𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑍋𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌇𑌤𑌿 𑌬𑍍𑌰𑍁𑌵𑌤𑌿 𑌰𑌾𑌮𑍇 𑌤𑍁 𑌲𑌕𑍍𑌷𑍍𑌮𑌣𑍋𑌽𑌧𑌶𑍍𑌶𑌿𑌰𑌾 𑌮𑍁𑌹𑍁𑌃 ।
𑌶𑍍𑌰𑍃𑌤𑍍𑌵𑌾 𑌮𑌧𑍍𑌯𑌂 𑌜𑌗𑌾𑌮𑍇𑌵 𑌮𑌨𑌸𑌾 𑌦𑍁𑌃𑌖𑌹𑌰𑍍𑌷𑌯𑍋𑌃 ॥ 1 ॥
𑌤𑌦𑌾 𑌤𑍁 𑌬𑌧𑍍𑌦𑍍𑌵𑌾 𑌭𑍍𑌰𑍁𑌕𑍁𑌟𑍀𑌂 𑌭𑍍𑌰𑍁𑌵𑍋𑌰𑍍𑌮𑌧𑍍𑌯𑍇 𑌨𑌰𑌰𑍍𑌷𑌭𑌃 ।
𑌨𑌿𑌶𑌶𑍍𑌵𑌾𑌸 𑌮𑌹𑌾𑌸𑌰𑍍𑌪𑍋 𑌬𑌿𑌲𑌸𑍍𑌥 𑌇𑌵 𑌰𑍋𑌷𑌿𑌤𑌃 ॥ 2 ॥
𑌤𑌸𑍍𑌯 𑌦𑍁𑌷𑍍𑌪𑍍𑌰𑌤𑌿𑌵𑍀𑌕𑍍𑌷𑌂 𑌤𑌦𑍍𑌭𑍍𑌰𑍁𑌕𑍁𑌟𑍀𑌸𑌹𑌿𑌤𑌂 𑌤𑌦𑌾 ।
𑌬𑌭𑍌 𑌕𑍍𑌰𑍁𑌦𑍍𑌧𑌸𑍍𑌯 𑌸𑌿𑌂𑌹𑌸𑍍𑌯 𑌮𑍁𑌖𑌸𑍍𑌯 𑌸𑌦𑍃𑌶𑌂 𑌮𑍁𑌖𑌮𑍍 ॥ 3 ॥
𑌅𑌗𑍍𑌰𑌹𑌸𑍍𑌤𑌂 𑌵𑌿𑌧𑍁𑌨𑍍𑌵𑌂𑌸𑍍𑌤𑍁 𑌹𑌸𑍍𑌤𑍀 𑌹𑌸𑍍𑌤𑌮𑌿𑌵𑌾𑌤𑍍𑌮𑌨𑌃 ।
𑌤𑌿𑌰𑍍𑌯𑌗𑍂𑌰𑍍𑌧𑍍𑌵𑌂 𑌶𑌰𑍀𑌰𑍇 𑌚 𑌪𑌾𑌤𑌯𑌿𑌤𑍍𑌵𑌾 𑌶𑌿𑌰𑍋𑌧𑌰𑌾𑌮𑍍 ॥ 4 ॥
