śrīmadvālmīkīya rāmāyaṇē ayōdhyākāṇḍam ।
atha trayōviṃśassargaḥ ।
iti bruvati rāmē tu lakṣmaṇō'dhaśśirā muhuḥ ।
śrṛtvā madhyaṃ jagāmēva manasā duḥkhaharṣayōḥ ॥ 1 ॥
tadā tu badhdvā bhrukuṭīṃ bhruvōrmadhyē nararṣabhaḥ ।
niśaśvāsa mahāsarpō bilastha iva rōṣitaḥ ॥ 2 ॥
tasya duṣprativīkṣaṃ tadbhrukuṭīsahitaṃ tadā ।
babhau kruddhasya siṃhasya mukhasya sadṛśaṃ mukham ॥ 3 ॥
agrahastaṃ vidhunvaṃstu hastī hastamivātmanaḥ ।
tiryagūrdhvaṃ śarīrē cha pātayitvā śirōdharām ॥ 4 ॥
agrākṣṇā vīkṣamāṇastu tiryagbhrātaramabravīt ।
asthānē sambhramō yasya jātō vai sumahānayam ॥ 5 ॥
dharmadōṣa prasaṅgēna lōkasyānatiśaṅkayā ।
kathaṃhyētadasambhrāntastvadvidhō vaktumarhati ॥ 6 ॥
yathā daivamaśauḍīraṃ śauṇḍīra kṣatriyarṣabha ।
kinnāma kṛpaṇaṃ daivamaśaktamabhiśaṃsasi ॥ 7 ॥
pāpayōstē kathaṃ nāma tayōśśaṅkā na vidyatē ।
santi dharmōpadhā ślakṣṇāḥ dharmātmankiṃ na budhyasē ॥ 8 ॥
tayōssucharitaṃ svārthaṃ śāṭhyātparijihīrṣatōḥ ।
yadi naivaṃ vyavasitaṃ syāddhi prāgēva rāghava ॥ 9 ॥
tayōḥ prāgēva dattaścha syādvaraḥ prakṛtaścha saḥ ।
lōkavidviṣṭamārabdhaṃ tvadanyasyābhiṣēchanam ।
nōtsahē sahituṃ vīra tatra mē kṣantumarhasi ॥ 10 ॥
yēnēya māgatā dvaidhaṃ tava buddhirmahāmatē ।
sa hi dharmō mama dvēṣyaḥ prasaṅgādyasya muhyasi ॥ 11 ॥
kathaṃ tvaṃ karmaṇā śaktaḥ kaikēyīvaśavartinaḥ ।
kariṣyasi piturvākyamadharmiṣṭhaṃ vigarhitam ॥ 12 ॥
yadyayaṃ kilbiṣādbhēdaḥ kṛtō'pyēvaṃ na gṛhyatē ।
jāyatē tatra mē duḥkhaṃ dharmasaṅgaścha garhitaḥ ॥ 13 ॥
manasā'pi kathaṃ kāmaṃ kuryāstvaṃ kāmavṛttayōḥ ।
tayōstvahitayōrnityaṃ śatrvōḥ pitrabhidhānayōḥ ॥ 14 ॥
yadyapi pratipattistē daivī chāpi tayōrmatam ।
tathāpyupēkṣaṇīyaṃ tē na mē tadapi rōchatē ॥ 15 ॥
viklabō vīryahīnō yassa daivamanuvartatē ।
vīrāssambhāvitātmānō na daivaṃ paryupāsatē ॥ 16 ॥
daivaṃ puruṣakārēṇa yaḥ samarthaḥ prabādhitum ।
na daivēna vipannārthaḥ puruṣassō'vasīdati ॥ 17 ॥
drakṣyanti tvadya daivasya pauruṣaṃ puruṣasya cha ।
daivamānuṣayōradya vyaktā vyaktirbhaviṣyati ॥ 18 ॥
adya matpauruṣahataṃ daivaṃ drakṣyanti vai janāḥ ।
yaddaivādāhataṃ tē'dya dṛṣṭaṃ rājyābhiṣēchanam ॥ 19 ॥
atyaṅkuśamivōddāmaṃ gajaṃ madabalōddhatam ।
pradhāvitamahaṃ daivaṃ pauruṣēṇa nivartayē ॥ 20 ॥
lōkapālāssamastā stē nādya rāmābhiṣēchanam ।
