𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌥𑌸𑍍𑌸𑌰𑍍𑌗𑌃 ।
𑌪𑍍𑌰𑌾𑌪𑍍𑌤𑌰𑌾𑌜𑍍𑌯𑌸𑍍𑌯 𑌰𑌾𑌮𑌸𑍍𑌯 𑌵𑌾𑌲𑍍𑌮𑍀𑌕𑌿𑌰𑍍𑌭𑌗𑌵𑌾𑌨𑍃𑌷𑌿𑌃 ।
𑌚𑌕𑌾𑌰 𑌚𑌰𑌿𑌤𑌂 𑌕𑍃𑌤𑍍𑌸𑍍𑌨𑌂 𑌵𑌿𑌚𑌿𑌤𑍍𑌰𑌪𑌦𑌮𑌾𑌤𑍍𑌮𑌵𑌾𑌨𑍍 ॥ 1 ॥
𑌚𑌤𑍁𑌰𑍍𑌵𑌿𑌂𑌶𑌤𑍍𑌸𑌹𑌸𑍍𑌰𑌾𑌣𑌿 𑌶𑍍𑌲𑍋𑌕𑌾𑌨𑌾𑌮𑍁𑌕𑍍𑌤𑌵𑌾𑌨𑍃𑌷𑌿𑌃 ।
𑌤𑌥𑌾 𑌸𑌰𑍍𑌗𑌶𑌤𑌾𑌨𑍍𑌪𑌂𑌚 𑌷𑌟𑍍𑌕𑌾𑌂𑌡𑌾𑌨𑌿 𑌤𑌥𑍋𑌤𑍍𑌤𑌰𑌮𑍍 ॥ 2 ॥
𑌕𑍃𑌤𑍍𑌵𑌾𑌪𑌿 𑌤𑌨𑍍𑌮𑌹𑌾𑌪𑍍𑌰𑌾𑌜𑍍𑌞𑌸𑍍𑌸𑌭𑌵𑌿𑌷𑍍𑌯𑌂 𑌸𑌹𑍋𑌤𑍍𑌤𑌰𑌮𑍍 ।
𑌚𑌿𑌂𑌤𑌯𑌾𑌮𑌾𑌸 𑌕𑍋𑌨𑍍𑌵𑍇𑌤𑌤𑍍𑌪𑍍𑌰𑌯𑍁𑌂𑌜𑍀𑌯𑌾𑌦𑌿𑌤𑌿 𑌪𑍍𑌰𑌭𑍁𑌃 ॥ 3 ॥
𑌤𑌸𑍍𑌯 𑌚𑌿𑌂𑌤𑌯𑌮𑌾𑌨𑌸𑍍𑌯 𑌮𑌹𑌰𑍍𑌷𑍇𑌰𑍍𑌭𑌾𑌵𑌿𑌤𑌾𑌤𑍍𑌮𑌨𑌃 ।
𑌅𑌗𑍃𑌹𑍍𑌣𑍀𑌤𑌾𑌂 𑌤𑌤𑌃 𑌪𑌾𑌦𑍌 𑌮𑍁𑌨𑌿𑌵𑍇𑌷𑍌 𑌕𑍁𑌶𑍀𑌲𑌵𑍌 ॥ 4 ॥
𑌕𑍁𑌶𑍀𑌲𑌵𑍌 𑌤𑍁 𑌧𑌰𑍍𑌮𑌜𑍍𑌞𑍌 𑌰𑌾𑌜𑌪𑍁𑌤𑍍𑌰𑍌 𑌯𑌶𑌸𑍍𑌵𑌿𑌨𑍌 ।
𑌭𑍍𑌰𑌾𑌤𑌰𑍌 𑌸𑍍𑌵𑌰𑌸𑌂𑌪𑌨𑍍𑌨𑍌 𑌦𑌦𑌰𑍍𑌶𑌾𑌶𑍍𑌰𑌮𑌵𑌾𑌸𑌿𑌨𑍌 ॥ 5 ॥