𑌅𑌗𑍍𑌰𑌾𑌕𑍍𑌷𑍍𑌣𑌾 𑌵𑍀𑌕𑍍𑌷𑌮𑌾𑌣𑌸𑍍𑌤𑍁 𑌤𑌿𑌰𑍍𑌯𑌗𑍍𑌭𑍍𑌰𑌾𑌤𑌰𑌮𑌬𑍍𑌰𑌵𑍀𑌤𑍍 ।
𑌅𑌸𑍍𑌥𑌾𑌨𑍇 𑌸𑌂𑌭𑍍𑌰𑌮𑍋 𑌯𑌸𑍍𑌯 𑌜𑌾𑌤𑍋 𑌵𑍈 𑌸𑍁𑌮𑌹𑌾𑌨𑌯𑌮𑍍 ॥ 5 ॥
𑌧𑌰𑍍𑌮𑌦𑍋𑌷 𑌪𑍍𑌰𑌸𑌂𑌗𑍇𑌨 𑌲𑍋𑌕𑌸𑍍𑌯𑌾𑌨𑌤𑌿𑌶𑌂𑌕𑌯𑌾 ।
𑌕𑌥𑌂𑌹𑍍𑌯𑍇𑌤𑌦𑌸𑌂𑌭𑍍𑌰𑌾𑌂𑌤𑌸𑍍𑌤𑍍𑌵𑌦𑍍𑌵𑌿𑌧𑍋 𑌵𑌕𑍍𑌤𑍁𑌮𑌰𑍍𑌹𑌤𑌿 ॥ 6 ॥
𑌯𑌥𑌾 𑌦𑍈𑌵𑌮𑌶𑍌𑌡𑍀𑌰𑌂 𑌶𑍌𑌂𑌡𑍀𑌰 𑌕𑍍𑌷𑌤𑍍𑌰𑌿𑌯𑌰𑍍𑌷𑌭 ।
𑌕𑌿𑌨𑍍𑌨𑌾𑌮 𑌕𑍃𑌪𑌣𑌂 𑌦𑍈𑌵𑌮𑌶𑌕𑍍𑌤𑌮𑌭𑌿𑌶𑌂𑌸𑌸𑌿 ॥ ॥
𑌪𑌾𑌪𑌯𑍋𑌸𑍍𑌤𑍇 𑌕𑌥𑌂 𑌨𑌾𑌮 𑌤𑌯𑍋𑌶𑍍𑌶𑌂𑌕𑌾 𑌨 𑌵𑌿𑌦𑍍𑌯𑌤𑍇 ।
𑌸𑌂𑌤𑌿 𑌧𑌰𑍍𑌮𑍋𑌪𑌧𑌾 𑌶𑍍𑌲𑌕𑍍𑌷𑍍𑌣𑌾𑌃 𑌧𑌰𑍍𑌮𑌾𑌤𑍍𑌮𑌨𑍍𑌕𑌿𑌂 𑌨 𑌬𑍁𑌧𑍍𑌯𑌸𑍇 ॥ ॥
𑌤𑌯𑍋𑌸𑍍𑌸𑍁𑌚𑌰𑌿𑌤𑌂 𑌸𑍍𑌵𑌾𑌰𑍍𑌥𑌂 𑌶𑌾𑌠𑍍𑌯𑌾𑌤𑍍𑌪𑌰𑌿𑌜𑌿𑌹𑍀𑌰𑍍𑌷𑌤𑍋𑌃 ।
𑌯𑌦𑌿 𑌨𑍈𑌵𑌂 𑌵𑍍𑌯𑌵𑌸𑌿𑌤𑌂 𑌸𑍍𑌯𑌾𑌦𑍍𑌧𑌿 𑌪𑍍𑌰𑌾𑌗𑍇𑌵 𑌰𑌾𑌘𑌵 ॥ ॥
𑌤𑌯𑍋𑌃 𑌪𑍍𑌰𑌾𑌗𑍇𑌵 𑌦𑌤𑍍𑌤𑌶𑍍𑌚 𑌸𑍍𑌯𑌾𑌦𑍍𑌵𑌰𑌃 𑌪𑍍𑌰𑌕𑍃𑌤𑌶𑍍𑌚 𑌸𑌃 ।
