𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑍋𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌤𑌤 𑌶𑍍𑌶𑌿𑌰𑌸𑌿 𑌕𑍃𑌤𑍍𑌵𑌾 𑌤𑍁 𑌪𑌾𑌦𑍁𑌕𑍇 𑌭𑌰𑌤𑌸𑍍𑌤𑌦𑌾 ।
𑌆𑌰𑍁𑌰𑍋𑌹 𑌰𑌥𑌂 𑌹𑍃𑌷𑍍𑌟𑌃 𑌶𑌤𑍍𑌰𑍁𑌘𑍍𑌨𑍇𑌨 𑌸𑌮𑌨𑍍𑌵𑌿𑌤𑌃 ॥ 1 ॥
𑌵𑌸𑌿𑌷𑍍𑌠𑍋 𑌵𑌾𑌮𑌦𑍇𑌵𑌶𑍍𑌚 𑌜𑌾𑌬𑌾𑌲𑌿𑌶𑍍𑌚 𑌦𑍃𑌢𑌵𑍍𑌰𑌤𑌃 ।
𑌅𑌗𑍍𑌰𑌤𑌃 𑌪𑍍𑌰𑌯𑌯𑍁 𑌸𑍍𑌸𑌰𑍍𑌵𑍇 𑌮𑌂𑌤𑍍𑌰𑌿𑌣𑍋 𑌮𑌂𑌤𑍍𑌰𑌪𑍂𑌜𑌿𑌤𑌾𑌃 ॥ 2 ॥
𑌮𑌂𑌦𑌾𑌕𑌿𑌨𑍀𑌂 𑌨𑌦𑍀𑌂 𑌰𑌮𑍍𑌯𑌾𑌂 𑌪𑍍𑌰𑌾𑌙𑍍𑌮𑍁𑌖𑌾𑌸𑍍𑌤𑍇 𑌯𑌯𑍁𑌸𑍍𑌤𑌦𑌾 ।
𑌪𑍍𑌰𑌦𑌕𑍍𑌷𑌿𑌣𑌂 𑌚 𑌕𑍁𑌰𑍍𑌵𑌾𑌣𑌾𑌶𑍍𑌚𑌿𑌤𑍍𑌰𑌕𑍂𑌟𑌂 𑌮𑌹𑌾𑌗𑌿𑌰𑌿𑌮𑍍 ॥ 3 ॥
𑌪𑌶𑍍𑌯𑌂𑌧𑌾𑌤𑍁𑌸𑌹𑌸𑍍𑌰𑌾𑌣𑌿 𑌰𑌮𑍍𑌯𑌾𑌣𑌿 𑌵𑌿𑌵𑌿𑌧𑌾𑌨𑌿 𑌚 ।
𑌪𑍍𑌰𑌯𑌯𑍌 𑌤𑌸𑍍𑌯 𑌪𑌾𑌰𑍍𑌶𑍍𑌵𑍇𑌨 𑌸𑌸𑍈𑌨𑍍𑌯𑍋 𑌭𑌰𑌤𑌸𑍍𑌤𑌦𑌾 ॥ 4 ॥
𑌅𑌦𑍂𑌰𑌾𑌚𑍍𑌚𑌿𑌤𑍍𑌰𑌕𑍂𑌟𑌸𑍍𑌯 𑌦𑌦𑌰𑍍𑌶 𑌭𑌰𑌤𑌸𑍍𑌤𑌦𑌾 ।
𑌆𑌶𑍍𑌰𑌮𑌂 𑌯𑌤𑍍𑌰 𑌸 𑌮𑍁𑌨𑌿𑌰𑍍𑌭𑌰𑌦𑍍𑌵𑌾𑌜𑌃 𑌕𑍃𑌤𑌾𑌲𑌯𑌃 ॥ 5 ॥
𑌸 𑌤𑌮𑌾𑌶𑍍𑌰𑌮𑌮𑌾𑌗𑌮𑍍𑌯 𑌭𑌰𑌦𑍍𑌵𑌾𑌜𑌸𑍍𑌯 𑌬𑍁𑌦𑍍𑌧𑌿𑌮𑌾𑌨𑍍 ।
𑌅𑌵𑌤𑍀𑌰𑍍𑌯 𑌰𑌥𑌾𑌤𑍍𑌪𑌾𑌦𑍌 𑌵𑌵𑌂𑌦𑍇 𑌭𑌰𑌤𑌸𑍍𑌤𑌦𑌾 ॥ 6 ॥
