ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തവിംശസ്സര്ഗഃ ।
അഥ താം രജനീമുഷ്യ വിശ്വാമിത്രോ മഹായശാഃ ।
പ്രഹസ്യ രാഘവം വാക്യമുവാച മധുരാക്ഷരമ് ॥ 1 ॥
പരിതുഷ്ടോഽസ്മി ഭദ്രം തേ രാജപുത്ര മഹായശഃ ।
പ്രീത്യാ പരമയാ യുക്തോ ദദാമ്യസ്ത്രാണി സർവശഃ ॥ 2 ॥
ദേവാസുരഗണാന്വാപി സഗംധർവോരഗാനപി ।
യൈരമിത്രാന് പ്രസഹ്യാജൌ വശീകൃത്യ ജയിഷ്യസി ॥ 3 ॥
താനി ദിവ്യാനി ഭദ്രം തേ ദദാമ്യസ്ത്രാണി സർവശഃ ।
ദംഡചക്രം മഹദ്ദിവ്യം തവ ദാസ്യാമി രാഘവ ॥ 4 ॥
ധര്മചക്രം തതോ വീര കാലചക്രം തഥൈവ ച ।
വിഷ്ണുചക്രം തഥാത്യുഗ്രമൈംദ്രമസ്ത്രം തഥൈവ ച ॥ 5 ॥
വജ്രമസ്ത്രം നരശ്രേഷ്ഠ ശൈവം ശൂലവരം തഥാ ।
അസ്ത്രം ബ്രഹ്മശിരശ്ചൈവ ഐഷീകമപി രാഘവ ॥ 6 ॥
ദദാമി തേ മഹാബാഹോ ബ്രാഹ്മമസ്ത്രമനുത്തമമ് ।
ഗദേ ദ്വേ ചൈവ കാകുത്സ്ഥ മോദകീ ശിഖരീ ഉഭേ ॥ 7 ॥
പ്രദീപ്തേ നരശാര്ദൂല പ്രയച്ഛാമി നൃപാത്മജ ।
ധര്മപാശമഹം രാമ കാലപാശം തഥൈവ ച ॥ 8 ॥
പാശം വാരുണമസ്ത്രം ച ദദാമ്യഹമനുത്തമമ് ।
അശനീ ദ്വേ പ്രയച്ഛാമി ശുഷ്കാര്ദ്രേ രഘുനംദന ॥ 9 ॥
ദദാമി ചാസ്ത്രം പൈനാകമസ്ത്രം നാരായണം തഥാ ।
ആഗ്നേയമസ്ത്രം ദയിതം ശിഖരം നാമ നാമതഃ ॥ 10 ॥
വായവ്യം പ്രഥനം നാമ ദദാമി ച തവാനഘ ।
അസ്ത്രം ഹയശിരോ നാമ ക്രൌംചമസ്ത്രം തഥൈവ ച ।
ശക്തിദ്വയം ച കാകുത്സ്ഥ ദദാമി തവ രാഘവ ॥ 11 ॥
കംകാലം മുസലം ഘോരം കാപാലമഥ കംകണമ് ।
ധാരയംത്യസുരാ യാനി ദദാമ്യേതാനി സർവശഃ ॥ 12 ॥
വൈദ്യാധരം മഹാസ്ത്രം ച നംദനം നാമ നാമതഃ ।
അസിരത്നം മഹാബാഹോ ദദാമി ച നൃപാത്മജ ॥ 13 ॥
ഗാംധർവമസ്ത്രം ദയിതം മാനവം നാമ നാമതഃ ।
പ്രസ്വാപനപ്രശമനേ ദദ്മി സൌരം ച രാഘവ ॥ 14 ॥
ദര്പണം ശോഷണം ചൈവ സംതാപനവിലാപനേ ।
മദനം ചൈവ ദുര്ധര്ഷം കംദര്പദയിതം തഥാ ॥ 15 ॥
പൈശാചമസ്ത്രം ദയിതം മോഹനം നാമ നാമതഃ ।
പ്രതീച്ഛ നരശാര്ദൂല രാജപുത്ര മഹായശഃ ॥ 16 ॥
താമസം നരശാര്ദൂല സൌമനം ച മഹാബല ।
സംവര്ധം ചൈവ ദുര്ധര്ഷം മൌസലം ച നൃപാത്മജ ॥ 17 ॥
സത്യമസ്ത്രം മഹാബാഹോ തഥാ മായാധരം പരമ് ।
ഘോരം തേജഃ പ്രഭം നാമ പരതേജോഽപകര്ഷണമ് ॥ 18 ॥
സൌമ്യാസ്ത്രം ശിശിരം നാമ ത്വഷ്ടുരസ്ത്രം സുദാമനമ് ।
ദാരുണം ച ഭഗസ്യാപി ശിതേഷു മഥ മാനവമ് ॥ 19 ॥
ഏതാന് രാമ മഹാബാഹോ കാമരൂപാന് മഹാബലാന് ।
ഗൃഹാണ പരമോദാരാന് ക്ഷിപ്രമേവ നൃപാത്മജ ॥ 20 ॥
സ്ഥിതസ്തു പ്രാങ്മുഖോ ഭൂത്വാ ശുചിര്മുനിവരസ്തദാ ।
ദദൌ രാമായ സുപ്രീതോ മംത്രഗ്രാമമനുത്തമമ് ॥ 21 ॥
സർവസംഗ്രഹണം യേഷാം ദൈവതൈരപി ദുര്ലഭമ് ।
താന്യസ്ത്രാണി തദാ വിപ്രോ രാഘവായ ന്യവേദയത് ॥ 22 ॥
ജപതസ്തു മുനേസ്തസ്യ വിശ്വാമിത്രസ്യ ധീമതഃ ।
ഉപതസ്ഥുര്മഹാര്ഹാണി സർവാണ്യസ്ത്രാണി രാഘവമ് ॥ 23 ॥
ഊചുശ്ച മുദിതാസ്സർവേ രാമം പ്രാംജലയസ്തദാ ।
ഇമേ സ്മ പരമോദാരാഃ കിംകരാസ്തവ രാഘവ ॥ 24 ॥
പ്രതിഗൃഹ്യ ച കാകുത്സ്ഥഃ സമാലഭ്യ ച പാണിനാ ।
മാനസാ മേ ഭവിഷ്യധ്വമിതി താനഭ്യചോദയത് ॥ 25 ॥
തതഃ പ്രീതമനാ രാമോ വിശ്വാമിത്രം മഹാമുനിമ് ।
അഭിവാദ്യ മഹാതേജാ ഗമനായോപചക്രമേ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തവിംശസ്സര്ഗഃ ॥