𑌲𑍋𑌕𑌵𑌿𑌦𑍍𑌵𑌿𑌷𑍍𑌟𑌮𑌾𑌰𑌬𑍍𑌧𑌂 𑌤𑍍𑌵𑌦𑌨𑍍𑌯𑌸𑍍𑌯𑌾𑌭𑌿𑌷𑍇𑌚𑌨𑌮𑍍 ।
𑌨𑍋𑌤𑍍𑌸𑌹𑍇 𑌸𑌹𑌿𑌤𑍁𑌂 𑌵𑍀𑌰 𑌤𑌤𑍍𑌰 𑌮𑍇 𑌕𑍍𑌷𑌂𑌤𑍁𑌮𑌰𑍍𑌹𑌸𑌿 ॥ 10 ॥
𑌯𑍇𑌨𑍇𑌯 𑌮𑌾𑌗𑌤𑌾 𑌦𑍍𑌵𑍈𑌧𑌂 𑌤𑌵 𑌬𑍁𑌦𑍍𑌧𑌿𑌰𑍍𑌮𑌹𑌾𑌮𑌤𑍇 ।
𑌸 𑌹𑌿 𑌧𑌰𑍍𑌮𑍋 𑌮𑌮 𑌦𑍍𑌵𑍇𑌷𑍍𑌯𑌃 𑌪𑍍𑌰𑌸𑌂𑌗𑌾𑌦𑍍𑌯𑌸𑍍𑌯 𑌮𑍁𑌹𑍍𑌯𑌸𑌿 ॥ 11 ॥
𑌕𑌥𑌂 𑌤𑍍𑌵𑌂 𑌕𑌰𑍍𑌮𑌣𑌾 𑌶𑌕𑍍𑌤𑌃 𑌕𑍈𑌕𑍇𑌯𑍀𑌵𑌶𑌵𑌰𑍍𑌤𑌿𑌨𑌃 ।
𑌕𑌰𑌿𑌷𑍍𑌯𑌸𑌿 𑌪𑌿𑌤𑍁𑌰𑍍𑌵𑌾𑌕𑍍𑌯𑌮𑌧𑌰𑍍𑌮𑌿𑌷𑍍𑌠𑌂 𑌵𑌿𑌗𑌰𑍍𑌹𑌿𑌤𑌮𑍍 ॥ 12 ॥
𑌯𑌦𑍍𑌯𑌯𑌂 𑌕𑌿𑌲𑍍𑌬𑌿𑌷𑌾𑌦𑍍𑌭𑍇𑌦𑌃 𑌕𑍃𑌤𑍋𑌽𑌪𑍍𑌯𑍇𑌵𑌂 𑌨 𑌗𑍃𑌹𑍍𑌯𑌤𑍇 ।
𑌜𑌾𑌯𑌤𑍇 𑌤𑌤𑍍𑌰 𑌮𑍇 𑌦𑍁𑌃𑌖𑌂 𑌧𑌰𑍍𑌮𑌸𑌂𑌗𑌶𑍍𑌚 𑌗𑌰𑍍𑌹𑌿𑌤𑌃 ॥ 13 ॥
𑌮𑌨𑌸𑌾𑌽𑌪𑌿 𑌕𑌥𑌂 𑌕𑌾𑌮𑌂 𑌕𑍁𑌰𑍍𑌯𑌾𑌸𑍍𑌤𑍍𑌵𑌂 𑌕𑌾𑌮𑌵𑍃𑌤𑍍𑌤𑌯𑍋𑌃 ।
𑌤𑌯𑍋𑌸𑍍𑌤𑍍𑌵𑌹𑌿𑌤𑌯𑍋𑌰𑍍𑌨𑌿𑌤𑍍𑌯𑌂 𑌶𑌤𑍍𑌰𑍍𑌵𑍋𑌃 𑌪𑌿𑌤𑍍𑌰𑌭𑌿𑌧𑌾𑌨𑌯𑍋𑌃 ॥ 14 ॥
𑌯𑌦𑍍𑌯𑌪𑌿 𑌪𑍍𑌰𑌤𑌿𑌪𑌤𑍍𑌤𑌿𑌸𑍍𑌤𑍇 𑌦𑍈𑌵𑍀 𑌚𑌾𑌪𑌿 𑌤𑌯𑍋𑌰𑍍𑌮𑌤𑌮𑍍 ।