𑌤𑌤𑍋 𑌹𑍃𑌷𑍍𑌟𑍋 𑌭𑌰𑌦𑍍𑌵𑌾𑌜𑍋 𑌭𑌰𑌤𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌅𑌪𑌿 𑌕𑍃𑌤𑍍𑌯𑌂 𑌕𑍃𑌤𑌂 𑌤𑌾𑌤 𑌰𑌾𑌮𑍇𑌣 𑌚 𑌸𑌮𑌾𑌗𑌤𑌮𑍍 ॥ ॥
𑌏𑌵𑌮𑍁𑌕𑍍𑌤 𑌸𑍍𑌸 𑌤𑍁 𑌤𑌤𑍋 𑌭𑌰𑌦𑍍𑌵𑌾𑌜𑍇𑌨 𑌧𑍀𑌮𑌤𑌾 ।
𑌪𑍍𑌰𑌤𑍍𑌯𑍁𑌵𑌾𑌚 𑌭𑌰𑌦𑍍𑌵𑌾𑌜𑌂 𑌭𑌰𑌤𑍋 𑌧𑌰𑍍𑌮𑌵𑌤𑍍𑌸𑌲𑌃 ॥ ॥
𑌸 𑌯𑌾𑌚𑍍𑌯𑌮𑌾𑌨𑍋 𑌗𑍁𑌰𑍁𑌣𑌾 𑌮𑌯𑌾 𑌚 𑌦𑍃𑌢𑌵𑌿𑌕𑍍𑌰𑌮𑌃 ।
𑌰𑌾𑌘𑌵𑌃 𑌪𑌰𑌮𑌪𑍍𑌰𑍀𑌤𑍋 𑌵𑌸𑌿𑌷𑍍𑌠𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ ॥
𑌪𑌿𑌤𑍁𑌃 𑌪𑍍𑌰𑌤𑌿𑌜𑍍𑌞𑌾𑌂 𑌤𑌾𑌮𑍇𑌵 𑌪𑌾𑌲𑌯𑌿𑌷𑍍𑌯𑌾𑌮𑌿 𑌤𑌤𑍍𑌤𑍍𑌵𑌤𑌃 ।
𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌯𑌾 𑌪𑍍𑌰𑌤𑌿𑌜𑍍𑌞𑌾 𑌪𑌿𑌤𑍁𑌰𑍍𑌮𑌮 ॥ 10 ॥
𑌏𑌵𑌮𑍁𑌕𑍍𑌤𑍋 𑌮𑌹𑌾𑌪𑍍𑌰𑌾𑌜𑍍𑌞𑍋 𑌵𑌸𑌿𑌷𑍍𑌠𑌃 𑌪𑍍𑌰𑌤𑍍𑌯𑍁𑌵𑌾𑌚 𑌹 ।
𑌵𑌾𑌕𑍍𑌯𑌜𑍍𑌞𑍋 𑌵𑌾𑌕𑍍𑌯𑌕𑍁𑌶𑌲𑌂 𑌰𑌾𑌘𑌵𑌂 𑌵𑌚𑌨𑌂 𑌮𑌹𑌤𑍍 ॥ 11 ॥
𑌏𑌤𑍇 𑌪𑍍𑌰𑌯𑌚𑍍𑌛 𑌸𑌂𑌹𑍃𑌷𑍍𑌟𑌃 𑌪𑌾𑌦𑍁𑌕𑍇 𑌹𑍇𑌮𑌭𑍂𑌷𑌿𑌤𑍇 ।
𑌅𑌯𑍋𑌧𑍍𑌯𑌾𑌯𑌾𑌂 𑌮𑌹𑌾𑌪𑍍𑌰𑌾𑌜𑍍𑌞 𑌯𑍋𑌗𑌕𑍍𑌷𑍇𑌮𑌕𑌰𑍇 𑌤𑌵 ॥ 12 ॥
𑌏𑌵𑌮𑍁𑌕𑍍𑌤𑍋 𑌵𑌸𑌿𑌷𑍍𑌠𑍇𑌨 𑌰𑌾𑌘𑌵𑌃 𑌪𑍍𑌰𑌾𑌙𑍍𑌮𑍁𑌖𑌃 𑌸𑍍𑌥𑌿𑌤𑌃 ।
