śrīmadvālmīkīya rāmāyaṇē bālakāṇḍam ।
atha chatuḥṣaṣṭitamassargaḥ ।
surakāryamidaṃ rambhē kartavyaṃ sumahattvayā ।
lōbhanaṃ kauśikasyēha kāmamōhasamanvitam ॥ 1 ॥
tathōktā sā'psarā rāma sahasrākṣēṇa dhīmatā ।
vrīḍitā prāñjalirvākyaṃ pratyuvācha surēśvaram ॥ 2 ॥
ayaṃ surapatē ghōrō viśvāmitrō mahāmuniḥ ।
ghōramutsṛjatē krōdhaṃ mayi dēva na saṃśayaḥ ॥ 3 ॥
tatō hi mē bhayaṃ dēva prāsādaṃ kartumarhasi ।
ēvamuktastayā rāma rambhayā bhītayā tadā ॥ 4 ॥
tāmuvācha sahasrākṣō vēpamānāṃ kṛtāñjalim ।
mābhaiṣī rambhē bhadraṃ tē kuruṣva mama śāsanam ॥ 5 ॥
kōkilō hṛdayagrāhī mādhavē ruchiradrumē ।
ahaṃ kandarpasahita ssthāsyāmi tava pārśvataḥ ॥ 6 ॥
tvaṃ hi rūpaṃ bahuguṇaṃ kṛtvā paramabhāsvaram ।
tamṛṣiṃ kauśikaṃ rambhē bhēdayasva tapasvinam ॥ 7 ॥
sā śrutvā vachanaṃ tasya kṛtvā rūpamanuttamam ।
lōbhayāmāsa lalitā viśvāmitraṃ śuchismitā ॥ 8 ॥
kōkilasya cha śuśrāva valgu vyāharataḥ svanam ।
samprahṛṣṭēna manasā tata ēnāmudaikṣata ॥ 9 ॥
atha tasya cha śabdēna gītēnāpratimēna cha ।
darśanēna cha rambhāyā munissandēhamāgataḥ ॥ 10 ॥
sahasrākṣasya tatkarma vijñāya munipuṅgavaḥ ।
rambhāṃ krōdhasamāviṣṭa śśaśāpa kuśikātmajaḥ ॥ 11 ॥
yanmāṃ lōbhayasē rambhē kāmakrōdhajayaiṣiṇam ।
daśavarṣasahasrāṇi śailī sthāsyasi durbhagē ॥ 12 ॥
brāhmaṇa ssumahātējā stapōbalasamanvitaḥ ।
uddhariṣyati rambhē tvāṃ matkrōdhakaluṣīkṛtām ॥ 13 ॥
ēvamuktvā mahātējā viśvāmitrō mahāmuniḥ ।
aśaknuvan dhārayituṃ krōdhaṃ santāpamāgataḥ ॥ 14 ॥
tasya śāpēna mahatā rambhā śailī tadā'bhavat ।
vachaśśṛtvā cha kandarpō maharṣēssa cha nirgataḥ ॥ 15 ॥
kōpēna sa mahātējāstapō'paharaṇē kṛtē ।
indriyairajitai rāma na lēbhē śāntimātmanaḥ ॥ 16 ॥
babhūvāsya manaśchintā tapō'paharaṇē kṛtē ।
naiva krōdhaṃ gamiṣyāmi na cha vakṣyē kathañchana ॥ 17 ॥
athavā nōchChavasiṣyāmi saṃvatsaraśatānyapi ।
ahaṃ viśōṣayiṣyāmi hyātmānaṃ vijitēndriyaḥ ॥ 18 ॥
tāvadyāvaddhi mē prāptaṃ brāhmaṇyaṃ tapasā''rjitam ।
anuchChavasannabhuñjāna stiṣṭhēyaṃ śāśvatīssamāḥ ॥ 19 ॥
na hi mē tapyamānasya kṣayaṃ yāsyanti mūrtayaḥ ।
ēvaṃ varṣasahasrasya dīkṣāṃ sa munipuṅgavaḥ ॥ 20 ॥
ityārṣē śrīmadrāmāyaṇē vālmīkīya ādikāvyē bālakāṇḍē chatuḥṣaṣṭitamassargaḥ ॥