𑌸 𑌤𑍁 𑌮𑍇𑌧𑌾𑌵𑌿𑌨𑍌 𑌦𑍃𑌷𑍍𑌟𑍍𑌵𑌾 𑌵𑍇𑌦𑍇𑌷𑍁 𑌪𑌰𑌿𑌨𑌿𑌷𑍍𑌠𑌿𑌤𑍌 ।
𑌵𑍇𑌦𑍋𑌪𑌬𑍃𑌂𑌹𑌣𑌾𑌰𑍍𑌥𑌾𑌯 𑌤𑌾𑌵𑌗𑍍𑌰𑌾𑌹𑌯𑌤 𑌪𑍍𑌰𑌭𑍁𑌃 ॥ 6 ॥
𑌕𑌾𑌵𑍍𑌯𑌂 𑌰𑌾𑌮𑌾𑌯𑌣𑌂 𑌕𑍃𑌤𑍍𑌸𑍍𑌨𑌂 𑌸𑍀𑌤𑌾𑌯𑌾𑌶𑍍𑌚𑌰𑌿𑌤𑌂 𑌮𑌹𑌤𑍍 ।
𑌪𑍌𑌲𑌸𑍍𑌤𑍍𑌯𑌵𑌧𑌮𑌿𑌤𑍍𑌯𑍇𑌵 𑌚𑌕𑌾𑌰 𑌚𑌰𑌿𑌤𑌵𑍍𑌰𑌤𑌃 ॥ ॥
𑌪𑌾𑌠𑍍𑌯𑍇 𑌗𑍇𑌯𑍇 𑌚 𑌮𑌧𑍁𑌰𑌂 𑌪𑍍𑌰𑌮𑌾𑌣𑍈𑌸𑍍𑌤𑍍𑌰𑌿𑌭𑌿𑌰𑌨𑍍𑌵𑌿𑌤𑌮𑍍 ।
𑌜𑌾𑌤𑌿𑌭𑌿𑌸𑍍𑌸𑌪𑍍𑌤𑌭𑌿𑌰𑍍𑌬𑌦𑍍𑌧𑌂 𑌤𑌂𑌤𑍍𑌰𑍀𑌲𑌯𑌸𑌮𑌨𑍍𑌵𑌿𑌤𑌮𑍍 ॥ ॥
𑌰𑌸𑍈𑌶𑍍𑌶𑍃𑌂𑌗𑌾𑌰𑌕𑌾𑌰𑍁𑌣𑍍𑌯𑌹𑌾𑌸𑍍𑌯𑌵𑍀𑌰𑌭𑌯𑌾𑌨𑌕𑍈𑌃 ।
𑌰𑍌𑌦𑍍𑌰𑌾𑌦𑌿𑌭𑌿𑌶𑍍𑌚 𑌸𑌂𑌯𑍁𑌕𑍍𑌤𑌂 𑌕𑌾𑌵𑍍𑌯𑌮𑍇𑌤𑌦𑌗𑌾𑌯𑌤𑌾𑌮𑍍 ॥ ॥
𑌤𑍌 𑌤𑍁 𑌗𑌾𑌂𑌧𑌰𑍍𑌵𑌤𑌤𑍍𑌤𑍍𑌵𑌜𑍍𑌞𑍌 𑌮𑍂𑌰𑍍𑌛𑌨𑌾𑌸𑍍𑌥𑌾𑌨𑌕𑍋𑌵𑌿𑌦𑍌 ।
𑌭𑍍𑌰𑌾𑌤𑌰𑍌 𑌸𑍍𑌵𑌰𑌸𑌂𑌪𑌨𑍍𑌨𑍌 𑌗𑌂𑌧𑌰𑍍𑌵𑌾𑌵𑌿𑌵 𑌰𑍂𑌪𑌿𑌣𑍌 ॥ 10 ॥
𑌰𑍂𑌪𑌲𑌕𑍍𑌷𑌣𑌸𑌂𑌪𑌨𑍍𑌨𑍌 𑌮𑌧𑍁𑌰𑌸𑍍𑌵𑌰𑌭𑌾𑌷𑌿𑌣𑍌 ।
𑌬𑌿𑌂𑌬𑌾𑌦𑌿𑌵𑍋𑌦𑍍𑌧𑍃𑌤𑍌 𑌬𑌿𑌂𑌬𑍌 𑌰𑌾𑌮𑌦𑍇𑌹𑌾𑌤𑍍𑌤𑌥𑌾𑌽𑌪𑌰𑍌 ॥ 11 ॥