𑌪𑌾𑌦𑍁𑌕𑍇 𑌹𑍍𑌯𑌧𑌿𑌰𑍁𑌹𑍍𑌯𑍈𑌤𑍇 𑌮𑌮 𑌰𑌾𑌜𑍍𑌯𑌾𑌯 𑌵𑍈 𑌦𑌦𑍌 ॥ 13 ॥
𑌨𑌿𑌵𑍃𑌤𑍍𑌤𑍋𑌽𑌹𑌮𑌨𑍁𑌜𑍍𑌞𑌾𑌤𑍋 𑌰𑌾𑌮𑍇𑌣 𑌸𑍁𑌮𑌹𑌾𑌤𑍍𑌮𑌨𑌾 ।
𑌅𑌯𑍋𑌧𑍍𑌯𑌾𑌮𑍇𑌵 𑌗𑌚𑍍𑌛𑌾𑌮𑌿 𑌗𑍃𑌹𑍀𑌤𑍍𑌵𑌾 𑌪𑌾𑌦𑍁𑌕𑍇 𑌶𑍁𑌭𑍇 ॥ 14 ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌶𑍁𑌭𑌂 𑌵𑌾𑌕𑍍𑌯𑌂 𑌭𑌰𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌭𑌰𑌦𑍍𑌵𑌾𑌜𑌶𑍍𑌶𑍁𑌭𑌤𑌰𑌂 𑌮𑍁𑌨𑌿𑌰𑍍𑌵𑌾𑌕𑍍𑌯𑌮𑍁𑌵𑌾𑌚 𑌤𑌮𑍍 ॥ 15 ॥
𑌨𑍈𑌤𑌚𑍍𑌚𑌿𑌤𑍍𑌰𑌂 𑌨𑌰𑌵𑍍𑌯𑌾𑌘𑍍𑌰 𑌶𑍀𑌲𑌵𑍃𑌤𑍍𑌤𑌵𑌤𑌾𑌂 𑌵𑌰 ।
𑌯𑌦𑌾𑌰𑍍𑌯𑌂 𑌤𑍍𑌵𑌯𑌿 𑌤𑌿𑌷𑍍𑌠𑍇𑌤𑍍𑌤𑍁 𑌨𑌿𑌮𑍍𑌨𑍇 𑌸𑍃𑌷𑍍𑌟𑌮𑌿𑌵𑍋𑌦𑌕𑌮𑍍 ॥ 16 ॥
𑌅𑌮𑍃𑌤 𑌸𑍍𑌸𑌮𑌹𑌾𑌬𑌾𑌹𑍁𑌃 𑌪𑌿𑌤𑌾 𑌦𑌶𑌰𑌥𑌸𑍍𑌤𑌵 ।
𑌯𑌸𑍍𑌯 𑌤𑍍𑌵𑌮𑍀𑌦𑍃𑌶𑌃 𑌪𑍁𑌤𑍍𑌰𑍋 𑌧𑌰𑍍𑌮𑌜𑍍𑌞𑍋 𑌧𑌰𑍍𑌮𑌵𑌤𑍍𑌸𑌲𑌃 ॥ 1 ॥
𑌤𑌮𑍃𑌷𑌿𑌂 𑌤𑍁 𑌮𑌹𑌾𑌤𑍍𑌮𑌾𑌨𑌮𑍁𑌕𑍍𑌤𑌵𑌾𑌕𑍍𑌯𑌂 𑌕𑍃𑌤𑌾𑌂𑌜𑌲𑌿𑌃 ।
𑌆𑌮𑌂𑌤𑍍𑌰𑌯𑌿𑌤𑍁𑌮𑌾𑌰𑍇𑌭𑍇 𑌚𑌰𑌣𑌾𑌵𑍁𑌪𑌗𑍃𑌹𑍍𑌯 𑌚 ॥ 1 ॥
𑌤𑌤𑌃 𑌪𑍍𑌰𑌦𑌕𑍍𑌷𑌿𑌣𑌂 𑌕𑍃𑌤𑍍𑌵𑌾 𑌭𑌰𑌦𑍍𑌵𑌾𑌜𑌂 𑌪𑍁𑌨𑌃 𑌪𑍁𑌨𑌃 ।
𑌭𑌰𑌤𑌸𑍍𑌤𑍁 𑌯𑌯𑍌 𑌶𑍍𑌰𑍀𑌮𑌾𑌨𑌯𑍋𑌧𑍍𑌯𑌾𑌂 𑌸𑌹 𑌮𑌂𑌤𑍍𑌰𑌿𑌭𑌿𑌃 ॥ 1 ॥
