శ్రీమద్వాల్మీకీయ రామాయణే బాలకాండమ్ ।
అథ చతుఃషష్టితమస్సర్గః ।
సురకార్యమిదం రంభే కర్తవ్యం సుమహత్త్వయా ।
లోభనం కౌశికస్యేహ కామమోహసమన్వితమ్ ॥ 1 ॥
తథోక్తా సాఽప్సరా రామ సహస్రాక్షేణ ధీమతా ।
వ్రీడితా ప్రాంజలిర్వాక్యం ప్రత్యువాచ సురేశ్వరమ్ ॥ 2 ॥
అయం సురపతే ఘోరో విశ్వామిత్రో మహామునిః ।
ఘోరముత్సృజతే క్రోధం మయి దేవ న సంశయః ॥ 3 ॥
తతో హి మే భయం దేవ ప్రాసాదం కర్తుమర్హసి ।
ఏవముక్తస్తయా రామ రంభయా భీతయా తదా ॥ 4 ॥
తామువాచ సహస్రాక్షో వేపమానాం కృతాంజలిమ్ ।
మాభైషీ రంభే భద్రం తే కురుష్వ మమ శాసనమ్ ॥ 5 ॥
కోకిలో హృదయగ్రాహీ మాధవే రుచిరద్రుమే ।
అహం కందర్పసహిత స్స్థాస్యామి తవ పార్శ్వతః ॥ 6 ॥
త్వం హి రూపం బహుగుణం కృత్వా పరమభాస్వరమ్ ।
తమృషిం కౌశికం రంభే భేదయస్వ తపస్వినమ్ ॥ 7 ॥
సా శ్రుత్వా వచనం తస్య కృత్వా రూపమనుత్తమమ్ ।
లోభయామాస లలితా విశ్వామిత్రం శుచిస్మితా ॥ 8 ॥
కోకిలస్య చ శుశ్రావ వల్గు వ్యాహరతః స్వనమ్ ।
సంప్రహృష్టేన మనసా తత ఏనాముదైక్షత ॥ 9 ॥
అథ తస్య చ శబ్దేన గీతేనాప్రతిమేన చ ।
దర్శనేన చ రంభాయా మునిస్సందేహమాగతః ॥ 10 ॥
సహస్రాక్షస్య తత్కర్మ విజ్ఞాయ మునిపుంగవః ।
రంభాం క్రోధసమావిష్ట శ్శశాప కుశికాత్మజః ॥ 11 ॥
యన్మాం లోభయసే రంభే కామక్రోధజయైషిణమ్ ।
దశవర్షసహస్రాణి శైలీ స్థాస్యసి దుర్భగే ॥ 12 ॥
బ్రాహ్మణ స్సుమహాతేజా స్తపోబలసమన్వితః ।
ఉద్ధరిష్యతి రంభే త్వాం మత్క్రోధకలుషీకృతామ్ ॥ 13 ॥
ఏవముక్త్వా మహాతేజా విశ్వామిత్రో మహామునిః ।
అశక్నువన్ ధారయితుం క్రోధం సంతాపమాగతః ॥ 14 ॥
తస్య శాపేన మహతా రంభా శైలీ తదాఽభవత్ ।
వచశ్శృత్వా చ కందర్పో మహర్షేస్స చ నిర్గతః ॥ 15 ॥
కోపేన స మహాతేజాస్తపోఽపహరణే కృతే ।
ఇంద్రియైరజితై రామ న లేభే శాంతిమాత్మనః ॥ 16 ॥
బభూవాస్య మనశ్చింతా తపోఽపహరణే కృతే ।
నైవ క్రోధం గమిష్యామి న చ వక్ష్యే కథంచన ॥ 17 ॥
అథవా నోచ్ఛవసిష్యామి సంవత్సరశతాన్యపి ।
అహం విశోషయిష్యామి హ్యాత్మానం విజితేంద్రియః ॥ 18 ॥
తావద్యావద్ధి మే ప్రాప్తం బ్రాహ్మణ్యం తపసాఽఽర్జితమ్ ।
అనుచ్ఛవసన్నభుంజాన స్తిష్ఠేయం శాశ్వతీస్సమాః ॥ 19 ॥
న హి మే తప్యమానస్య క్షయం యాస్యంతి మూర్తయః ।
ఏవం వర్షసహస్రస్య దీక్షాం స మునిపుంగవః ॥ 20 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే చతుఃషష్టితమస్సర్గః ॥