𑌤𑌥𑌾𑌪𑍍𑌯𑍁𑌪𑍇𑌕𑍍𑌷𑌣𑍀𑌯𑌂 𑌤𑍇 𑌨 𑌮𑍇 𑌤𑌦𑌪𑌿 𑌰𑍋𑌚𑌤𑍇 ॥ 15 ॥
𑌵𑌿𑌕𑍍𑌲𑌬𑍋 𑌵𑍀𑌰𑍍𑌯𑌹𑍀𑌨𑍋 𑌯𑌸𑍍𑌸 𑌦𑍈𑌵𑌮𑌨𑍁𑌵𑌰𑍍𑌤𑌤𑍇 ।
𑌵𑍀𑌰𑌾𑌸𑍍𑌸𑌂𑌭𑌾𑌵𑌿𑌤𑌾𑌤𑍍𑌮𑌾𑌨𑍋 𑌨 𑌦𑍈𑌵𑌂 𑌪𑌰𑍍𑌯𑍁𑌪𑌾𑌸𑌤𑍇 ॥ 16 ॥
𑌦𑍈𑌵𑌂 𑌪𑍁𑌰𑍁𑌷𑌕𑌾𑌰𑍇𑌣 𑌯𑌃 𑌸𑌮𑌰𑍍𑌥𑌃 𑌪𑍍𑌰𑌬𑌾𑌧𑌿𑌤𑍁𑌮𑍍 ।
𑌨 𑌦𑍈𑌵𑍇𑌨 𑌵𑌿𑌪𑌨𑍍𑌨𑌾𑌰𑍍𑌥𑌃 𑌪𑍁𑌰𑍁𑌷𑌸𑍍𑌸𑍋𑌽𑌵𑌸𑍀𑌦𑌤𑌿 ॥ 1 ॥
𑌦𑍍𑌰𑌕𑍍𑌷𑍍𑌯𑌂𑌤𑌿 𑌤𑍍𑌵𑌦𑍍𑌯 𑌦𑍈𑌵𑌸𑍍𑌯 𑌪𑍌𑌰𑍁𑌷𑌂 𑌪𑍁𑌰𑍁𑌷𑌸𑍍𑌯 𑌚 ।
𑌦𑍈𑌵𑌮𑌾𑌨𑍁𑌷𑌯𑍋𑌰𑌦𑍍𑌯 𑌵𑍍𑌯𑌕𑍍𑌤𑌾 𑌵𑍍𑌯𑌕𑍍𑌤𑌿𑌰𑍍𑌭𑌵𑌿𑌷𑍍𑌯𑌤𑌿 ॥ 1 ॥
𑌅𑌦𑍍𑌯 𑌮𑌤𑍍𑌪𑍌𑌰𑍁𑌷𑌹𑌤𑌂 𑌦𑍈𑌵𑌂 𑌦𑍍𑌰𑌕𑍍𑌷𑍍𑌯𑌂𑌤𑌿 𑌵𑍈 𑌜𑌨𑌾𑌃 ।
𑌯𑌦𑍍𑌦𑍈𑌵𑌾𑌦𑌾𑌹𑌤𑌂 𑌤𑍇𑌽𑌦𑍍𑌯 𑌦𑍃𑌷𑍍𑌟𑌂 𑌰𑌾𑌜𑍍𑌯𑌾𑌭𑌿𑌷𑍇𑌚𑌨𑌮𑍍 ॥ 1 ॥
𑌅𑌤𑍍𑌯𑌂𑌕𑍁𑌶𑌮𑌿𑌵𑍋𑌦𑍍𑌦𑌾𑌮𑌂 𑌗𑌜𑌂 𑌮𑌦𑌬𑌲𑍋𑌦𑍍𑌧𑌤𑌮𑍍 ।
𑌪𑍍𑌰𑌧𑌾𑌵𑌿𑌤𑌮𑌹𑌂 𑌦𑍈𑌵𑌂 𑌪𑍌𑌰𑍁𑌷𑍇𑌣 𑌨𑌿𑌵𑌰𑍍𑌤𑌯𑍇 ॥ 20 ॥