𑌤𑍌 𑌰𑌾𑌜𑌪𑍁𑌤𑍍𑌰𑍌 𑌕𑌾𑌰𑍍𑌤𑍍𑌸𑍍𑌨𑍍𑌯𑍇𑌨 𑌧𑌰𑍍𑌮𑍍𑌯𑌮𑌾𑌖𑍍𑌯𑌾𑌨𑌮𑍁𑌤𑍍𑌤𑌮𑌮𑍍 ।
𑌵𑌾𑌚𑍋𑌵𑌿𑌧𑍇𑌯𑌂 𑌤𑌤𑍍𑌸𑌰𑍍𑌵𑌂 𑌕𑍃𑌤𑍍𑌵𑌾 𑌕𑌾𑌵𑍍𑌯𑌮𑌨𑌿𑌂𑌦𑌿𑌤𑍌 ॥ 12 ॥
𑌋𑌷𑍀𑌣𑌾𑌂 𑌚 𑌦𑍍𑌵𑌿𑌜𑌾𑌤𑍀𑌨𑌾𑌂 𑌸𑌾𑌧𑍂𑌨𑌾𑌂 𑌚 𑌸𑌮𑌾𑌗𑌮𑍇 ।
𑌯𑌥𑍋𑌪𑌦𑍇𑌶𑌂 𑌤𑌤𑍍𑌤𑍍𑌵𑌜𑍍𑌞𑍌 𑌜𑌗𑌤𑍁𑌸𑍍𑌸𑍁𑌸𑌮𑌾𑌹𑌿𑌤𑍌 ॥ 13 ॥
𑌮𑌹𑌾𑌤𑍍𑌮𑌾𑌨𑍌 𑌮𑌹𑌾𑌭𑌾𑌗𑍌 𑌸𑌰𑍍𑌵𑌲𑌕𑍍𑌷𑌣𑌲𑌕𑍍𑌷𑌿𑌤𑍌 ।
𑌤𑍌 𑌕𑌦𑌾𑌚𑌿𑌤𑍍𑌸𑌮𑍇𑌤𑌾𑌨𑌾𑌮𑍃𑌷𑍀𑌣𑌾𑌂 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ।
𑌆𑌸𑍀𑌨𑌾𑌨𑌾𑌂 𑌸𑌮𑍀𑌪𑌸𑍍𑌥𑌾𑌵𑌿𑌦𑌂 𑌕𑌾𑌵𑍍𑌯𑌮𑌗𑌾𑌯𑌤𑌾𑌮𑍍 ॥ 14 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌮𑍁𑌨𑌯𑌸𑍍𑌸𑌰𑍍𑌵𑍇 𑌬𑌾𑌷𑍍𑌪𑌪𑌰𑍍𑌯𑌾𑌕𑍁𑌲𑍇𑌕𑍍𑌷𑌣𑌾𑌃 ।
𑌸𑌾𑌧𑍁𑌸𑌾𑌧𑍍𑌵𑌿𑌤𑌿 𑌤𑌾𑌵𑍂𑌚𑍁𑌃 𑌪𑌰𑌂 𑌵𑌿𑌸𑍍𑌮𑌯𑌮𑌾𑌗𑌤𑌾𑌃 ॥ 15 ॥
