।
ධර්මපාශමහං රාම කාලපාශං තථෛව ච ॥ 8 ॥
පාශං වාරුණමස්ත්රං ච දදාම්යහමනුත්තමම් ।
අශනී ද්වේ ප්රයච්ඡාමි ශුෂ්කාර්ද්රේ රඝුනංදන ॥ 9 ॥
දදාමි චාස්ත්රං පෛනාකමස්ත්රං නාරායණං තථා ।
ආග්නේයමස්ත්රං දයිතං ශිඛරං නාම නාමතඃ ॥ 10 ॥
වායව්යං ප්රථනං නාම දදාමි ච තවානඝ ।
අස්ත්රං හයශිරෝ නාම ක්රෞංචමස්ත්රං තථෛව ච ।
ශක්තිද්වයං ච කාකුත්ස්ථ දදාමි තව රාඝව ॥ 11 ॥
කංකාලං මුසලං ඝෝරං කාපාලමථ කංකණම් ।
ධාරයංත්යසුරා යානි දදාම්යේතානි සර්වශඃ ॥ 12 ॥
වෛද්යාධරං මහාස්ත්රං ච නංදනං නාම නාමතඃ ।
අසිරත්නං මහාබාහෝ දදාමි ච නෘපාත්මජ ॥ 13 ॥
ගාංධර්වමස්ත්රං දයිතං මානවං නාම නාමතඃ ।
ප්රස්වාපනප්රශමනේ දද්මි සෞරං ච රාඝව ॥ 14 ॥
දර්පණං ශෝෂණං චෛව සංතාපනවිලාපනේ ।
මදනං චෛව දුර්ධර්ෂං කංදර්පදයිතං තථා ॥ 15 ॥
පෛශාචමස්ත්රං දයිතං මෝහනං නාම නාමතඃ ।
ප්රතීච්ඡ නරශාර්දූල රාජපුත්ර මහායශඃ ॥ 16 ॥
තාමසං නරශාර්දූල සෞමනං ච මහාබල ।
සංවර්ධං චෛව දුර්ධර්ෂං මෞසලං ච නෘපාත්මජ ॥ 17 ॥
සත්යමස්ත්රං මහාබාහෝ තථා මායාධරං පරම් ।
ඝෝරං තේජඃ ප්රභං නාම පරතේජෝऽපකර්ෂණම් ॥ 18 ॥
සෞම්යාස්ත්රං ශිශිරං නාම ත්වෂ්ටුරස්ත්රං සුදාමනම් ।
දාරුණං ච භගස්යාපි ශිතේෂු මථ මානවම් ॥ 19 ॥
ඒතාන් රාම මහාබාහෝ කාමරූපාන් මහාබලාන් ।
ගෘහාණ පරමෝදාරාන් ක්ෂිප්රමේව නෘපාත්මජ ॥ 20 ॥
ස්ථිතස්තු ප්රාඞ්මුඛෝ භූත්වා ශුචිර්මුනිවරස්තදා ।
දදෞ රාමාය සුප්රීතෝ මංත්රග්රාමමනුත්තමම් ॥ 21 ॥
සර්වසංග්රහණං යේෂාං දෛවතෛරපි දුර්ලභම් ।
තාන්යස්ත්රාණි තදා විප්රෝ රාඝවාය න්යවේදයත් ॥ 22 ॥
ජපතස්තු මුනේස්තස්ය විශ්වාමිත්රස්ය ධීමතඃ ।
උපතස්ථුර්මහාර්හාණි සර්වාණ්යස්ත්රාණි රාඝවම් ॥ 23 ॥
ඌචුශ්ච මුදිතාස්සර්වේ රාමං ප්රාංජලයස්තදා ।
ඉමේ ස්ම පරමෝදාරාඃ කිංකරාස්තව රාඝව ॥ 24 ॥
ප්රතිගෘහ්ය ච කාකුත්ස්ථඃ සමාලභ්ය ච පාණිනා ।
මානසා මේ භවිෂ්යධ්වමිති තානභ්යචෝදයත් ॥ 25 ॥
තතඃ ප්රීතමනා රාමෝ විශ්වාමිත්රං මහාමුනිම් ।
අභිවාද්ය මහාතේජා ගමනායෝපචක්රමේ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තවිංශස්සර්ගඃ ॥