na cha kṛtsnāstrayō lōkā vihanyuḥ kiṃ punaḥ pitā ॥ 21 ॥
yairnivāsastavāraṇyē mithō rājansamarthitaḥ ।
araṇyē tē nivatsyanti chaturdaśa samāstathā ॥ 22 ॥
ahaṃ tadāśāṃ Chētsyāmi pitustasyāścha yā tava ।
abhiṣēkavighātēna putrarājyāya vartatē ॥ 23 ॥
madbalēna viruddhāya na syāddaivabalaṃ tathā ।
prabhaviṣyati duḥkhāya yathōgraṃ pauruṣaṃ mama ॥ 24 ॥
ūrdhvaṃ varṣasahasrāntē prajāpālyamanantaram ।
āryaputrāḥ kariṣyanti vanavāsaṃ gatē tvayi ॥ 25 ॥
pūrvaṃ rājarṣivṛttyā hi vanavāsō vidhīyatē ।
prajā nikṣipya putrēṣu putravatparipālanē ॥ 26 ॥
sa chēdrājanyanēkāgrē rājyavibhramaśaṅkayā ।
naivamichChasi dharmātman rājyaṃ rāma tvamātmani ॥ 27 ॥
pratijānē cha tē vīra mā'bhūvaṃ vīralōkabhāk ।
rājyaṃ cha tava rakṣēyamahaṃ vēlēva sāgaram ॥ 28 ॥
maṅgalairabhiṣiñchasva tatra tvaṃ vyāpṛtō bhava ।
ahamēkō mahīpālānalaṃ vārayituṃ balāt ॥ 29 ॥
na śōbhārthāvimau bāhū na dhanurbhūṣaṇāya mē ।
nā'sirābandhanārthāya na śarāstambhahētavaḥ ॥ 30 ॥
amitradamanārthaṃ mē sarvamētachchatuṣṭayam ।
na chāhaṃ kāmayē'tyarthaṃ yassyāchChatrurmatō mama ॥ 31 ॥
asinā tīkṣṇadhārēṇa vidyuchchalitavarchasā ।
pragṛhītēna vai śatruṃ vajriṇaṃ vā na kalpayē ॥ 32 ॥
khaḍganiṣpēṣaniṣpiṣṭairgahanā duścharā cha mē ।
hastyaśvanarahastōruśirōbhirbhavitā mahī ॥ 33 ॥
khaḍgadhārāhatā mē'dya dīpyamānā ivādrayaḥ ।
patiṣyanti dvipā bhūmau mēghā iva savidyutaḥ ॥ 34 ॥
baddhagōdhāṅgulitrāṇē pragṛhītaśarāsanē ।
kathaṃ puruṣamānī syātpuruṣāṇāṃ mayi sthitē ॥ 35 ॥
bahubhiśchaikamatyasyannēkēna cha bahūnjanān ।
viniyōkṣyāmyahaṃ bāṇānnṛvājigajamarmasu ॥ 36 ॥
adya mē'straprabhāvasya prabhāvaḥ prabhaviṣyati ।
rājñaśchāprabhutāṃ kartuṃ prabhutvaṃ tava cha prabhōḥ ॥ 37 ॥
adya chandanasārasya kēyūrāmōkṣaṇasya cha ।
vasūnāṃ cha vimōkṣasya suhṛdāṃ pālanasya cha ॥ 38 ॥
anurūpāvimau bāhū rāma karma kariṣyataḥ ।
abhiṣēchanavighnasya kartṛṇāṃ tē nivāraṇē ॥ 39 ॥
bravīhi kō'dyaiva mayā viyujyatāṃ tavā suhṛtprāṇayaśassuhṛjjanaiḥ ।
yathā tavēyaṃ vasudhā vaśē bhavē ttathaiva māṃ śādhi tavāsmi kiṅkaraḥ ॥ 40 ॥
vimṛjya bāṣpaṃ parisāntvyachāsakṛt sa lakṣmaṇaṃ rāghavavaṃśavardhanaḥ ।
uvācha pitryē vachanē vyavasthitaṃ nibōdha māmēṣa hi saumya satpathaḥ ॥ 41 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē trayōviṃśassargaḥ ॥