𑌤𑍇 𑌪𑍍𑌰𑍀𑌤𑌮𑌨𑌸𑌸𑍍𑌸𑌰𑍍𑌵𑍇 𑌮𑍁𑌨𑌯𑍋 𑌧𑌰𑍍𑌮𑌵𑌤𑍍𑌸𑌲𑌾𑌃 ।
𑌪𑍍𑌰𑌶𑌶𑌂𑌸𑍁𑌃 𑌪𑍍𑌰𑌶𑌸𑍍𑌤𑌵𑍍𑌯𑍌 𑌗𑌾𑌯𑌮𑌾𑌨𑍌 𑌕𑍁𑌶𑍀𑌲𑌵𑍌 ॥ 16 ॥
𑌅𑌹𑍋 𑌗𑍀𑌤𑌸𑍍𑌯 𑌮𑌾𑌧𑍁𑌰𑍍𑌯𑌂 𑌶𑍍𑌲𑍋𑌕𑌾𑌨𑌾𑌂 𑌚 𑌵𑌿𑌶𑍇𑌷𑌤𑌃 ।
𑌚𑌿𑌰𑌨𑌿𑌰𑍍𑌵𑍃𑌤𑍍𑌤𑌮𑌪𑍍𑌯𑍇𑌤𑌤𑍍𑌪𑍍𑌰𑌤𑍍𑌯𑌕𑍍𑌷𑌮𑌿𑌵 𑌦𑌰𑍍𑌶𑌿𑌤𑌮𑍍 ॥ 1 ॥
𑌪𑍍𑌰𑌵𑌿𑌶𑍍𑌯 𑌤𑌾𑌵𑍁𑌭𑍌 𑌸𑍁𑌷𑍍𑌠𑍁 𑌭𑌾𑌵𑌂 𑌸𑌮𑍍𑌯𑌗𑌗𑌾𑌯𑌤𑌾𑌮𑍍 ।
𑌸𑌹𑌿𑌤𑍌 𑌮𑌧𑍁𑌰𑌂 𑌰𑌕𑍍𑌤𑌂 𑌸𑌂𑌪𑌨𑍍𑌨𑌂 𑌸𑍍𑌵𑌰𑌸𑌂𑌪𑌦𑌾 ॥ 1 ॥
𑌏𑌵𑌂 𑌪𑍍𑌰𑌶𑌸𑍍𑌯𑌮𑌾𑌨𑍌 𑌤𑍌 𑌤𑌪𑌶𑍍𑌶𑍍𑌲𑌾𑌘𑍍𑌯𑍈𑌰𑍍𑌮𑌹𑌾𑌤𑍍𑌮𑌭𑌿𑌃 ।
𑌸𑌂𑌰𑌕𑍍𑌤𑌤𑌰𑌮𑌤𑍍𑌯𑌰𑍍𑌥𑌂 𑌮𑌧𑍁𑌰𑌂 𑌤𑌾𑌵𑌗𑌾𑌯𑌤𑌾𑌮𑍍 ॥ 1 ॥
𑌪𑍍𑌰𑍀𑌤𑌃 𑌕𑌶𑍍𑌚𑌿𑌨𑍍𑌮𑍁𑌨𑌿𑌸𑍍𑌤𑌾𑌭𑍍𑌯𑌾𑌂 𑌸𑌂𑌸𑍍𑌥𑌿𑌤𑌃 𑌕𑌲𑌶𑌂 𑌦𑌦𑍌 ।
𑌪𑍍𑌰𑌸𑌨𑍍𑌨𑍋 𑌵𑌲𑍍𑌕𑌲𑌂 𑌕𑌶𑍍𑌚𑌿𑌦𑍍𑌦𑌦𑍌 𑌤𑌾𑌭𑍍𑌯𑌾𑌂 𑌮𑌹𑌾𑌯𑌶𑌾𑌃 ॥ 20 ॥
𑌆𑌶𑍍𑌚𑌰𑍍𑌯𑌮𑌿𑌦𑌮𑌾𑌖𑍍𑌯𑌾𑌨𑌂 𑌮𑍁𑌨𑌿𑌨𑌾 𑌸𑌂𑌪𑍍𑌰𑌕𑍀𑌰𑍍𑌤𑌿𑌤𑌮𑍍 ।
