ශ්රීමද්වාල්මීකීය රාමායණේ බාලකාංඩම් ।
අථ චතුර්ථස්සර්ගඃ ।
ප්රාප්තරාජ්යස්ය රාමස්ය වාල්මීකිර්භගවානෘෂිඃ ।
චකාර චරිතං කෘත්ස්නං විචිත්රපදමාත්මවාන් ॥ 1 ॥
චතුර්විංශත්සහස්රාණි ශ්ලෝකානාමුක්තවානෘෂිඃ ।
තථා සර්ගශතාන්පංච ෂට්කාංඩානි තථෝත්තරම් ॥ 2 ॥
කෘත්වාපි තන්මහාප්රාජ්ඤස්සභවිෂ්යං සහෝත්තරම් ।
චිංතයාමාස කෝන්වේතත්ප්රයුංජීයාදිති ප්රභුඃ ॥ 3 ॥
තස්ය චිංතයමානස්ය මහර්ෂේර්භාවිතාත්මනඃ ।
අගෘහ්ණීතාං තතඃ පාදෞ මුනිවේෂෞ කුශීලවෞ ॥ 4 ॥
කුශීලවෞ තු ධර්මජ්ඤෞ රාජපුත්රෞ යශස්විනෞ ।
භ්රාතරෞ ස්වරසංපන්නෞ දදර්ශාශ්රමවාසිනෞ ॥ 5 ॥
ස තු මේධාවිනෞ දෘෂ්ට්වා වේදේෂු පරිනිෂ්ඨිතෞ ।
වේදෝපබෘංහණාර්ථාය තාවග්රාහයත ප්රභුඃ ॥ 6 ॥
කාව්යං රාමායණං කෘත්ස්නං සීතායාශ්චරිතං මහත් ।
පෞලස්ත්යවධමිත්යේව චකාර චරිතව්රතඃ ॥ 7 ॥
පාඨ්යේ ගේයේ ච මධුරං ප්රමාණෛස්ත්රිභිරන්විතම් ।
ජාතිභිස්සප්තභිර්බද්ධං තංත්රීලයසමන්විතම් ॥ 8 ॥
රසෛශ්ශෘංගාරකාරුණ්යහාස්යවීරභයානකෛඃ ।
රෞද්රාදිභිශ්ච සංයුක්තං කාව්යමේතදගායතාම් ॥ 9 ॥
තෞ තු ගාංධර්වතත්ත්වජ්ඤෞ මූර්ඡනාස්ථානකෝවිදෞ ।
භ්රාතරෞ ස්වරසංපන්නෞ ගංධර්වාවිව රූපිණෞ ॥ 10 ॥
රූපලක්ෂණසංපන්නෞ මධුරස්වරභාෂිණෞ ।
බිංබාදිවෝද්ධෘතෞ බිංබෞ රාමදේහාත්තථාऽපරෞ ॥ 11 ॥
තෞ රාජපුත්රෞ කාර්ත්ස්න්යේන ධර්ම්යමාඛ්යානමුත්තමම් ।
වාචෝවිධේයං තත්සර්වං කෘත්වා කාව්යමනිංදිතෞ ॥ 12 ॥
ඍෂීණාං ච ද්විජාතීනාං සාධූනාං ච සමාගමේ ।
යථෝපදේශං තත්ත්වජ්ඤෞ ජගතුස්සුසමාහිතෞ ॥ 13 ॥
මහාත්මානෞ මහාභාගෞ සර්වලක්ෂණලක්ෂිතෞ ।
තෞ කදාචිත්සමේතානාමෘෂීණාං භාවිතාත්මනාම් ।
ආසීනානාං සමීපස්ථාවිදං කාව්යමගායතාම් ॥ 14 ॥
තච්ඡ්රුත්වා මුනයස්සර්වේ බාෂ්පපර්යාකුලේක්ෂණාඃ ।
සාධුසාධ්විති තාවූචුඃ පරං විස්මයමාගතාඃ ॥ 15 ॥
තේ ප්රීතමනසස්සර්වේ මුනයෝ ධර්මවත්සලාඃ ।