𑌲𑍋𑌕𑌪𑌾𑌲𑌾𑌸𑍍𑌸𑌮𑌸𑍍𑌤𑌾 𑌸𑍍𑌤𑍇 𑌨𑌾𑌦𑍍𑌯 𑌰𑌾𑌮𑌾𑌭𑌿𑌷𑍇𑌚𑌨𑌮𑍍 ।
𑌨 𑌚 𑌕𑍃𑌤𑍍𑌸𑍍𑌨𑌾𑌸𑍍𑌤𑍍𑌰𑌯𑍋 𑌲𑍋𑌕𑌾 𑌵𑌿𑌹𑌨𑍍𑌯𑍁𑌃 𑌕𑌿𑌂 𑌪𑍁𑌨𑌃 𑌪𑌿𑌤𑌾 ॥ 21 ॥
𑌯𑍈𑌰𑍍𑌨𑌿𑌵𑌾𑌸𑌸𑍍𑌤𑌵𑌾𑌰𑌣𑍍𑌯𑍇 𑌮𑌿𑌥𑍋 𑌰𑌾𑌜𑌨𑍍𑌸𑌮𑌰𑍍𑌥𑌿𑌤𑌃 ।
𑌅𑌰𑌣𑍍𑌯𑍇 𑌤𑍇 𑌨𑌿𑌵𑌤𑍍𑌸𑍍𑌯𑌂𑌤𑌿 𑌚𑌤𑍁𑌰𑍍𑌦𑌶 𑌸𑌮𑌾𑌸𑍍𑌤𑌥𑌾 ॥ 22 ॥
𑌅𑌹𑌂 𑌤𑌦𑌾𑌶𑌾𑌂 𑌛𑍇𑌤𑍍𑌸𑍍𑌯𑌾𑌮𑌿 𑌪𑌿𑌤𑍁𑌸𑍍𑌤𑌸𑍍𑌯𑌾𑌶𑍍𑌚 𑌯𑌾 𑌤𑌵 ।
𑌅𑌭𑌿𑌷𑍇𑌕𑌵𑌿𑌘𑌾𑌤𑍇𑌨 𑌪𑍁𑌤𑍍𑌰𑌰𑌾𑌜𑍍𑌯𑌾𑌯 𑌵𑌰𑍍𑌤𑌤𑍇 ॥ 23 ॥
𑌮𑌦𑍍𑌬𑌲𑍇𑌨 𑌵𑌿𑌰𑍁𑌦𑍍𑌧𑌾𑌯 𑌨 𑌸𑍍𑌯𑌾𑌦𑍍𑌦𑍈𑌵𑌬𑌲𑌂 𑌤𑌥𑌾 ।
𑌪𑍍𑌰𑌭𑌵𑌿𑌷𑍍𑌯𑌤𑌿 𑌦𑍁𑌃𑌖𑌾𑌯 𑌯𑌥𑍋𑌗𑍍𑌰𑌂 𑌪𑍌𑌰𑍁𑌷𑌂 𑌮𑌮 ॥ 24 ॥
𑌊𑌰𑍍𑌧𑍍𑌵𑌂 𑌵𑌰𑍍𑌷𑌸𑌹𑌸𑍍𑌰𑌾𑌂𑌤𑍇 𑌪𑍍𑌰𑌜𑌾𑌪𑌾𑌲𑍍𑌯𑌮𑌨𑌂𑌤𑌰𑌮𑍍 ।
𑌆𑌰𑍍𑌯𑌪𑍁𑌤𑍍𑌰𑌾𑌃 𑌕𑌰𑌿𑌷𑍍𑌯𑌂𑌤𑌿 𑌵𑌨𑌵𑌾𑌸𑌂 𑌗𑌤𑍇 𑌤𑍍𑌵𑌯𑌿 ॥ 25 ॥
𑌪𑍂𑌰𑍍𑌵𑌂 𑌰𑌾𑌜𑌰𑍍𑌷𑌿𑌵𑍃𑌤𑍍𑌤𑍍𑌯𑌾 𑌹𑌿 𑌵𑌨𑌵𑌾𑌸𑍋 𑌵𑌿𑌧𑍀𑌯𑌤𑍇 ।