𑌪𑌰𑌂 𑌕𑌵𑍀𑌨𑌾𑌮𑌾𑌧𑌾𑌰𑌂 𑌸𑌮𑌾𑌪𑍍𑌤𑌂 𑌚 𑌯𑌥𑌾𑌕𑍍𑌰𑌮𑌮𑍍 ॥ 21 ॥
𑌅𑌭𑌿𑌗𑍀𑌤𑌮𑌿𑌦𑌂 𑌗𑍀𑌤𑌂 𑌸𑌰𑍍𑌵𑌗𑍀𑌤𑍇𑌷𑍁 𑌕𑍋𑌵𑌿𑌦𑍌 ।
𑌆𑌯𑍁𑌷𑍍𑌯𑌂 𑌪𑍁𑌷𑍍𑌟𑌿𑌜𑌨𑌕𑌂 𑌸𑌰𑍍𑌵𑌶𑍍𑌰𑍁𑌤𑌿𑌮𑌨𑍋𑌹𑌰𑌮𑍍 ॥ 22 ॥
𑌪𑍍𑌰𑌶𑌸𑍍𑌯𑌮𑌾𑌨𑍌 𑌸𑌰𑍍𑌵𑌤𑍍𑌰 𑌕𑌦𑌾𑌚𑌿𑌤𑍍𑌤𑌤𑍍𑌰 𑌗𑌾𑌯𑌕𑍌 ।
𑌰𑌥𑍍𑌯𑌾𑌸𑍁 𑌰𑌾𑌜𑌮𑌾𑌰𑍍𑌗𑍇𑌷𑍁 𑌦𑌦𑌰𑍍𑌶 𑌭𑌰𑌤𑌾𑌗𑍍𑌰𑌜𑌃 ॥ 23 ॥
𑌸𑍍𑌵𑌵𑍇𑌶𑍍𑌮 𑌚𑌾𑌨𑍀𑌯 𑌤𑌦𑌾 𑌭𑍍𑌰𑌾𑌤𑌰𑍌 𑌸 𑌕𑍁𑌶𑍀𑌲𑌵𑍌 ।
𑌪𑍂𑌜𑌯𑌾𑌮𑌾𑌸 𑌪𑍂𑌜𑌾𑌰𑍍𑌹𑍌 𑌰𑌾𑌮𑌶𑍍𑌶𑌤𑍍𑌰𑍁𑌨𑌿𑌬𑌰𑍍𑌹𑌣𑌃 ॥ 24 ॥
𑌆𑌸𑍀𑌨𑌃 𑌕𑌾𑌂𑌚𑌨𑍇 𑌦𑌿𑌵𑍍𑌯𑍇 𑌸 𑌚 𑌸𑌿𑌂𑌹𑌾𑌸𑌨𑍇 𑌪𑍍𑌰𑌭𑍁𑌃 ।
𑌉𑌪𑍋𑌪𑌵𑌿𑌷𑍍𑌟𑌸𑍍𑌸𑌚𑌿𑌵𑍈𑌰𑍍𑌭𑍍𑌰𑌾𑌤𑍃𑌭𑌿𑌶𑍍𑌚 𑌪𑌰𑌂𑌤𑌪𑌃 ॥ 25 ॥
𑌦𑍃𑌷𑍍𑌟𑍍𑌵𑌾 𑌤𑍁 𑌰𑍂𑌪𑌸𑌂𑌪𑌨𑍍𑌨𑍌 𑌤𑌾𑌵𑍁𑌭𑍌 𑌨𑌿𑌯𑌤𑌸𑍍𑌤𑌥𑌾 ।
𑌉𑌵𑌾𑌚 𑌲𑌕𑍍𑌷𑍍𑌮𑌣𑌂 𑌰𑌾𑌮𑌶𑍍𑌶𑌤𑍍𑌰𑍁𑌘𑍍𑌨𑌂 𑌭𑌰𑌤𑌂 𑌤𑌦𑌾 ॥ 26 ॥
𑌶𑍍𑌰𑍂𑌯𑌤𑌾𑌮𑌿𑌦𑌮𑌾𑌖𑍍𑌯𑌾𑌨𑌮𑌨𑌯𑍋𑌰𑍍𑌦𑍇𑌵𑌵𑌰𑍍𑌚𑌸𑍋𑌃 ।