ප්රශශංසුඃ ප්රශස්තව්යෞ ගායමානෞ කුශීලවෞ ॥ 16 ॥
අහෝ ගීතස්ය මාධුර්යං ශ්ලෝකානාං ච විශේෂතඃ ।
චිරනිර්වෘත්තමප්යේතත්ප්රත්යක්ෂමිව දර්ශිතම් ॥ 17 ॥
ප්රවිශ්ය තාවුභෞ සුෂ්ඨු භාවං සම්යගගායතාම් ।
සහිතෞ මධුරං රක්තං සංපන්නං ස්වරසංපදා ॥ 18 ॥
ඒවං ප්රශස්යමානෞ තෞ තපශ්ශ්ලාඝ්යෛර්මහාත්මභිඃ ।
සංරක්තතරමත්යර්ථං මධුරං තාවගායතාම් ॥ 19 ॥
ප්රීතඃ කශ්චින්මුනිස්තාභ්යාං සංස්ථිතඃ කලශං දදෞ ।
ප්රසන්නෝ වල්කලං කශ්චිද්දදෞ තාභ්යාං මහායශාඃ ॥ 20 ॥
ආශ්චර්යමිදමාඛ්යානං මුනිනා සංප්රකීර්තිතම් ।
පරං කවීනාමාධාරං සමාප්තං ච යථාක්රමම් ॥ 21 ॥
අභිගීතමිදං ගීතං සර්වගීතේෂු කෝවිදෞ ।
ආයුෂ්යං පුෂ්ටිජනකං සර්වශ්රුතිමනෝහරම් ॥ 22 ॥
ප්රශස්යමානෞ සර්වත්ර කදාචිත්තත්ර ගායකෞ ।
රථ්යාසු රාජමාර්ගේෂු දදර්ශ භරතාග්රජඃ ॥ 23 ॥
ස්වවේශ්ම චානීය තදා භ්රාතරෞ ස කුශීලවෞ ।
පූජයාමාස පූජාර්හෞ රාමශ්ශත්රුනිබර්හණඃ ॥ 24 ॥
ආසීනඃ කාංචනේ දිව්යේ ස ච සිංහාසනේ ප්රභුඃ ।
උපෝපවිෂ්ටස්සචිවෛර්භ්රාතෘභිශ්ච පරංතපඃ ॥ 25 ॥
දෘෂ්ට්වා තු රූපසංපන්නෞ තාවුභෞ නියතස්තථා ।
උවාච ලක්ෂ්මණං රාමශ්ශත්රුඝ්නං භරතං තදා ॥ 26 ॥
ශ්රූයතාමිදමාඛ්යානමනයෝර්දේවවර්චසෝඃ ।
විචිත්රාර්ථපදං සම්යග්ගායකෞ තාවචෝදයත් ॥ 27 ॥
තෞ චාපි මධුරං රක්තං ස්වංචිතායතනිස්වනම් ।
තංත්රීලයවදත්යර්ථං විශ්රුතාර්ථමගායතාම් ॥ 28 ॥
හ්ලාදයත්සර්වගාත්රාණි මනාංසි හෘදයානි ච ।
ශ්රෝත්රාශ්රයසුඛං ගේයං තද්බභෞ ජනසංසදි ॥ 29 ॥
ඉමෞ මුනී පාර්ථිවලක්ෂණාන්විතෞ කුශීලවෞ චෛව මහාතපස්විනෞ ।
මමාපි තද්භූතිකරං ප්රවක්ෂ්යතේ මහානුභාවං චරිතං නිබෝධත ॥ 30 ॥
තතස්තු තෞ රාමවචඃප්රචෝදිතාවගායතාං මාර්ගවිධානසංපදා ।
ස චාපි රාමඃ පරිෂද්ගතඃ ශනෛර්බුභූෂයාසක්තමනා බභූව ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ චතුර්ථස්සර්ගඃ ॥