𑌯𑌾𑌨𑍈𑌶𑍍𑌚 𑌶𑌕𑌟𑍈𑌶𑍍𑌚𑍈𑌵 𑌹𑌯𑍈𑌰𑍍𑌨𑌾𑌗𑍈𑌶𑍍𑌚 𑌸𑌾 𑌚𑌮𑍂𑌃 ।
𑌪𑍁𑌨𑌰𑍍𑌨𑌿𑌵𑍃𑌤𑍍𑌤𑌾 𑌵𑌿𑌸𑍍𑌤𑍀𑌰𑍍𑌣𑌾 𑌭𑌰𑌤𑌸𑍍𑌯𑌾𑌨𑍁𑌯𑌾𑌯𑌿𑌨𑍀 ॥ 20 ॥
𑌤𑌤𑌸𑍍𑌤𑍇 𑌯𑌮𑍁𑌨𑌾𑌂 𑌦𑌿𑌵𑍍𑌯𑌾𑌂 𑌨𑌦𑍀𑌂 𑌤𑍀𑌰𑍍𑌤𑍍𑌵𑍋𑌰𑍍𑌮𑌿𑌮𑌾𑌲𑌿𑌨𑍀𑌮𑍍 ।
𑌦𑌦𑍃𑌶𑍁𑌸𑍍𑌤𑌾𑌂 𑌪𑍁𑌨 𑌸𑍍𑌸𑌰𑍍𑌵𑍇 𑌗𑌂𑌗𑌾𑌂 𑌶𑍁𑌭𑌜𑌲𑌾𑌂 𑌨𑌦𑍀𑌮𑍍 ॥ 21 ॥
𑌤𑌾𑌂 𑌰𑌮𑍍𑌯𑌜𑌲𑌸𑌂𑌪𑍂𑌰𑍍𑌣𑌾𑌂 𑌸𑌂𑌤𑍀𑌰𑍍𑌯 𑌸𑌹𑌬𑌾𑌂𑌧𑌵𑌃 𑌶𑍃𑌂𑌗𑌿𑌬𑍇𑌰𑌪𑍁𑌰𑌂 𑌰𑌮𑍍𑌯𑌂 𑌪𑍍𑌰𑌵𑌿𑌵𑍇𑌶 𑌸𑌸𑍈𑌨𑌿𑌕𑌃 ।
𑌶𑍃𑌂𑌗𑌿𑌬𑍇𑌰𑌪𑍁𑌰𑌾𑌦𑍍𑌭𑍂𑌯 𑌸𑍍𑌤𑍍𑌵𑌯𑍋𑌧𑍍𑌯𑌾𑌂 𑌸𑌂𑌦𑌦𑌰𑍍𑌶 𑌹 ॥ 22 ॥
𑌅𑌯𑍋𑌧𑍍𑌯𑌾𑌂 𑌚 𑌤𑌤𑍋 𑌦𑍃𑌷𑍍𑌟𑍍𑌵𑌾 𑌪𑌿𑌤𑍍𑌰𑌾 𑌭𑍍𑌰𑌾𑌤𑍍𑌰𑌾 𑌵𑌿𑌵𑌰𑍍𑌜𑌿𑌤𑌾𑌮𑍍 ।
𑌭𑌰𑌤𑍋 𑌦𑍁𑌃𑌖 𑌸𑌂𑌤𑌪𑍍𑌤 𑌸𑍍𑌸𑌾𑌰𑌥𑌿𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 23 ॥
𑌸𑌾𑌰𑌥𑍇 𑌪𑌶𑍍𑌯 𑌵𑌿𑌧𑍍𑌵𑌸𑍍𑌤𑌾 𑌸𑌾𑌽𑌯𑍋𑌧𑍍𑌯𑌾 𑌨 𑌪𑍍𑌰𑌕𑌾𑌶𑌤𑍇 ।
𑌨𑌿𑌰𑌾𑌕𑌾𑌰𑌾 𑌨𑌿𑌰𑌾𑌨𑌂𑌦𑌾 𑌦𑍀𑌨𑌾 𑌪𑍍𑌰𑌤𑌿𑌹𑌤𑌸𑍍𑌵𑌰𑌾 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌤𑍍𑌰𑌯𑍋𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
