𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌅𑌥 𑌤𑌾𑌂 𑌰𑌜𑌨𑍀𑌮𑍁𑌷𑍍𑌯 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌯𑌶𑌾𑌃 ।
𑌪𑍍𑌰𑌹𑌸𑍍𑌯 𑌰𑌾𑌘𑌵𑌂 𑌵𑌾𑌕𑍍𑌯𑌮𑍁𑌵𑌾𑌚 𑌮𑌧𑍁𑌰𑌾𑌕𑍍𑌷𑌰𑌮𑍍 ॥ 1 ॥
𑌪𑌰𑌿𑌤𑍁𑌷𑍍𑌟𑍋𑌽𑌸𑍍𑌮𑌿 𑌭𑌦𑍍𑌰𑌂 𑌤𑍇 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ।
𑌪𑍍𑌰𑍀𑌤𑍍𑌯𑌾 𑌪𑌰𑌮𑌯𑌾 𑌯𑍁𑌕𑍍𑌤𑍋 𑌦𑌦𑌾𑌮𑍍𑌯𑌸𑍍𑌤𑍍𑌰𑌾𑌣𑌿 𑌸𑌰𑍍𑌵𑌶𑌃 ॥ 2 ॥
𑌦𑍇𑌵𑌾𑌸𑍁𑌰𑌗𑌣𑌾𑌨𑍍𑌵𑌾𑌪𑌿 𑌸𑌗𑌂𑌧𑌰𑍍𑌵𑍋𑌰𑌗𑌾𑌨𑌪𑌿 ।
𑌯𑍈𑌰𑌮𑌿𑌤𑍍𑌰𑌾𑌨𑍍 𑌪𑍍𑌰𑌸𑌹𑍍𑌯𑌾𑌜𑍌 𑌵𑌶𑍀𑌕𑍃𑌤𑍍𑌯 𑌜𑌯𑌿𑌷𑍍𑌯𑌸𑌿 ॥ 3 ॥
𑌤𑌾𑌨𑌿 𑌦𑌿𑌵𑍍𑌯𑌾𑌨𑌿 𑌭𑌦𑍍𑌰𑌂 𑌤𑍇 𑌦𑌦𑌾𑌮𑍍𑌯𑌸𑍍𑌤𑍍𑌰𑌾𑌣𑌿 𑌸𑌰𑍍𑌵𑌶𑌃 ।
𑌦𑌂𑌡𑌚𑌕𑍍𑌰𑌂 𑌮𑌹𑌦𑍍𑌦𑌿𑌵𑍍𑌯𑌂 𑌤𑌵 𑌦𑌾𑌸𑍍𑌯𑌾𑌮𑌿 𑌰𑌾𑌘𑌵 ॥ 4 ॥
𑌧𑌰𑍍𑌮𑌚𑌕𑍍𑌰𑌂 𑌤𑌤𑍋 𑌵𑍀𑌰 𑌕𑌾𑌲𑌚𑌕𑍍𑌰𑌂 𑌤𑌥𑍈𑌵 𑌚 ।
𑌵𑌿𑌷𑍍𑌣𑍁𑌚𑌕𑍍𑌰𑌂 𑌤𑌥𑌾𑌤𑍍𑌯𑍁𑌗𑍍𑌰𑌮𑍈𑌂𑌦𑍍𑌰𑌮𑌸𑍍𑌤𑍍𑌰𑌂 𑌤𑌥𑍈𑌵 𑌚 ॥ 5 ॥
𑌵𑌜𑍍𑌰𑌮𑌸𑍍𑌤𑍍𑌰𑌂 𑌨𑌰𑌶𑍍𑌰𑍇𑌷𑍍𑌠 𑌶𑍈𑌵𑌂 𑌶𑍂𑌲𑌵𑌰𑌂 𑌤𑌥𑌾 ।
𑌅𑌸𑍍𑌤𑍍𑌰𑌂 𑌬𑍍𑌰𑌹𑍍𑌮𑌶𑌿𑌰𑌶𑍍𑌚𑍈𑌵 𑌐𑌷𑍀𑌕𑌮𑌪𑌿 𑌰𑌾𑌘𑌵 ॥ 6 ॥
