ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଚତୁଃଷଷ୍ଟିତମସ୍ସର୍ଗଃ ।
ସୁରକାର୍ୟମିଦଂ ରଂଭେ କର୍ତଵ୍ୟଂ ସୁମହତ୍ତ୍ଵୟା ।
ଲୋଭନଂ କୌଶିକସ୍ୟେହ କାମମୋହସମନ୍ଵିତମ୍ ॥ 1 ॥
ତଥୋକ୍ତା ସାଽପ୍ସରା ରାମ ସହସ୍ରାକ୍ଷେଣ ଧୀମତା ।
ଵ୍ରୀଡିତା ପ୍ରାଂଜଲିର୍ଵାକ୍ୟଂ ପ୍ରତ୍ୟୁଵାଚ ସୁରେଶ୍ଵରମ୍ ॥ 2 ॥
ଅୟଂ ସୁରପତେ ଘୋରୋ ଵିଶ୍ଵାମିତ୍ରୋ ମହାମୁନିଃ ।
ଘୋରମୁତ୍ସୃଜତେ କ୍ରୋଧଂ ମୟି ଦେଵ ନ ସଂଶୟଃ ॥ 3 ॥
ତତୋ ହି ମେ ଭୟଂ ଦେଵ ପ୍ରାସାଦଂ କର୍ତୁମର୍ହସି ।
ଏଵମୁକ୍ତସ୍ତୟା ରାମ ରଂଭୟା ଭୀତୟା ତଦା ॥ 4 ॥
ତାମୁଵାଚ ସହସ୍ରାକ୍ଷୋ ଵେପମାନାଂ କୃତାଂଜଲିମ୍ ।
ମାଭୈଷୀ ରଂଭେ ଭଦ୍ରଂ ତେ କୁରୁଷ୍ଵ ମମ ଶାସନମ୍ ॥ 5 ॥
କୋକିଲୋ ହୃଦୟଗ୍ରାହୀ ମାଧଵେ ରୁଚିରଦ୍ରୁମେ ।
ଅହଂ କଂଦର୍ପସହିତ ସ୍ସ୍ଥାସ୍ୟାମି ତଵ ପାର୍ଶ୍ଵତଃ ॥ 6 ॥
ତ୍ଵଂ ହି ରୂପଂ ବହୁଗୁଣଂ କୃତ୍ଵା ପରମଭାସ୍ଵରମ୍ ।
ତମୃଷିଂ କୌଶିକଂ ରଂଭେ ଭେଦୟସ୍ଵ ତପସ୍ଵିନମ୍ ॥ 7 ॥
ସା ଶ୍ରୁତ୍ଵା ଵଚନଂ ତସ୍ୟ କୃତ୍ଵା ରୂପମନୁତ୍ତମମ୍ ।
ଲୋଭୟାମାସ ଲଲିତା ଵିଶ୍ଵାମିତ୍ରଂ ଶୁଚିସ୍ମିତା ॥ 8 ॥
କୋକିଲସ୍ୟ ଚ ଶୁଶ୍ରାଵ ଵଲ୍ଗୁ ଵ୍ୟାହରତଃ ସ୍ଵନମ୍ ।
ସଂପ୍ରହୃଷ୍ଟେନ ମନସା ତତ ଏନାମୁଦୈକ୍ଷତ ॥ 9 ॥
ଅଥ ତସ୍ୟ ଚ ଶବ୍ଦେନ ଗୀତେନାପ୍ରତିମେନ ଚ ।
ଦର୍ଶନେନ ଚ ରଂଭାୟା ମୁନିସ୍ସଂଦେହମାଗତଃ ॥ 10 ॥
ସହସ୍ରାକ୍ଷସ୍ୟ ତତ୍କର୍ମ ଵିଜ୍ଞାୟ ମୁନିପୁଂଗଵଃ ।
ରଂଭାଂ କ୍ରୋଧସମାଵିଷ୍ଟ ଶ୍ଶଶାପ କୁଶିକାତ୍ମଜଃ ॥ 11 ॥
ୟନ୍ମାଂ ଲୋଭୟସେ ରଂଭେ କାମକ୍ରୋଧଜୟୈଷିଣମ୍ ।
ଦଶଵର୍ଷସହସ୍ରାଣି ଶୈଲୀ ସ୍ଥାସ୍ୟସି ଦୁର୍ଭଗେ ॥ 12 ॥
ବ୍ରାହ୍ମଣ ସ୍ସୁମହାତେଜା ସ୍ତପୋବଲସମନ୍ଵିତଃ ।
ଉଦ୍ଧରିଷ୍ୟତି ରଂଭେ ତ୍ଵାଂ ମତ୍କ୍ରୋଧକଲୁଷୀକୃତାମ୍ ॥ 13 ॥
ଏଵମୁକ୍ତ୍ଵା ମହାତେଜା ଵିଶ୍ଵାମିତ୍ରୋ ମହାମୁନିଃ ।
ଅଶକ୍ନୁଵନ୍ ଧାରୟିତୁଂ କ୍ରୋଧଂ ସଂତାପମାଗତଃ ॥ 14 ॥
ତସ୍ୟ ଶାପେନ ମହତା ରଂଭା ଶୈଲୀ ତଦାଽଭଵତ୍ ।
ଵଚଶ୍ଶୃତ୍ଵା ଚ କଂଦର୍ପୋ ମହର୍ଷେସ୍ସ ଚ ନିର୍ଗତଃ ॥ 15 ॥
କୋପେନ ସ ମହାତେଜାସ୍ତପୋଽପହରଣେ କୃତେ ।
ଇଂଦ୍ରିୟୈରଜିତୈ ରାମ ନ ଲେଭେ ଶାଂତିମାତ୍ମନଃ ॥ 16 ॥
ବଭୂଵାସ୍ୟ ମନଶ୍ଚିଂତା ତପୋଽପହରଣେ କୃତେ ।
ନୈଵ କ୍ରୋଧଂ ଗମିଷ୍ୟାମି ନ ଚ ଵକ୍ଷ୍ୟେ କଥଂଚନ ॥ 17 ॥
ଅଥଵା ନୋଚ୍ଛଵସିଷ୍ୟାମି ସଂଵତ୍ସରଶତାନ୍ୟପି ।
ଅହଂ ଵିଶୋଷୟିଷ୍ୟାମି ହ୍ୟାତ୍ମାନଂ ଵିଜିତେଂଦ୍ରିୟଃ ॥ 18 ॥
ତାଵଦ୍ୟାଵଦ୍ଧି ମେ ପ୍ରାପ୍ତଂ ବ୍ରାହ୍ମଣ୍ୟଂ ତପସାଽଽର୍ଜିତମ୍ ।
ଅନୁଚ୍ଛଵସନ୍ନଭୁଂଜାନ ସ୍ତିଷ୍ଠେୟଂ ଶାଶ୍ଵତୀସ୍ସମାଃ ॥ 19 ॥
ନ ହି ମେ ତପ୍ୟମାନସ୍ୟ କ୍ଷୟଂ ୟାସ୍ୟଂତି ମୂର୍ତୟଃ ।
ଏଵଂ ଵର୍ଷସହସ୍ରସ୍ୟ ଦୀକ୍ଷାଂ ସ ମୁନିପୁଂଗଵଃ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଚତୁଃଷଷ୍ଟିତମସ୍ସର୍ଗଃ ॥