𑌪𑍍𑌰𑌜𑌾 𑌨𑌿𑌕𑍍𑌷𑌿𑌪𑍍𑌯 𑌪𑍁𑌤𑍍𑌰𑍇𑌷𑍁 𑌪𑍁𑌤𑍍𑌰𑌵𑌤𑍍𑌪𑌰𑌿𑌪𑌾𑌲𑌨𑍇 ॥ 26 ॥
𑌸 𑌚𑍇𑌦𑍍𑌰𑌾𑌜𑌨𑍍𑌯𑌨𑍇𑌕𑌾𑌗𑍍𑌰𑍇 𑌰𑌾𑌜𑍍𑌯𑌵𑌿𑌭𑍍𑌰𑌮𑌶𑌂𑌕𑌯𑌾 ।
𑌨𑍈𑌵𑌮𑌿𑌚𑍍𑌛𑌸𑌿 𑌧𑌰𑍍𑌮𑌾𑌤𑍍𑌮𑌨𑍍 𑌰𑌾𑌜𑍍𑌯𑌂 𑌰𑌾𑌮 𑌤𑍍𑌵𑌮𑌾𑌤𑍍𑌮𑌨𑌿 ॥ 2 ॥
𑌪𑍍𑌰𑌤𑌿𑌜𑌾𑌨𑍇 𑌚 𑌤𑍇 𑌵𑍀𑌰 𑌮𑌾𑌽𑌭𑍂𑌵𑌂 𑌵𑍀𑌰𑌲𑍋𑌕𑌭𑌾𑌕𑍍 ।
𑌰𑌾𑌜𑍍𑌯𑌂 𑌚 𑌤𑌵 𑌰𑌕𑍍𑌷𑍇𑌯𑌮𑌹𑌂 𑌵𑍇𑌲𑍇𑌵 𑌸𑌾𑌗𑌰𑌮𑍍 ॥ 2 ॥
𑌮𑌂𑌗𑌲𑍈𑌰𑌭𑌿𑌷𑌿𑌂𑌚𑌸𑍍𑌵 𑌤𑌤𑍍𑌰 𑌤𑍍𑌵𑌂 𑌵𑍍𑌯𑌾𑌪𑍃𑌤𑍋 𑌭𑌵 ।
𑌅𑌹𑌮𑍇𑌕𑍋 𑌮𑌹𑍀𑌪𑌾𑌲𑌾𑌨𑌲𑌂 𑌵𑌾𑌰𑌯𑌿𑌤𑍁𑌂 𑌬𑌲𑌾𑌤𑍍 ॥ 2 ॥
𑌨 𑌶𑍋𑌭𑌾𑌰𑍍𑌥𑌾𑌵𑌿𑌮𑍌 𑌬𑌾𑌹𑍂 𑌨 𑌧𑌨𑍁𑌰𑍍𑌭𑍂𑌷𑌣𑌾𑌯 𑌮𑍇 ।
𑌨𑌾𑌽𑌸𑌿𑌰𑌾𑌬𑌂𑌧𑌨𑌾𑌰𑍍𑌥𑌾𑌯 𑌨 𑌶𑌰𑌾𑌸𑍍𑌤𑌂𑌭𑌹𑍇𑌤𑌵𑌃 ॥ 30 ॥
𑌅𑌮𑌿𑌤𑍍𑌰𑌦𑌮𑌨𑌾𑌰𑍍𑌥𑌂 𑌮𑍇 𑌸𑌰𑍍𑌵𑌮𑍇𑌤𑌚𑍍𑌚𑌤𑍁𑌷𑍍𑌟𑌯𑌮𑍍 ।
𑌨 𑌚𑌾𑌹𑌂 𑌕𑌾𑌮𑌯𑍇𑌽𑌤𑍍𑌯𑌰𑍍𑌥𑌂 𑌯𑌸𑍍𑌸𑍍𑌯𑌾𑌚𑍍𑌛𑌤𑍍𑌰𑍁𑌰𑍍𑌮𑌤𑍋 𑌮𑌮 ॥ 31 ॥
𑌅𑌸𑌿𑌨𑌾 𑌤𑍀𑌕𑍍𑌷𑍍𑌣𑌧𑌾𑌰𑍇𑌣 𑌵𑌿𑌦𑍍𑌯𑍁𑌚𑍍𑌚𑌲𑌿𑌤𑌵𑌰𑍍𑌚𑌸𑌾 ।