𑌦𑌦𑌾𑌮𑌿 𑌤𑍇 𑌮𑌹𑌾𑌬𑌾𑌹𑍋 𑌬𑍍𑌰𑌾𑌹𑍍𑌮𑌮𑌸𑍍𑌤𑍍𑌰𑌮𑌨𑍁𑌤𑍍𑌤𑌮𑌮𑍍 ।
𑌗𑌦𑍇 𑌦𑍍𑌵𑍇 𑌚𑍈𑌵 𑌕𑌾𑌕𑍁𑌤𑍍𑌸𑍍𑌥 𑌮𑍋𑌦𑌕𑍀 𑌶𑌿𑌖𑌰𑍀 𑌉𑌭𑍇 ॥ ॥
𑌪𑍍𑌰𑌦𑍀𑌪𑍍𑌤𑍇 𑌨𑌰𑌶𑌾𑌰𑍍𑌦𑍂𑌲 𑌪𑍍𑌰𑌯𑌚𑍍𑌛𑌾𑌮𑌿 𑌨𑍃𑌪𑌾𑌤𑍍𑌮𑌜 ।
𑌧𑌰𑍍𑌮𑌪𑌾𑌶𑌮𑌹𑌂 𑌰𑌾𑌮 𑌕𑌾𑌲𑌪𑌾𑌶𑌂 𑌤𑌥𑍈𑌵 𑌚 ॥ ॥
𑌪𑌾𑌶𑌂 𑌵𑌾𑌰𑍁𑌣𑌮𑌸𑍍𑌤𑍍𑌰𑌂 𑌚 𑌦𑌦𑌾𑌮𑍍𑌯𑌹𑌮𑌨𑍁𑌤𑍍𑌤𑌮𑌮𑍍 ।
𑌅𑌶𑌨𑍀 𑌦𑍍𑌵𑍇 𑌪𑍍𑌰𑌯𑌚𑍍𑌛𑌾𑌮𑌿 𑌶𑍁𑌷𑍍𑌕𑌾𑌰𑍍𑌦𑍍𑌰𑍇 𑌰𑌘𑍁𑌨𑌂𑌦𑌨 ॥ ॥
𑌦𑌦𑌾𑌮𑌿 𑌚𑌾𑌸𑍍𑌤𑍍𑌰𑌂 𑌪𑍈𑌨𑌾𑌕𑌮𑌸𑍍𑌤𑍍𑌰𑌂 𑌨𑌾𑌰𑌾𑌯𑌣𑌂 𑌤𑌥𑌾 ।
𑌆𑌗𑍍𑌨𑍇𑌯𑌮𑌸𑍍𑌤𑍍𑌰𑌂 𑌦𑌯𑌿𑌤𑌂 𑌶𑌿𑌖𑌰𑌂 𑌨𑌾𑌮 𑌨𑌾𑌮𑌤𑌃 ॥ 10 ॥
𑌵𑌾𑌯𑌵𑍍𑌯𑌂 𑌪𑍍𑌰𑌥𑌨𑌂 𑌨𑌾𑌮 𑌦𑌦𑌾𑌮𑌿 𑌚 𑌤𑌵𑌾𑌨𑌘 ।
𑌅𑌸𑍍𑌤𑍍𑌰𑌂 𑌹𑌯𑌶𑌿𑌰𑍋 𑌨𑌾𑌮 𑌕𑍍𑌰𑍌𑌂𑌚𑌮𑌸𑍍𑌤𑍍𑌰𑌂 𑌤𑌥𑍈𑌵 𑌚 ।
𑌶𑌕𑍍𑌤𑌿𑌦𑍍𑌵𑌯𑌂 𑌚 𑌕𑌾𑌕𑍁𑌤𑍍𑌸𑍍𑌥 𑌦𑌦𑌾𑌮𑌿 𑌤𑌵 𑌰𑌾𑌘𑌵 ॥ 11 ॥
𑌕𑌂𑌕𑌾𑌲𑌂 𑌮𑍁𑌸𑌲𑌂 𑌘𑍋𑌰𑌂 𑌕𑌾𑌪𑌾𑌲𑌮𑌥 𑌕𑌂𑌕𑌣𑌮𑍍 ।
𑌧𑌾𑌰𑌯𑌂𑌤𑍍𑌯𑌸𑍁𑌰𑌾 𑌯𑌾𑌨𑌿 𑌦𑌦𑌾𑌮𑍍𑌯𑍇𑌤𑌾𑌨𑌿 𑌸𑌰𑍍𑌵𑌶𑌃 ॥ 12 ॥
𑌵𑍈𑌦𑍍𑌯𑌾𑌧𑌰𑌂 𑌮𑌹𑌾𑌸𑍍𑌤𑍍𑌰𑌂 𑌚 𑌨𑌂𑌦𑌨𑌂 𑌨𑌾𑌮 𑌨𑌾𑌮𑌤𑌃 ।
𑌅𑌸𑌿𑌰𑌤𑍍𑌨𑌂 𑌮𑌹𑌾𑌬𑌾𑌹𑍋 𑌦𑌦𑌾𑌮𑌿 𑌚 𑌨𑍃𑌪𑌾𑌤𑍍𑌮𑌜 ॥ 13 ॥