𑌵𑌿𑌚𑌿𑌤𑍍𑌰𑌾𑌰𑍍𑌥𑌪𑌦𑌂 𑌸𑌮𑍍𑌯𑌗𑍍𑌗𑌾𑌯𑌕𑍌 𑌤𑌾𑌵𑌚𑍋𑌦𑌯𑌤𑍍 ॥ 2 ॥
𑌤𑍌 𑌚𑌾𑌪𑌿 𑌮𑌧𑍁𑌰𑌂 𑌰𑌕𑍍𑌤𑌂 𑌸𑍍𑌵𑌂𑌚𑌿𑌤𑌾𑌯𑌤𑌨𑌿𑌸𑍍𑌵𑌨𑌮𑍍 ।
𑌤𑌂𑌤𑍍𑌰𑍀𑌲𑌯𑌵𑌦𑌤𑍍𑌯𑌰𑍍𑌥𑌂 𑌵𑌿𑌶𑍍𑌰𑍁𑌤𑌾𑌰𑍍𑌥𑌮𑌗𑌾𑌯𑌤𑌾𑌮𑍍 ॥ 2 ॥
𑌹𑍍𑌲𑌾𑌦𑌯𑌤𑍍𑌸𑌰𑍍𑌵𑌗𑌾𑌤𑍍𑌰𑌾𑌣𑌿 𑌮𑌨𑌾𑌂𑌸𑌿 𑌹𑍃𑌦𑌯𑌾𑌨𑌿 𑌚 ।
𑌶𑍍𑌰𑍋𑌤𑍍𑌰𑌾𑌶𑍍𑌰𑌯𑌸𑍁𑌖𑌂 𑌗𑍇𑌯𑌂 𑌤𑌦𑍍𑌬𑌭𑍌 𑌜𑌨𑌸𑌂𑌸𑌦𑌿 ॥ 2 ॥
𑌇𑌮𑍌 𑌮𑍁𑌨𑍀 𑌪𑌾𑌰𑍍𑌥𑌿𑌵𑌲𑌕𑍍𑌷𑌣𑌾𑌨𑍍𑌵𑌿𑌤𑍌 𑌕𑍁𑌶𑍀𑌲𑌵𑍌 𑌚𑍈𑌵 𑌮𑌹𑌾𑌤𑌪𑌸𑍍𑌵𑌿𑌨𑍌 ।
𑌮𑌮𑌾𑌪𑌿 𑌤𑌦𑍍𑌭𑍂𑌤𑌿𑌕𑌰𑌂 𑌪𑍍𑌰𑌵𑌕𑍍𑌷𑍍𑌯𑌤𑍇 𑌮𑌹𑌾𑌨𑍁𑌭𑌾𑌵𑌂 𑌚𑌰𑌿𑌤𑌂 𑌨𑌿𑌬𑍋𑌧𑌤 ॥ 30 ॥
𑌤𑌤𑌸𑍍𑌤𑍁 𑌤𑍌 𑌰𑌾𑌮𑌵𑌚𑌃𑌪𑍍𑌰𑌚𑍋𑌦𑌿𑌤𑌾𑌵𑌗𑌾𑌯𑌤𑌾𑌂 𑌮𑌾𑌰𑍍𑌗𑌵𑌿𑌧𑌾𑌨𑌸𑌂𑌪𑌦𑌾 ।
𑌸 𑌚𑌾𑌪𑌿 𑌰𑌾𑌮𑌃 𑌪𑌰𑌿𑌷𑌦𑍍𑌗𑌤𑌃 𑌶𑌨𑍈𑌰𑍍𑌬𑍁𑌭𑍂𑌷𑌯𑌾𑌸𑌕𑍍𑌤𑌮𑌨𑌾 𑌬𑌭𑍂𑌵 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌚𑌤𑍁𑌰𑍍𑌥𑌸𑍍𑌸𑌰𑍍𑌗𑌃 ॥