𑌪𑍍𑌰𑌗𑍃𑌹𑍀𑌤𑍇𑌨 𑌵𑍈 𑌶𑌤𑍍𑌰𑍁𑌂 𑌵𑌜𑍍𑌰𑌿𑌣𑌂 𑌵𑌾 𑌨 𑌕𑌲𑍍𑌪𑌯𑍇 ॥ 32 ॥
𑌖𑌡𑍍𑌗𑌨𑌿𑌷𑍍𑌪𑍇𑌷𑌨𑌿𑌷𑍍𑌪𑌿𑌷𑍍𑌟𑍈𑌰𑍍𑌗𑌹𑌨𑌾 𑌦𑍁𑌶𑍍𑌚𑌰𑌾 𑌚 𑌮𑍇 ।
𑌹𑌸𑍍𑌤𑍍𑌯𑌶𑍍𑌵𑌨𑌰𑌹𑌸𑍍𑌤𑍋𑌰𑍁𑌶𑌿𑌰𑍋𑌭𑌿𑌰𑍍𑌭𑌵𑌿𑌤𑌾 𑌮𑌹𑍀 ॥ 33 ॥
𑌖𑌡𑍍𑌗𑌧𑌾𑌰𑌾𑌹𑌤𑌾 𑌮𑍇𑌽𑌦𑍍𑌯 𑌦𑍀𑌪𑍍𑌯𑌮𑌾𑌨𑌾 𑌇𑌵𑌾𑌦𑍍𑌰𑌯𑌃 ।
𑌪𑌤𑌿𑌷𑍍𑌯𑌂𑌤𑌿 𑌦𑍍𑌵𑌿𑌪𑌾 𑌭𑍂𑌮𑍌 𑌮𑍇𑌘𑌾 𑌇𑌵 𑌸𑌵𑌿𑌦𑍍𑌯𑍁𑌤𑌃 ॥ 34 ॥
𑌬𑌦𑍍𑌧𑌗𑍋𑌧𑌾𑌂𑌗𑍁𑌲𑌿𑌤𑍍𑌰𑌾𑌣𑍇 𑌪𑍍𑌰𑌗𑍃𑌹𑍀𑌤𑌶𑌰𑌾𑌸𑌨𑍇 ।
𑌕𑌥𑌂 𑌪𑍁𑌰𑍁𑌷𑌮𑌾𑌨𑍀 𑌸𑍍𑌯𑌾𑌤𑍍𑌪𑍁𑌰𑍁𑌷𑌾𑌣𑌾𑌂 𑌮𑌯𑌿 𑌸𑍍𑌥𑌿𑌤𑍇 ॥ 35 ॥
𑌬𑌹𑍁𑌭𑌿𑌶𑍍𑌚𑍈𑌕𑌮𑌤𑍍𑌯𑌸𑍍𑌯𑌨𑍍𑌨𑍇𑌕𑍇𑌨 𑌚 𑌬𑌹𑍂𑌨𑍍𑌜𑌨𑌾𑌨𑍍 ।
𑌵𑌿𑌨𑌿𑌯𑍋𑌕𑍍𑌷𑍍𑌯𑌾𑌮𑍍𑌯𑌹𑌂 𑌬𑌾𑌣𑌾𑌨𑍍𑌨𑍃𑌵𑌾𑌜𑌿𑌗𑌜𑌮𑌰𑍍𑌮𑌸𑍁 ॥ 36 ॥
𑌅𑌦𑍍𑌯 𑌮𑍇𑌽𑌸𑍍𑌤𑍍𑌰𑌪𑍍𑌰𑌭𑌾𑌵𑌸𑍍𑌯 𑌪𑍍𑌰𑌭𑌾𑌵𑌃 𑌪𑍍𑌰𑌭𑌵𑌿𑌷𑍍𑌯𑌤𑌿 ।
𑌰𑌾𑌜𑍍𑌞𑌶𑍍𑌚𑌾𑌪𑍍𑌰𑌭𑍁𑌤𑌾𑌂 𑌕𑌰𑍍𑌤𑍁𑌂 𑌪𑍍𑌰𑌭𑍁𑌤𑍍𑌵𑌂 𑌤𑌵 𑌚 𑌪𑍍𑌰𑌭𑍋𑌃 ॥ 3 ॥