𑌗𑌾𑌂𑌧𑌰𑍍𑌵𑌮𑌸𑍍𑌤𑍍𑌰𑌂 𑌦𑌯𑌿𑌤𑌂 𑌮𑌾𑌨𑌵𑌂 𑌨𑌾𑌮 𑌨𑌾𑌮𑌤𑌃 ।
𑌪𑍍𑌰𑌸𑍍𑌵𑌾𑌪𑌨𑌪𑍍𑌰𑌶𑌮𑌨𑍇 𑌦𑌦𑍍𑌮𑌿 𑌸𑍌𑌰𑌂 𑌚 𑌰𑌾𑌘𑌵 ॥ 14 ॥
𑌦𑌰𑍍𑌪𑌣𑌂 𑌶𑍋𑌷𑌣𑌂 𑌚𑍈𑌵 𑌸𑌂𑌤𑌾𑌪𑌨𑌵𑌿𑌲𑌾𑌪𑌨𑍇 ।
𑌮𑌦𑌨𑌂 𑌚𑍈𑌵 𑌦𑍁𑌰𑍍𑌧𑌰𑍍𑌷𑌂 𑌕𑌂𑌦𑌰𑍍𑌪𑌦𑌯𑌿𑌤𑌂 𑌤𑌥𑌾 ॥ 15 ॥
𑌪𑍈𑌶𑌾𑌚𑌮𑌸𑍍𑌤𑍍𑌰𑌂 𑌦𑌯𑌿𑌤𑌂 𑌮𑍋𑌹𑌨𑌂 𑌨𑌾𑌮 𑌨𑌾𑌮𑌤𑌃 ।
𑌪𑍍𑌰𑌤𑍀𑌚𑍍𑌛 𑌨𑌰𑌶𑌾𑌰𑍍𑌦𑍂𑌲 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ॥ 16 ॥
𑌤𑌾𑌮𑌸𑌂 𑌨𑌰𑌶𑌾𑌰𑍍𑌦𑍂𑌲 𑌸𑍌𑌮𑌨𑌂 𑌚 𑌮𑌹𑌾𑌬𑌲 ।
𑌸𑌂𑌵𑌰𑍍𑌧𑌂 𑌚𑍈𑌵 𑌦𑍁𑌰𑍍𑌧𑌰𑍍𑌷𑌂 𑌮𑍌𑌸𑌲𑌂 𑌚 𑌨𑍃𑌪𑌾𑌤𑍍𑌮𑌜 ॥ 1 ॥
𑌸𑌤𑍍𑌯𑌮𑌸𑍍𑌤𑍍𑌰𑌂 𑌮𑌹𑌾𑌬𑌾𑌹𑍋 𑌤𑌥𑌾 𑌮𑌾𑌯𑌾𑌧𑌰𑌂 𑌪𑌰𑌮𑍍 ।
𑌘𑍋𑌰𑌂 𑌤𑍇𑌜𑌃 𑌪𑍍𑌰𑌭𑌂 𑌨𑌾𑌮 𑌪𑌰𑌤𑍇𑌜𑍋𑌽𑌪𑌕𑌰𑍍𑌷𑌣𑌮𑍍 ॥ 1 ॥
𑌸𑍌𑌮𑍍𑌯𑌾𑌸𑍍𑌤𑍍𑌰𑌂 𑌶𑌿𑌶𑌿𑌰𑌂 𑌨𑌾𑌮 𑌤𑍍𑌵𑌷𑍍𑌟𑍁𑌰𑌸𑍍𑌤𑍍𑌰𑌂 𑌸𑍁𑌦𑌾𑌮𑌨𑌮𑍍 ।
𑌦𑌾𑌰𑍁𑌣𑌂 𑌚 𑌭𑌗𑌸𑍍𑌯𑌾𑌪𑌿 𑌶𑌿𑌤𑍇𑌷𑍁 𑌮𑌥 𑌮𑌾𑌨𑌵𑌮𑍍 ॥ 1 ॥
𑌏𑌤𑌾𑌨𑍍 𑌰𑌾𑌮 𑌮𑌹𑌾𑌬𑌾𑌹𑍋 𑌕𑌾𑌮𑌰𑍂𑌪𑌾𑌨𑍍 𑌮𑌹𑌾𑌬𑌲𑌾𑌨𑍍 ।
𑌗𑍃𑌹𑌾𑌣 𑌪𑌰𑌮𑍋𑌦𑌾𑌰𑌾𑌨𑍍 𑌕𑍍𑌷𑌿𑌪𑍍𑌰𑌮𑍇𑌵 𑌨𑍃𑌪𑌾𑌤𑍍𑌮𑌜 ॥ 20 ॥
𑌸𑍍𑌥𑌿𑌤𑌸𑍍𑌤𑍁 𑌪𑍍𑌰𑌾𑌙𑍍𑌮𑍁𑌖𑍋 𑌭𑍂𑌤𑍍𑌵𑌾 𑌶𑍁𑌚𑌿𑌰𑍍𑌮𑍁𑌨𑌿𑌵𑌰𑌸𑍍𑌤𑌦𑌾 ।