𑌅𑌦𑍍𑌯 𑌚𑌂𑌦𑌨𑌸𑌾𑌰𑌸𑍍𑌯 𑌕𑍇𑌯𑍂𑌰𑌾𑌮𑍋𑌕𑍍𑌷𑌣𑌸𑍍𑌯 𑌚 ।
𑌵𑌸𑍂𑌨𑌾𑌂 𑌚 𑌵𑌿𑌮𑍋𑌕𑍍𑌷𑌸𑍍𑌯 𑌸𑍁𑌹𑍃𑌦𑌾𑌂 𑌪𑌾𑌲𑌨𑌸𑍍𑌯 𑌚 ॥ 3 ॥
𑌅𑌨𑍁𑌰𑍂𑌪𑌾𑌵𑌿𑌮𑍌 𑌬𑌾𑌹𑍂 𑌰𑌾𑌮 𑌕𑌰𑍍𑌮 𑌕𑌰𑌿𑌷𑍍𑌯𑌤𑌃 ।
𑌅𑌭𑌿𑌷𑍇𑌚𑌨𑌵𑌿𑌘𑍍𑌨𑌸𑍍𑌯 𑌕𑌰𑍍𑌤𑍃𑌣𑌾𑌂 𑌤𑍇 𑌨𑌿𑌵𑌾𑌰𑌣𑍇 ॥ 3 ॥
𑌬𑍍𑌰𑌵𑍀𑌹𑌿 𑌕𑍋𑌽𑌦𑍍𑌯𑍈𑌵 𑌮𑌯𑌾 𑌵𑌿𑌯𑍁𑌜𑍍𑌯𑌤𑌾𑌂 𑌤𑌵𑌾 𑌸𑍁𑌹𑍃𑌤𑍍𑌪𑍍𑌰𑌾𑌣𑌯𑌶𑌸𑍍𑌸𑍁𑌹𑍃𑌜𑍍𑌜𑌨𑍈𑌃 ।
𑌯𑌥𑌾 𑌤𑌵𑍇𑌯𑌂 𑌵𑌸𑍁𑌧𑌾 𑌵𑌶𑍇 𑌭𑌵𑍇 𑌤𑍍𑌤𑌥𑍈𑌵 𑌮𑌾𑌂 𑌶𑌾𑌧𑌿 𑌤𑌵𑌾𑌸𑍍𑌮𑌿 𑌕𑌿𑌂𑌕𑌰𑌃 ॥ 40 ॥
𑌵𑌿𑌮𑍃𑌜𑍍𑌯 𑌬𑌾𑌷𑍍𑌪𑌂 𑌪𑌰𑌿𑌸𑌾𑌂𑌤𑍍𑌵𑍍𑌯𑌚𑌾𑌸𑌕𑍃𑌤𑍍 𑌸 𑌲𑌕𑍍𑌷𑍍𑌮𑌣𑌂 𑌰𑌾𑌘𑌵𑌵𑌂𑌶𑌵𑌰𑍍𑌧𑌨𑌃 ।
𑌉𑌵𑌾𑌚 𑌪𑌿𑌤𑍍𑌰𑍍𑌯𑍇 𑌵𑌚𑌨𑍇 𑌵𑍍𑌯𑌵𑌸𑍍𑌥𑌿𑌤𑌂 𑌨𑌿𑌬𑍋𑌧 𑌮𑌾𑌮𑍇𑌷 𑌹𑌿 𑌸𑍌𑌮𑍍𑌯 𑌸𑌤𑍍𑌪𑌥𑌃 ॥ 41 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌤𑍍𑌰𑌯𑍋𑌵𑌿𑌂𑌶𑌸𑍍𑌸𑌰𑍍𑌗𑌃 ॥