𑌦𑌦𑍌 𑌰𑌾𑌮𑌾𑌯 𑌸𑍁𑌪𑍍𑌰𑍀𑌤𑍋 𑌮𑌂𑌤𑍍𑌰𑌗𑍍𑌰𑌾𑌮𑌮𑌨𑍁𑌤𑍍𑌤𑌮𑌮𑍍 ॥ 21 ॥
𑌸𑌰𑍍𑌵𑌸𑌂𑌗𑍍𑌰𑌹𑌣𑌂 𑌯𑍇𑌷𑌾𑌂 𑌦𑍈𑌵𑌤𑍈𑌰𑌪𑌿 𑌦𑍁𑌰𑍍𑌲𑌭𑌮𑍍 ।
𑌤𑌾𑌨𑍍𑌯𑌸𑍍𑌤𑍍𑌰𑌾𑌣𑌿 𑌤𑌦𑌾 𑌵𑌿𑌪𑍍𑌰𑍋 𑌰𑌾𑌘𑌵𑌾𑌯 𑌨𑍍𑌯𑌵𑍇𑌦𑌯𑌤𑍍 ॥ 22 ॥
𑌜𑌪𑌤𑌸𑍍𑌤𑍁 𑌮𑍁𑌨𑍇𑌸𑍍𑌤𑌸𑍍𑌯 𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌯 𑌧𑍀𑌮𑌤𑌃 ।
𑌉𑌪𑌤𑌸𑍍𑌥𑍁𑌰𑍍𑌮𑌹𑌾𑌰𑍍𑌹𑌾𑌣𑌿 𑌸𑌰𑍍𑌵𑌾𑌣𑍍𑌯𑌸𑍍𑌤𑍍𑌰𑌾𑌣𑌿 𑌰𑌾𑌘𑌵𑌮𑍍 ॥ 23 ॥
𑌊𑌚𑍁𑌶𑍍𑌚 𑌮𑍁𑌦𑌿𑌤𑌾𑌸𑍍𑌸𑌰𑍍𑌵𑍇 𑌰𑌾𑌮𑌂 𑌪𑍍𑌰𑌾𑌂𑌜𑌲𑌯𑌸𑍍𑌤𑌦𑌾 ।
𑌇𑌮𑍇 𑌸𑍍𑌮 𑌪𑌰𑌮𑍋𑌦𑌾𑌰𑌾𑌃 𑌕𑌿𑌂𑌕𑌰𑌾𑌸𑍍𑌤𑌵 𑌰𑌾𑌘𑌵 ॥ 24 ॥
𑌪𑍍𑌰𑌤𑌿𑌗𑍃𑌹𑍍𑌯 𑌚 𑌕𑌾𑌕𑍁𑌤𑍍𑌸𑍍𑌥𑌃 𑌸𑌮𑌾𑌲𑌭𑍍𑌯 𑌚 𑌪𑌾𑌣𑌿𑌨𑌾 ।
𑌮𑌾𑌨𑌸𑌾 𑌮𑍇 𑌭𑌵𑌿𑌷𑍍𑌯𑌧𑍍𑌵𑌮𑌿𑌤𑌿 𑌤𑌾𑌨𑌭𑍍𑌯𑌚𑍋𑌦𑌯𑌤𑍍 ॥ 25 ॥
𑌤𑌤𑌃 𑌪𑍍𑌰𑍀𑌤𑌮𑌨𑌾 𑌰𑌾𑌮𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌮𑍁𑌨𑌿𑌮𑍍 ।
𑌅𑌭𑌿𑌵𑌾𑌦𑍍𑌯 𑌮𑌹𑌾𑌤𑍇𑌜𑌾 𑌗𑌮𑌨𑌾𑌯𑍋𑌪𑌚𑌕𑍍𑌰𑌮𑍇 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌸𑌪𑍍𑌤𑌵𑌿𑌂𑌶𑌸𑍍𑌸𑌰𑍍𑌗𑌃 ॥
